ކީރިތި ޤުރްއާން ކިޔަވަން އިންނައިރު ކައިބޮއިނުހަދާށެވެ! އެހެނީ އެކަމުގެ ސަބަބުން ކީރތި ޤުރައާނަށްދޭންޖެހޭ ސަމާލުކަން ކުޑަވެގެންދާނެއެވެ. ނަމަވެސް ކިޔަވަން އިންނަ މީހާ ކަރުހިއްކައިގެންފިނަމަ ފެންފޮދެއް ބުއިލުމަކީ އެންމެ ރަނގަޅުކަމެކެވެ. އެއީ ކައިބޮއިހެދުން ކަމަކަށް ނުވާނެއެވެ.
ބަނޑުހައިވެއްޖެނަމަ ތެދުވެ ތައިބޮއިހެދުމަކީ ހުއްދަކަމެކެވެ. އެކަންކަން ކުރުމަށްފަހު އަލުން ކިޔަވަން ފަށާނީއެވެ.
ކީރިތި ޤުރްއާން ކިޔަވާއިރު އެންމެ މުހިންމު ކަމަކީ ކިޔަވާ އެއްޗަކަށް ސަމާލުކަން ދިނުމެވެ. ސަމާލުކަންދިނުމަކީ އަޑުއެހުމެވެ. ކިޔެވޭ އެއްޗަކާއިމެދު ވިސްނައި ފިކުރުކުރުމެވެ. އަދި އަޑުއިވޭ ހިސާބުގައި ތިބޭ މީހުންވެސް ހަމަމިފަދައިން ސަމާލުކަންދޭންވާނެއެވެ. އަޑުއަހައި ސަމާލުކަން ދިނުމަކީ ވެސް ޘަވާބު ދެއްވަވާ އަޅުކަމެކެވެ.
ކީރިތި ޤުރްއާނުގެ ރެކޯޑިންގ އަޑުއެހުމަކީވެސް އަޅުކަމެކެވެ. ރެކޯޑިންގ ޖަހާފައި ހުންނަ ތަނތަނުގައިވެސް މިބުނިފަދައިން ސަމާލުކަންދޭންވާނެއެވެ. ރެކޯޑިންގ ޖަހައިގެންތިބެ އެތަނުގައި ކުޅިވަރުކުޅުމާއި ބާރަށް އަޑުގަދަކުރުމާއި ހީނސަމާސަކުރުން ފަދަ ކަންކަންކޮށްގެން ނުވާނެއެވެ.
ކީރިތި ޤުރްއާނަކީ ﷲ ތަޢާލާގެ ވަޙީ ބަސްފުޅެވެ. ވީމާ ސަމާލުކަންދޭންޖެހޭނީ ހަމައެކަނި ކިޔަވާ މީހާއެއް ނޫނެވެ. އަޑުއިވޭ އެންމެންވެސް ސަމާލުކަންދޭންވާނެއެވެ.
- މަސްދަރު: އިސްލާމް ދީނާއިމެދު ސުވާލުތައް
