ބައެއް މީހުން ބުނެއެވެ. "އަހުރެން ނަމާދުކުރަމެވެ. ޤުރްއާންވެސް ކިޔަވަމެވެ. އެކަމަކުވެސް ފާފަކުރެވެނީއެވެ." އެހެންކަމަށްވާނަމަ ވިސްނައިލަންވީ އެއކަމަކީ މިއާޔަތެވެ.
﴿يَهْدِي بِهِ اللَّهُ مَنِ اتَّبَعَ رِضْوَانَهُ سُبُلَ السَّلَامِ وَيُخْرِجُهُمْ مِنَ الظُّلُمَاتِ إِلَى النُّورِ بِإِذْنِهِ وَيَهْدِيهِمْ إِلَى صِرَاطٍ مُسْتَقِيمٍ﴾ [المائدة: 16]
މާނައީ: "ﷲ، އެއިލާހު ރުއްސަވާ މަގަށް ތަބާވީ މީހަކަށް ސަލާމަތުގެ މަގަށް އެފޮތުން މަގު ދައްކަވަތެވެ. އަދި އެއިލާހުގެ އިޛުނަފުޅުން އަނދިރިކަމުގެ ތެރެއިން އަލިކަމުގެ ތެރެއަށް އެބައިމީހުން ނެރުއްވައެވެ. އަދި ސީދާވެގެންވާ ތެދުމަގަކަށް އެބައިމީހުންނަށް މަގުދައްކަވައެވެ."
މިއާޔަތުން އެނގިގެން މިދަނީ ފުރަތަމަ ކަމަކީ ތިމާ ﷲ ތަޢާލާއަށް ތަބާވުންކަމެވެ. "ﷲ، އެއިލާހު ރުއްސަވާ މަގަށް ތަބާވީ މީހަކަށް ސަލާމަތުގެ މަގަށް އެފޮތުން މަގު ދައްކަވަތެވެ." އޮތުމުންނެވެ. އަދި " އެއިލާހުގެ އިޛުނަފުޅުން އަނދިރިކަމުގެ ތެރެއިން އަލިކަމުގެ ތެރެއަށް އެބައިމީހުން ނެރުއްވައެވެ. އަދި ސީދާވެގެންވާ ތެދުމަގަކަށް އެބައިމީހުންނަށް މަގުދައްކަވައެވެ." މިއޮތީ އެއިގެ ފަހަތުންނެވެ.
އެނގިގެން މިދިއައީ ފުރަތަމަ ކަމަކީ ތަބަޢަވާންވީ އެންމެ ފުރިހަަމަ ގޮތުގައި ﷲ ތަޢާލާއަށް ތަބަޢަވުންކަމެވެ. އެއީ އެންމެ ފުރިހަމަގޮތުގައި ﷲ ތަޢާލާއަށް ކިޔަމަންތެރިވެ ﷲ ތަޢާލާގެ އެންގެވުންތަކަށް އެންމެ ފުރިހަމަގޮތުގައި ޢަމަލުކުރުމެވެ. އެކަންކަން ފުރިހަމަކުރުމުން ހިދާޔަތު ނުލިބިއެއް ނުދާނެއެވެ! އިން ޝާ ﷲ
- އިސްލާމީ ތިލަފަތުގެ ދަރުސަކުން
