މީހަކު ﷲ ތަޢާލާ ނަހީކުރައްވަވާފައިވާ ބޮޑެތި ފާފަތަކަށް އަރައިގަންނަ ނަމަ އެކަމުން އެނގެނީ އެމީހަކަށް ﷲ ތަޢާލާ އާއި ކުއްތަންވުމަށް ދެއްވެވި ފުރުޞަތު ދޫކޮށްލައި އޭނާގެ އަމިއްލަ އެދުންތައް ފުއްދަމުން ގެންދާކަމެވެ. އެފަދަ ޙާލަތުގައި އެމީހަކަށް އެކުރެވޭކަމަކީ ﷲ ތަޢާލާ ދޫކޮށްލައި އޭނާގެ އަމިއްލަ އެދުންތަކަށް އަޅުކަންކުރުމެވެ.
ޢުޘްމާންގެފާނު ވިދާޅުވެފައިވަނީ އީމާންކަމާއި ބަނގުރާބުއިން އެއް ހިތެއްގައި ނުބޭއްވޭނެ ކަމަށެވެ. މާނައަކީ ފުރިހަމަގޮތުގައި ﷲ ތަޢާލާއަށް އީމާންވެގެން ހުރި މީހަކު ބަނގުރާ ނުބޯނެކަމެވެ.
ރަސޫލް ޙަދީޘްފުޅެއްގައިވެއެވެ. "ދޮގުހަދާމީހާގެ، އިތުބާރު ނުކުރެވޭ މީހާގެ އީމާންކަމެއް ނެތެވެ!"
މާނައަކީ ދޮގުބުނުމަކީ އީމާންކަން ގެއްލިގެންދާ ކަމެއްކަމެވެ. ވީމާ ދޮގުބުނުމަކީ ކުރަން ފަސޭހަ ފާފައެއް ނަމަވެސް ދޮގުހަދާ މީހުން އެދަނީ އީމާންކަމުން ބޭރުވެގެންނެވެ. ވީއިރު އެއީ ކުޑަފާއެއް ކަމަށް ޤަބޫލުކުރަން ހެޔޮވާނީ ކިހިނަކުންހެއްޔެވެ؟
- އިސްލާމީ ތިލަފަތުގެ ދަރުސަކުން
