ޝައްވާލު މަހު 6 ރޯދަ ހިފުމުން މުޅި އަަހަރު ދުވަހު ރޯދަ ހިފިމީހެއްކަމުގައިވެ އެކަމަުގެ ޘަވާބުލިބިގެންދަނީ ރަމަޟާން މަހުގެ ރޯދަ ހިފުމުންނެވެ. ވީމާ ޝައްވާލު މަހު ހަ ރޯދަ ހިފުމުން ލިބޭނެކަމަށް ޙަދީޘްފުޅުގައި އެވާ ޘަވާބު ހޯދަން އެދޭމީހާ އަވަހަށް ޤަޟާ ކުރަންޖެހޭ ރޯދަތައް ހިފައި ހަމަކުރާށެވެ! ރަމަޟާންމަހުން ޤަޟާކުރަންޖެހޭ އެންމެ ރޯދައެއްވެސް ނުހިފައި ހުއްޓާ އެމީހަކަށް ޙަދީޘްގައިއެވާ ފަދައިން މުޅި އަަހަރު ދުުވަހުގެ ރޯދަ ހިފުމުން ދެއްވަވާ ނިޢްމަތް ނުލިބޭނެތެވެ!
ޝައްވާލު މަހު ހަރޯދަ ހިފުމަކީ ތިޔަބައިމީހުންގެ ނަބިއްޔާ صلى الله عليه وسلم ގެ ހިދާޔަތުގެ ތެރެއިންވާ ކަމެކެވެ. އެހެންކަމުން މިމަތިވެރި ހިދާޔަތް ލިބިގަންނަން ގަދައަޅައި މަސައްކަތްކުރަންޖެހެއެ.
ފަހެ، އަބޫ އައްޔޫބު އަލްއަންޞާރީ رضي الله عنه ގެ އަރިހުން ރިވާވެގެންވެއެވެ. ރަސޫލުﷲ صلى الله عليه وسلم ޙަދީޘްކުރެއްވިއެވެ.
«مَنْ صَامَ رَمَضَانَ ثُمَّ أَتْبَعَهُ سِتًّا مِنْ شَوَّالٍ، كَانَ كَصِيَامِ الدَّهْرِ» [رواه مسلم]
މާނައީ: "ރަމަޟާންމަހު ރޯދަ ހިފުމަށްފަހު، ދެން ޝައްވާލުމަހު ހަ ރޯދަ ހިފައިފިމީހާ ދަންނައެވެ. އޭނާ މުޅި އަހަރު ރޯދަހިފި ފަދައެވެ".
ރަނގަޅަށް ބަލާށެވެ! ޙަދިޘްފުޅުގައި އެއޮތީ "ރަމަޟާންމަހު ރޯދަ ހިފުމަށްފަހު، ދެން ޝައްވާލުމަހު ހަ ރޯދަ ހިފައިފިމީހާ"ގެ ވާހަކައެވެ. އެފަދައިން އޮތްކަމުގައިވީނަމަވެސް ޤަޟާކުރަންޖެހޭ ރޯދަތައް ފަހުން ހިފަން ބަހައްޓާފައި ޝައްވާލުމަހު 6 ރޯދަ ހިފުން އެންމެ ރަނގަޅުކަމަށްވެސް ބައެއް ޢިލްމުވެރިން ބަޔާންކުރައްވަތެވެ. އަނެއްބައި ޢިލްމުވެރިން ވިދާޅުވަނީ ފުރަތަމަ ޤަޟާކުރަންޖެހޭ ރޯދަތައް ހިފުމަށެވެ.
ކޮންމެއަކަސް ޔަޤީންވާ ކަމަކީ ޝައްވާލު މަހުގެ 6 ރޯދަ ހިފައިންހުރި ނަމަވެސް ރަމަޟާން މަހު ނުހިފުމުގެ ސަބަބުން ޤަޟާކުރަންޖެހޭ ރޯދަތައް ހިފައި ހަމަނުކުރާހައި ހިނދަކު މިހަދީޘްފުޅުގައިވާ ފަދައިން މުޅި އަަހަރު ދުވަހު ރޯދަހިފިމީހަކަށް ދެއްވަވާ ޘަވާބު ލިބިގެން ނުދާނެ ކަމެވެ.
މިމޭރުމުން ވިސްނައިލާށެވެ! ތިބާ ތިއަހެރީ ރަމަޟާންމަހުގެ ރޯދަވެސް ހިފުނުވަރަކަށް ހިފައިގެންވެ. ހަ ރޯދަވެސް ހިފައިގެންނެވެ. މަރަކީ އެނގޭ ކަމެއް ނޫނެވެ. ޤަޟާކުރަންޖެހޭ ރޯދަ ޤަޟާނުކޮށް ހުއްޓައި ދުނިޔެ ދޫކުރަންޖެހިއްޖެނަމަ ޙަދީޘްގައި އެވާފަދައިން މުޅި އަހަރު ރޯދަހިފިކަމުގެ ޘަވާބެއް ނުލިބޭނެއެވެ!
- އިސްލާމީ ތިލަފަތުގެ ދަރުސަކުން
