ޙަދީޘްފުޅުން އެނގެން އޮތީ ފަރުޟު ނަމާދުތަކަށްފަހު އެންމެ މަތިވެރިވެގެންވާ ނަމާދަކީ ދަމު ނަމާދުކަމެވެ. މިހައި މަތިވެރި ދަރަޖައެއް ދަމުނަމާދަށް ލިބެނީ ކީއްވެގެންހެއްޔެވެ؟
ފުރަތަމަ ކަމަކީ ދަމުނަމާދަކީ ތިބާ ﷲ ތަޢާލާދެކެ ލޯބިވާ މިންވަރު އެންމެ ފުރިހަމައަށް އަނގައިދޭ ސަބަބުތައް ބައިވަރެވެ!
1 - ދަމުނަމާދަކީ ކުރަން އެންމެ އުނދަގޫ ނަމާދެވެ. އެހެނީ ދަމުނަމާދަށް ހޭލަނީ ނިދިން އެންމެ މުހިންމު އަދި އެންމެ އަރާމުބައި ޤުރްބާންކޮށްފައެވެ. ދަމުނަމާދަކީ ފަރުޟެއް ނޫނެވެ. މަތިވެރިކަންބޮޑު ސުންނަތެކެވެ. ވީއިރު ދަމުނަމާދަށް ހޭލާ މީހާ އެހޭލަނީ އެއްވެސް މަޖުބޫރުކަމެއް އޮވެގެނެއް ނޫނެވެ! ހަމައެކަނި ﷲ ތަޢާލާގެ ޙަޟްރަތަށް ހިތުގައި އޮތް ލޯބީގެ ބޮޑުކަމުންނެވެ!
2- ދަމުނަމާދަށް ހޭލާ މީހާ އެ އިޖާބަދެނީ މާކުރިން ﷲ ތަޢާލާ ވަޙީކުރައްވަވާފައިވާ ކަމަކަށްނޫނެވެ. އެންމެ ކުރީ ޒަމާނުންސުރެ ކާބަފައިން ކުރަމުން އަންނަ ނަމާދެއް ނަމަވެސް މިރޭ އެހޭލަނީ ހަމަ މިރޭ ﷲ ތަޢާލާ ވަޙީކުރައްވަވާ ބަސްފުޅަކަށް ޢިޖާބަ ދިނުމަށެވެ. "ތިމަން ﷲ ގެ ޙަޟްރަތުން ނިޢްމަތްތަކާއި ފާފަފުއްސަވައި ދެއްވެވުމަށް އެދެނީ ކޮންބައެއް ހެއްޔެވެ؟" ހަމަ އެރޭ ކުރައްވަވާ ސުވާލަށް ޖަވާބުދިނުމަށެވެ.
3 - އޭނާ އެދަންނަވަނީއެވެ! "ޔާ ﷲ! މިއަޅާ މިހުރީ ޙާޒިރުވެއެވެ. މިއަޅާގެ ފާފަތައް ފުއްސަވައި ދެއްވެވުމަށާއި މިއަޅާއަށް ބޭނުންވެފައިވާ ކަންކަން ފުއްދަވައި ދެއްވެވުން އެދި އިނބަ ﷲ ގެ ޙަޟްރަތުގައި އާދޭސްދަންނަވަމެވެ."
4 - މިފަދަ ސަބަބުތަކަށްޓަކައި އެމީހަކަށް ﷲ ތަޢާލާ ދެއްވަވާ ސަމާލުކަމާއި މަތިވެރި ދަރަޖަ ނިކަން ދެކިބަލާށެވެ. އެމީހަކަށްޓަކައި ފަޚުރުވެރިވެވޮޑިގެން ﷲ ތަޢާލާ ބަސްފުޅު ވަޙީކުރައްވަވައެވެ.
މިފަދަ އެތައްކަމެއްގެ ވާހަކަ ދެއްކިދާނެއެވެ. މިފަދަ ހުރިހާ ކަމަކުންވެސް އެނގިގެންދަނީ ދަމުނަމާދުކުޜާ މީހާ އާއި ﷲ ތަޢާލާ އާއިދެމެދުގައި އުފެދިގެންދާ ގުޅުމުގެ މަތިވެރިކަމެވެ. އެފަދަ މަތިވެރި ގުޅުމެއް އުފެދުމުން އެމީހަކަށް ދެދުނިޔޭގައިވެސް ޙާޞިލުނުކުރެވޭނީ ކޮންކަމެއް ހެއްޔެވެ؟
މީސްތަކުންނޭވެ! ފުރަތަމަ ކަމަކަށް ތިމާއަކީ ދަމުނަމާދުކުރާ މީހަކަށްވާށެވެ! ތިބާ އެދޭ ހުރިހާ ކަމެއްވެސް ﷲ ފުރިހަމަކުރައްވަވައި ދެއްވަވާނެތެވެ! އިން ޝާ ﷲ
- އިސްލާމީ ތިލަފަތުގެ ދަރުސަކުން
