މިހާރުގެ ޚުޠުބާތަކުން އަބަދުވެސް އަޑުއިވެނީ ހަރުކަށިފިކުރުގެ މީހުންކުރާ ކަންކަމުގެ ވާހަކައެވެ. މަޑުކަށިފިކުރުގެ ވާހަކަ ދެކެވޭ އަޑެއް ނުއިވެއެވެ. މުސްލިމުންގެ ތެރެއިން ހިމެނޭ ބައަކު ހަރުކަށި ފިކުރުގެ އަމަލުތައް ކުރަމުން ގެންދިއުމުން ގެއްލުންތަކެއް ދަނީ ލިބެމުންނެވެ. ހަމައެއާއިއެކު މަޑުކަށިފިކުރުގެ މީހުންގެ ޢަމަލުތަކުން އިސްލާމް ދީނަށް ލިބެމުން އަންނަ ހީނަރުކަން އެތައް ގުނައަކަށް ވަނީ ބޮޑުވެފައެވެ.
އެކަމުގެ ހެއްކަކީ ހަރުކަށިފިކުރުގެ މީހުންގެ އަދަދަށްވުރެ މަޑުކަށި ފިކުރުގެ މީހުންގެ އަދަދު އެތައް ގުނައަކަށް މިހާރުވެސް އިތުރުވެފައިވާ ކަމެވެ. އެންމެ ބޮޑަށް ފާހަގަކުރަންޖެހެނީ ހަރުކަށިފިކުރު ކުށްވެރިކުރާފަދައިން މަޑުކަށިފިކުރު ކުށްވެރިކުރަން ބިރުގަނެ ޖެހިލުންވާކަމެވެ. ހަރުކަށި ފިކުރުގެ މީހުން ހިފައި ހައްޔަރުކުރާފަދައިން އަދި އަދަބުދޭފަދައިން މަޑުކަށިފިކުރުގެ މީހުންނާއިމެދު ފިޔަވަޅު ނުއެޅޭކަމެވެ.
ތަނެއްގައި ހަަމަޖެހުމާއި ޞުލްޙަމަސްލަޙަތު ޤާއިމުވެފައި އޮންނާނީ އަދުލު އިންޞާފު ލިބޭވަރަކުންނެވެ. އެއްބައަކަށް އަދަބުލިބިފައި އަނެއްބައަކަށް އަދަބު ނުލިބުމަކީ އެކަމާއިހުރެވެސް ބައަކު ރުޅިގަދަވާނެ ކަމެކެވެ. އިންޞާފު ހޯދަން ކުރިމަތިލާނެ ކަމެކެވެ. އެކަމަށް އޮތް ހައްލަކީ އިންޞާފު ޤާއިމުކުރުމެވެ. މިއީ ޤަބޫލުކުރަންޖެހޭނެ ކަންކަމެވެ.
އިސްލާމް ދީނުގެ އެންމެ މުހިންމު އަސާސަކީވެސް ޢަދުލު އިންޞާފު ޤާއިމުކުރުމެވެ. އިސްލާމް ދީނުގެ އެންމެ މުހިންމު މަޤްޞަދަކީވެސް ޢަދުލު އިންޞާފު ޤާއިމުކުރުންކަމުގައި ޢިލްމުވެރިން ބަޔާންކުރައްވަވައެވެ.
ވީމާ ހަރުކަށިފިކުރާއި މަޑުކަށިފިކުރުގެ ކަންކަން އެއް މިންގަނޑަކުން ނުމިނައި އިންޞާފުވެރިވެވޭނެކަމަކަށް ޤަބޫލެއް ނުކުރެވެއެވެ.
