ﷲ ތަޢާލާއަށް ތެދުވެރިކަމާއިއެކު ނިކަން ބުނެބަލާށެވެ! ތިމާއާއި އެކަމަކާއި އެއްވެސް ވަރަކަށް ގުޅުން ނެތް ނަމަވެސް ދުނިޔޭގެ ކޮންމެވެސް ތަނެއްގައި ހިންގި ކޮންމެވެސްކަމެއްގެ ޚަބަރު، ނުވަތަ އެއްވެސް ކަމެއް ހިނގިތޯ ބަލަން ދުވާލަކު ކިތައް ފަހަރު ފޯނާއި ކޮމްޕިޔުޓަރު ބްރައުޒްކުރަން ހެއްޔެވެ؟
ދެން ނިކަން ބުނެބަލާށެވެ! އަޞްލު ތިމާއާއި ގުޅުންހުރި ތިމާއަށް ފައިދާކުރާނެ ކަންކަން ކުރަން ކިތައްފަހަރު ބްރައުޒްކުރިންހެއްޔެވެ؟ މިދައްކަނީ އާޚިރަތް ގެންދާނެ ހެޔޮ ޢަމަލެއް ކުރުމުގެ ވާހަކައެވެ. ﷲ ތަޢާލާގެ ރުހިވޮޑިގަތުން ހޯދައި ކުއްތަންވުމުގެ ވާހަކައެވެ.
އަދިވެސް ނިކަންބުނެބަލާށެވެ! ނެތިމޮށުމާއި ދެބައުޑުވުމާއި ފިތުނަ އުފައްދާ ވާހަކަތައް ކިޔުނު ޢަދަދާއި ޗެޓްކުރި ވަގުތާއި ގޭމްކުޅެން ހޭދަކުރެވުނު ވަގުތާއި ފޯނުބޭނުންކޮށްގެން ނުވަތަ އެނޫންވެސް ގޮތަކުން ޛިކުރުކުރި އަދަދުވެސް ނިކަން ބުނެބަލާށެވެ!
މީސްތަކުންނޭވެ! ކޮންމެ ދުވަހަކުވެސް އެމީހަކަށް ކުރެވުނު ޢަމަލުތަކުގެ ހިސާބު ބަލައި އިޞްލާޙްކުރަންޖެހޭ ކަންކަން އިޞްލާޙްކުރުމަށާއި ފުރިހަމަނުކުރެވިހުރި ކަންކަން ފުރިހަމަނުކޮށް ނުނިދަން ޢުމަރުގެފާނު އެހައިމިންވަރަށް ބާރުއެޅުއްވެވީ މިފަދަ ސަބަބުތަކަށްޓަކައެވެ.
ކަންކަން އިޞްލާޙްކުރުމަކީ އެމީހަކު އަމިއްލައަށް ކުރުމުން ނޫނީ ކުރެވޭނެ ކަމެއް ނޫނެވެ. ވީމާ އިޞްލާޙްވާން އެދޭ މީހާ ވަގުތު ބޭކާރުނުކޮށް ކަންކަން އިޞްލާޙްކުރާށެވެ! އިޞްލާޙްކުރަން ހިތްވަރު ލިބުމުގެ އެންމެ ބޮޑު އެއްބާރަކަށްވާނީ ކަމެއް ގޯސްކޮށް ކުރެވކަން ޤަބޫލުކުރެވުމެވެ. ކުށް ޤަބޫލުކުރެވުމެވެ.
- އިސްލާމީ ތިލަފަތުގެ ދަރުސަކުން
