ޒަވާޖީ ޙަޔާތަކަށް ފަށަނީ ވަރަށް ފޮނި އުންމީދުތަކަކާއިއެކުގައެވެ. ނަމަވެސް ގިނަބައަކަށް މިއަދު ކުރިމަތިވަމުންދާ އެންމެ ބޮޑު އެއް މައްސަލައަކީ ޒަވާޖީ ޙަޔާތް ކާމިޔާބުނުކުރެވޭ ކަމެވެ. އެކަމުގެ އެންމެ ބޮޑު އެއް ސަބަބާއިމެދު ވިސްނައިލަނީ ވެސް ވަރަށް މަދު މީހެކެވެ.
ﷲ ތަޢާލާ ގަންދީ ބުނަމެވެ. ޒަވާޖީ ޙަޔާތަށް ހުރަސްއެޅޭ އެންމެ ބޮޑު އެއް ސަބަބަކީ ބަރަހަނާ މަންޒަރުތައް ބެލުމެވެ. އެކަންކަމަށް ދެވިހިފުމެވެ. ބަރަހަނާ ފޮޓޯތަކާއި ފިލްމްތައް ބެލުމެވެ. ސޯޝަލް މީޑިއާއިން ނަމަވެސް މީހަކާއި އެއްވެސްވަރެއްގެ ގުޅުމެއް އުފެދޭއިރަށް އެމީހާގެ ބަރަހަނާކަން ދެކެން ބޭނުންވުމެވެ. ފެނުމުން ފާހިޝް އަމަލުކުރަން ޝައުޤުވެރިވެވޭކަމެވެ.
ބަރަހަނާ މަންޒަރު ބެލުމުން ހިތަށާއި ސިކުނޑިއަށް ލިބޭ ގެއްލުން މަރާމާތެއް ނުކުރެވޭނެއެވެ. ކޮންމެވެސް ވަރަކަށް މަރާމާތުކުރެވުނަސް އެކަމުން ހިތާއި ސިކުނޑީގަ ލާ ލަކުނުތައް ފިލުވައެއް ނުލެވެއެވެ. ނަތީޖާއަކަށްވަނީ އެހަނދާންތަކާއި ދުރުވާން މަސައްކަތްކުރި ނަމަވެސް އަބަދުވެސް ހަނދާންތައް އައުވެ އައުވެ ހުރުމެވެ. އެހަނދާންތައް ފިލައިގެންނުދާ ސަބަބަކީ ޝައިޠޯނާ އަބަދުވެސް އެކަންކަން ރީވައިންޑްކުރުވާތީއެވެ.
މީސްތަކުންނޭވެ! ޝައިޠޯނާ އެދޭގޮތަށް ކަންކަމަށް މަގުފަހިވުން މިދަނީ އިތުރުވަމުންނެވެ. އެގޮތުން ބަރަހަނާ މަންޒަރު ބެލުން އެއީ މިއަދު ކުރަން އެންމެ ފަސޭހަ އެއްކަންތަކެވެ. ސޯޝަލް މީޑިއާ، އިންޓަރނެޓު މިއަދު މިވަނީ އެތައް ބިލިއަން މަންޒަރާއި ވީޑިއޯތަކުން ފުރިފައެވެ. އޮތީހަމަ ހިތަށް އަރުވައިލުމާއި ފޯނުގައި އިނގިލިޖައްސައިލުމެވެ.
މީސްތަކުންނޭވެ! އިސްލާމް ދީނުގައި މިއީ ހަމައެކަނި ކުށަކީއެއް ނޫނެވެ. އެންމެ ބޮޑު އެއް ފާފައެވެ. އެހެނީ ﷲ ތަޢާލާގެ އަމުރުފުޅުގައި އޮތީ ޒިނޭ އާއި ކައިރިވެސް ނުވުމަށެވެ. ބަރަހަނާ މަންޒަރާ ވީޑިއޯ ބެލުމަކީ ކަނޑައެޅިގެން ޙަރާމްކަމެއްގެ ގޮތުގައެވެ. އެހައި ބޮޑު ޙަރާންކަމަކަށް އެކަންވެގެންދަނީ އެކަމުގެ ސަބަބުން ޒިނޭއަށް މަގުފަހިވުމުގެ އިތުރުން ޢާއިލީ ދިރިއުޅުންވެސް ހަލާކުވެގެންދާތީއެވެ.
ނިކަން ވިސްނައިލަބަލާށެވެ! ތައުބާވެފައިވާ ގިނަބައެއްގެ ވާހަތަކުން އެނގެނީ އެފަދަ ކަންކަންކުރާ ދެމަފިރިންގެ ޢަމަލުތައް އެކަމުގެ ތެރެއިން ކުރިފަޅައި ހެދިބޮޑުވެ ހިލޭ މީހުންނާއި ގުޅުން ހިންގޭކަމެވެ. މިކުރެވެނީ ކޮންފަދަ ބޮޑު ފާފައެއް ހެއްޔެވެ؟ ލޮލުން ނެރެވޭ އަލިފާނުން ދެދުނިޔެ އަންދައިލެވެނީ ނޫންހެއްޔެވެ؟
މީސްތަކުންނޭވެ، ހަމަޖެހޭ އުފާވެރި ދިރިއުޅުމެއް އުޅެން ބޭނުންނަމަވެސް އާޚިރަތް ކާމިޔާބުވުމަށް އެދޭނަމަވެސް މިފަދަ ބޮޑެތި ފާފަތައް ކުރުން މިހާރުން މިހާރަށް މުޅިން ހުއްޓައިލާށެވެ! އަވަހަށް ތައުބާވާށެވެ! ﷲ ތަޢާލާގެ ހެޔޮ ރަޙްމަތަށް އެދިގެން ދުޢާކުރާށެވެ!
- މުފްތީ މެންކުގެ ދަރުސަކުން
