ބިރުވެތިވާންވީ އެއްވެސް އެހީތެރިއަކު ނެތި ތިމާއެކަނިމާއެކަނި ﷲ ތަޢާލާގެ ޙަޟްރަތުގައި ބިރުވެރިކަމުން ފުރިގެންވާ ޙާލުގައި ހުއްޓިހުންނަން ޖެހޭނެ ވަގުތަށެވެ. ދެވަނަ ފަރާތެއްގެ އެހީތެރިކަމަށް އެންމެ ބޮޑަށް ބޭނުންވާނީ އެވަގުތުގައެވެ.
އެވަގުތުގައި ތިބާގެ މައްޗަށް ޝަފާޢަތްތެރިވާނެ ފަރާތެއް ބޭނުންނަމަ ޤުރްޢާންކިޔަވާށެވެ! ޤުރްއާނަށް ޢަމަލުކުރާށެވެ! މަސައްކަތްބުރަ މީހުން ހަފްތާ ބަންދުގައި ނަމަވެސް ކީރިތި ޤުރްއާން ކިޔަވާށެވެ! މާނަދަސްކުރާށެވެ!
ޙަދީޘްފުޅުގައިވެއެވެ.
"ތިޔަބައިމީހުން ޤުރުއާން ކިޔަވާށެވެ. ފަހެ ހަމަކަށަވަރުން ޤިޔާމަތްދުވަހުން ޤުރުއާން އޭގެ އަހުލުވެރިންނަށް (އެ ކިޔަވާ، ދަސްކޮށް އެއަށް ޢަމަލުކުރިމީހުން) ޝަފާޢަތްތެރިއެއްގެ ގޮތުގައި އަންނާނެއެވެ." ޞަޙީޙް މުސްލިމް
"ޤުރުއާނުގެ އަހުލުވެރިޔާއަށް ޤިޔާމަތްދުވަހުން ބުނެވޭނެތެވެ. ތިބާ ކިޔަވާށެވެ. (އަދި ކިޔަވަމުން ސުވަރުގޭގައި) މައްޗަށް އަރާށެވެ. އަދި ތިބާ ދުނިޔެމަތީގައި ތަރްތީލްކޮށް ކިޔެވިފަދައިން ތަރްތީލްކޮށްކިޔަވާށެވެ. ސުވަރުގެއިން ތިބާއަށް ލިބޭ މަންޒިލަކީ ކިޔަވަމުން ކިޔަވަމުން މައްޗަށް އަރަމުން، އެންމެ ފަހުން ތިބާ ކިޔަވާ އާޔަތާއެކު ވާޞިލުވެވޭ ހިސާބެވެ." އަބޫ ދާވޫދު
ޤުރުއާން ހަޖުރުކުރުމަކީ ކީރިތި ޤުރުއާން ދޫކޮށްލުމެވެ. ކީރިތި ޤުރުއާން ދޫކޮށްލެވޭ ގޮތްތަކަކީ:
ކީރިތި ޤުރުއާން ކިޔެވުމާ ނުވަތަ އަޑުއެހުމާ ދުރުވެ ފަރުވާކުޑަކޮށް އެކަންކަން ކުރެވޭލެއް މަދުވުން، ނުވަތަ އެއްވެސް ގޮތަކަށް ކީރިތި ޤުރުއާން ނުކިޔެވުން ނުވަތަ އަޑު ނޭހުމާއި، ކީރިތި ޤުރުއާނާއި އެއްގޮތަށް ޙުކުމް ނުކުރުމާއި، ކީރިތި ޤުރުއާނުގެ މާނަ ދެނެގަތުމަށް މަސައްކަތްނުކުރުމާއި އަދި ކީރިތި ޤުރުއާނުން ޝިފާލިބިގަތުން ދޫކޮށްލުމެވެ.
