މިއަދުގެ ޚުޠުބާ ޚާއްޞަކުރައްވާފައިވަނީ ނަޞްރުލިބުމުގެ މައްޗަށެވެ. ޚުޠުބާގައި ފާހަގަކޮށްފައިވަނީ ނަޞްރު ލިބުންވަނީ ﷲ އަށް ނަޞްރުދިނުމުން ކަމަށާއި ﷲ އަށް ނަޞްރުދިނުމަކީ ﷲ ގެ ދީނަށް ނަޞްރުދިނުން ކަމަށެވެ. އަދި ﷲ ގެ ދީނަށް ނަޞްރުދޭނަމަ އެމީހަކަށް، އެ ބައަކަށް ﷲ ނަޞްރުދެއްވަވާނެކަމެވެ.
ޚުޠުބާގައި ފާހަގަކުރައްވާފައިވަނީ ރަސޫލް ﷺ ހުންނެވީ ޙައްޤުގޮތުގައި ސާބިތުވެވަޑައިގެންކަމެވެ. ރަސޫލް ﷺ ގެ ސުންނަތަށް ފުރިހަމައަށް އަމަލުކުރުމުން ﷲ ނަޞްރު ދެއްވަވާނެކަމަށެވެ. އަދި އިސްލާމް ދީނަށް ނަޞްރުދިނުމަކީ ﷲ ގެ ޙުކުމްފުޅުތަކަށް ފުރިހަމައަށް ޢަމަލުކުރުން ކަމަށާއި އިސްލާމްދީނަށް ޢަމަލުކުރުމަކީ ފުރިހަމަގޮތުގައި ޤުރްއާނަށް އަމަލުކުރުން ކަމަށެވެ. ރަސޫލް ﷺ ގެ ސުންނަތަށް އަމަލުކުރުން ކަމަށެވެ.
ﷲ ގެ ދީނަށް ނަޞްރުދޭނަމަ އެބައަކަށް ﷲ ނަޞްރުދެއްވަވާނެ ކަމަށާއި ނަޞްރަށް އެދި އޮތީ ސަބަބުތަކުގައި ހިފަހައްޓައިގެން ތިބެ ދުޢާކުރުންކަން ޚުޠުބާގައިވަނީ ހާމަކުރައްވައިފައެވެ. ވީއިރު އެނގިގެން މިދަނީ ނަޞްރު ލިބުންވަނީ އިސްލާމްދީނުގެ އަދުއްވުންނަށް އަޅުވެތިނުވެ ފުރިހަމައަށް އިސްލާމް ދީނަށް ޢަމަލުކުރުމުން ކަމެވެ.
މިއަދުގެ ޚުޠުބާގައި މިކަންކަން ފާހަގަކުރައްވާފައިވާއިރު ފަހަކަށް އައިސް ރާއްޖޭގައި އަމަލުކުރަމުން ގެންދަނީ މިއިލްތިމާސް އާއި ދެކޮޅަށެވެ. ﷲ ގެ ދީނަށް ނަޞްރު ދިނުމުގެ ބަދަލުގައި ފެންނަމުން މިދަނީ އެކި ޤައުމުތަކާއި ޖަމާޢަތްތަކުން އަންގާ ގޮތަށް ކަންކަން ބަދަލުކޮށް އިސްލާމް ދީން ނިކަމެތިކުރަމުން ގެންދާތަނެވެ.
