ދިރިއުޅުމުގައި ކަންކަން ދިމާވާގޮތުން ތިމާއަށް މިހުރެވެނީ އެއްވެސް އަލިކަމެއް ނެތް އަނދިރި ހޮހޮޅައެއްގައިކަމަށްވެސް ހީކުރެވިދަނެއެވެ. ނުކުންނަން ނުވަތަ ސަލާމަތްވާން ދާންވީ ދިމާއެއް ނުއެނގި ކަންބޮޑުވުންތަކުން ފުރިގެން ހިނގައިދާނެއެވެ!
ޔަޤީންކުރަންވީ ކަމަކީ އެ އަނދިރިކަން މިންވަރުކުރެއްވެވީވެސް ﷲ ތަޢާލާ ކަމާއި ފިއްލަވައިދެއްވަވާނީވެސް ހަމަ ﷲ ތަޢާލާ ކަމެވެ. އަދި ފިއްލަވައި އަލިކަމުގެތެރެއަށް ގެނެސް ދެއްވަވާނެ ކަމެވެ. ﷲ ތަޢާލާއަށް އިތުބާރުކުރުމާއި ވަކީލްކުރުމަކީ އެއީއެވެ.
ކިތަންމެ ބޮޑު އަނދިރިކަމެއް، ނުވަތަ ކިތަންމެ ބޮޑު ޠޫފާނެއް ތިމާ ވަށައިލި ނަމަވެސް ކަންބޮޑުނުވާށެވެ! އެހުރިހާ އެއްޗަކީވެސް ހަމަ ﷲ ތަޢާލާގެ މަޚްލޫޤުންނެވެ. އެއިގެ އަމިއްލަ ޒާތުގައި އެއްވެސް ބާރެއް ލިބިގެންވާ ހަމައެކައްޗެއްވެސް ނުވެއެވެ. ވީމާ ﷲ ތަޢާލާ މިންވަރުކުރެއްވެވި ޙާލަތެއް ނޫނީ މެދުވެރިއެއް ނުވާނެއެވެ!
މުސްލިމުންނަށް ﷲ ތަޢާލާވަނީ އެފަދަ ހުރިހާ ކަންކަމުން ސަލާމަތްވުމުގެ އައްޑަނަ ދެއްވަވައިފައެވެ. އެ އައްޑަނައިގައިވަނީ 4 ބައެކެވެ. އެއީ ކެތްތެރިކަމާއި ﷲ ތަޢާލާއަށް ފުރިހަމަގޮތުގައި ވަކީލުކުރުމާއި ނަމާދުކުރުމާއި ދުޢާކުރުމެވެ. މި 4 ބައި ފުރިހަމަ އައްޑަނައަކުން ދިފާޢު ނުކުރެވޭނެ އެއްވެސްކަމެއް ނުވެއެވެ. އަދި ސަލާމަތްނުވެވޭނެ އެއްވެސް ކަމެއް މެދުވެރިއެއް ނުވާނެއެވެ.
ﷲ ތަޢާލާއަށް ފުރިހަމަގޮތުގައި ވަކީލްކުރުމާއިއެކު ކެތެރިވެހުރެ އެންމެ ނަމާދަކަށްފަހު ކުރާ އެންމެ ދުޢާއަކުން ވެސް ތިބާއަށް ކުރިމަތިވެފައިވާ ހުރިހާ މައްސަލަތަކެއް ޙައްލުވެގެން ހިނގައިދާނެއެވެ. އެކަމުގެ ޔަޤީންކަމުގައި ހުންނަ މީހާއަށް އަބަދުވެސް ﷲ ތަޢާލާ ކަންކަން ފަހިކުރައްވަވައި ދެއްވަވާނެތެވެ! އިން ޝާ ﷲ
- މުފްތީ މެންކުގެ ދަރުސަކުން
