ބައެއް މީހުން ކަންކަމަށް ބޭނުންވުމުން އެކަން ސިއްރުކޮށްގެން ތިބެއެވެ. ނުވަތަ އެކަން ހާމަކުރަން ނުޖެހޭ މީހުންގެ ގާތުގައި ހާމަކުރެއެވެ. މި ދެގޮތްވެސް ރަނގަޅެއް ނޫނެވެ.
ތިބާ ޙާޞިލުކުރަން ބޭނުންވާ ކަންތައް އެއްވެސް މީޙަކަށް އަނގަން ބޭނުންނުވިނަމަވެސް ސިއްރުކޮށްގެން ނުހުންނާށެވެ! ވަގުތުން ﷲ ތަޢާލާއަށް ދަންނަވާށެވެ! އެ ސިއްރުވެސް ބޭޒާރެއް ނުވާނެތެވެ.
އިންސާނުންގެ ހިތަށް އަރާހައި ކަންކަމާ ބޭނުންވާހައިކަންކަން ﷲ ތަޢާލާ ދެނެވޮޑިގެންވެއެވެ. އެހެނަސް ﷲ ތަޢާލާ އެދިވޮޑިގަންނަވަނީ އަހަރެމެން އެދޭކަންކަން ހާމަކުރުމަށެވެ. އެކަންކަން ހިންމްވައި ދެއްވެވުން އެދި ދެންނެވުމަށެވެ. ދުޢާކުރުމަށެވެ. އެދޭކަންތަކުގެ ވާހަކަ އެއްވެސް މީހެއްގެ ގާތުގައި ނުބުނި ނަމަވެސް ބޭނުންވާ ކަންތަކަށް އެދި ދުޢާކުރަމުން ގެންދާށެވެ.
އެއްވެސް މީހަކު އެދޭ އެއްވެސް ކަމެއް އަދި ކިތަންމެ ގިނަ ބައަކު އެދޭ ކަންކަންވެސް ދުނިޔޭގެ އެންމެން އެދޭ ހުރިހާ ކަމެއް އެއްފަހަރާވެސް ފުއްދަވައިދެއްވަވަން ﷲ ތަޢާލާ ކުޅަދުންވަންތައެވެ. އަދި އެކަމުގެ ސަބަބުން ﷲ ތަޢާލާގެ ޚަޒާރާއިން ޛައްރެއްގެ މިންވަރު ވެސް މަދެއްވެސް ނުވާނެއެވެ. ވީމާ ކޮންމެ ކަމަކަށް ބޭނުންވި ނަމަވެސް ﷲ ތަޢާލާއަށް ދަންނަވާށެވެ. ޔަޤީންކުރަންޖެހޭ ކަމަކީ ކޮންމެ ކަމެއްވެސް ޙާޞިލުކުރެވޭނީ ﷲ ތަޢާލާ އެކަމެއް މިންވަރުކުރެއްވެވުމުންކަމެވެ.
ދެވަނަ ގޮތުގެ ނުބައިކަން އަދި މާބޮޑެވެ. ކިތަންމެ އިތުބާރުކޮށްފައި މީހަކުގެ ގާތު ބުނިނަމަވެސް އެކަން ސިއްރުނުވެދާނެއެވެ. އަދި ތިބާ ޙާޞިލުކުރަން ބޭނުންވި ކަންތައް ޙާޞިލުކުރަން އެހީތެރިވުމުގެ ބަދަލުގައި އެކަންވުމަށް ހުރި މަގުތައް ބަންދުވާފަދަ ކަމެއްވެސް ކޮށްފާނެއެވެ. އަދި ކީއްހެއްޔެވެ؟ ތިބާއަށްޓަކައި ހެޔޮ ދުޢާކުރުމުގެ ބަދަލުގައި އެސްފީނާވެސް ލައިފާނެއެވެ.
- އިސްލާމީ ތިލަފަތުގެ ދަރުސަކުން
