ދިވެހިރާއްޖޭގައި ޒަމާނުންސުރެ ހިންގަމުން އައި ރަސްކަމުގެ ނިޒާމު އަބަދުގެ އަބަދަށް އުވާލައްވައި ދިވެހި ޖުމްހޫރިއްޔާ އިޢުލާނު ކުރެއްވި ބާނީ ސުމުއްވުލްއަމީރު އިބްރާހީމް ނާޞިރު މއަދު ދުނިޔޭގައި ހުންނެވިނަމަ އެމަނިކުފާނުގެ ހިތްޕުޅަށް ކުރާނެ އަސަރާއިމެދު ވިސްނައިލުން ކީއްތޯއެވެ؟
އެއިރުވެސް އިންޑިއާއަކީ ސަރަހައްދުގެ އެންމެ ބޮޑު ބާރެވެ! މަނަވަރުތަކާއި ބޮންއަޅާ ބޯޓޫތައްވެސް ހުއްޓެވެ. އެތައް މިލިއަން ސިފައިންގެ މައްޗަށް އެކުލެވޭ ބިޔަ ލަޝްކަރެއް އޮތެވެ. "ހަމަބޭނުންވާއިރަށް ރާއްޖެ ހިފިދާނެ" ކަމުގެ ބިރުވެސް އޮތެވެ! ނަމަވެސް ވަޑައިގަތީ އަޅުވެތިކަމާއދިމާއަކަށް ނޫނެވެ. ރާއްޖޭގައި ތިބި ވޯރާ ވިޔަފާރިވެރިން، އެމީހުންގެ ނުރުހުމުގައި ބާލައި ފޮނުވައިލީއެވެ.
މިއަދު މިފެންނަނީ މަޝްރޫޢެއް ހިންގަން އެހެން ޤައުމެއްގެ ކުންފުންޏަކުން ކުޑަ އަގެއް ހުށަހެޅި ނަމަވެސް އެއަގަށް ނުބަލައި "ހަމަބޭނުންވާއިރަށް ރާއްޖެ ހިފިދާނެ" ކަމުގެ ބިރު އައްޑަނައަކަށް ދައްކައިގެން އިންޑިއާއަށް އަޅުވެތިވެ ހުސްވަމުންދާތަނެވެ.
ވެރިކަމަށް އައިއިރު ކިޔަމުން އައީ އެއް ޤައުމަކަށް މާބޮޑަށް ދަރައިފިނަމަ އަޅުވެތިވާންޖެހިދާނެ ކަމަށެވެ. މިއަދު މިފެންނަނީ އިންޑިއާއަށް ދަރައިވިކެމުން ގޮސް އަޅުވެތިވާންޖެހިފައިވާތަނެވެ. އިތުރަށް ދަރުވަމުން ގެންދާތަނެވެ. ވެރިކަމަށް އަންނަމުން އަމިއްލައަށް ދެއްކިވާހަކަތައްވެސް މިހާރު ވަނީ ކަފުންކޮށް ޖަނާޒާކޮށް ނިންމައިފައެވެ.
ނުވިތާކަށް ދިވެހި ރައްޔިތުންގެ ކުރިމަތީގައި ފުރަމާލޭގެ މަގުތަކުގައި އިސްލާމް ދީނަށާއި ﷲ އަށާއި ރަސޫލާ ﷺ އަށް ފުރައްސާރަކުރަމުން ދުވުމުން ދެވޭ އަދަބެއް އޮތްކަމަކަށްވެސް ނުވެއެވެ.
މިކަންކަން ދެކެވަޑައިގަންނަވަން އިބްރާހީމް ނާޞިރު ދުނިޔޭގައި ހުންނެވިނަމަ އެމަނިކުފާނުގެ ހާލުކޮޅާއިމެދު ވިސްނައިލުމުން މިއަދު މިފާހަގަކުރަނީ ޖުމްހޫރީ ދުވަހެއްކަން ނުވަތަ އަލުވެތިކަމުގެ ދުވަހެއްކަން އެނގިގެންދާނެއެވެ.
