ކީރިތި ޤުރްއާނުގެ 39 ވަނަ ސޫރަތުގެ ނަމަކީ الزمر "އައްޒުމަރު" އެވެ. މާނައަކީ ފައުޖުތަކެވެ. ވީމާ މިކަންމިވާގޮތާއިމެދު ވިސްނައިލަމާހެއްޔެވެ؟
މީސްތަކުން ސުވަރުގެ ވައްދަވާނީވެސް ފައުޖުތަކަށެވެ. ނުވަތަ ގްރޫޕުތަކަށެވެ. އެމީހަކު ދުނިޔޭގައި އުޅުނުއިރު ކުޅަ ޢަމަލުތައް ކުޅަ ހެޔޮލަފާ މީހުންގެ ފައުޖުތަކުގައެވެ. އެމީހާގެ ގާތް މިތުރުން ކަމުގައި ބެލިމީހުންގެ ފައުޖުތަކާއިއެކުގައެވެ.
ހަމައެފަދައިން މީސްތަކުން ނަރަކައަށް ވައްދަވާނީވެސް ހަމައެފަދައިންނެވެ. އެމީހަކު އެކުގައި އުޅުނު، އެމީހާ ކުރި ނުބައި ޢަމަލުކުރި މީޙުންގެ ފައުޖުތަކާއިއެކުގައެވެ.
މީސްތަކުންނޭވެ! ﷲ ތައާލާއަށް ނުކިޔަމަންތެރިވެ ނުބައި އަމަލުތައްކުރާ މީޙުންނާއިއެކުގައި ދުނިޔޭގައި ނުއުޅެންވީ މި ސަބަބަށްޓަކައެވެ. އެކަމުގެ ސަބަބުން އެމީހުންނާއިއެކު ނަރަކައަށް ވަންނަން ޖެހިދާނެކަމުގެ ބިރު ބޮޑުކަމުންނެވެ. ހަމައެފަދައިން ހެޔޮ ޢަމަލުތައްކުރާ ޞާލިޙުންނާއިއެކު އުޅެންވީވެސް މި ސަބަބަށްޓަކައެވެ. އެމީހުންނާއިއެކު ސުވަރުގެ ވަނުމުގެ އުންމީދުގައެވެ.
- މުފްތީ މެނކުގެ ދަރުސަކުން
