ކުރީ ދުވަހެއްގައި ދިން ދަރުސެއްގައި ވަޒީފާ ނުލިބި ލަސްވާނަމަ ﷲ ތަޢާލާގެ ރުހިވޮޑިގަތުން ހޯދަން ގަދައަޅައި މަސައްކަތްކުރަން ބުނުމުން ބައެއް މީހުން ތަފާތު ކޮމެންޓްތައްކޮށްފައި އެބަހުއްޓެވެ. އެހެންކަމުން އެހެން ބުނަންޖެހޭ ސަބަބު ކުޑަގޮތަކަށް ބުނެލާނަމެވެ.
ތިބާގެ ރަޙްމަތްތެރިޔާއަކީ އަމިއްލަ ކުންފުންޏެއް ހިންގާ މީހެކެވެ. ނުވަތަ އޭނާ ބޭނުން މީހަކަށް ވަޒީފާ ދިނުމުގެ ފުރުޞަތު ލިބިގެންހުރި މީހެކެވެ. އެފަދަ ރަޙްމަތްތެރިއެއްގެ ގާތުގައި ވަޒީފާއަކަށް އެދުމުން ތިބާއަށް ވަގުތުން ވަޒީފާ ނުދޭނެ ހެއްޔެވެ؟ ނުވަތަ ތިބާއަށް އެ ފުރުޞަތުތައް ލިބިފައިވަނިކޮށް ތިބާގެ ގާތް ރަޙްމަތްތެރިއަކު އައިސް ވަޒީފާއަކަށް އެދުމުން ވަޒީފާ ނުދޭނަން ހެއްޔެވެ؟
ﷲ ތަޢާލާއީ ކޮންމެކަމަކަށް ކުލދުންވަންތަ ރަސްކަލާނގެއެވެ. އެކަލާނގެ މިންވަރު ކުރެއްވެވި ނިޢްމަތެއް ނޫނީ އެއްވެސް މީހަކަށް ލިބުމެއް ނެތެވެ. އެކަލާނގެ ކުރިމަތި ކުރެއްވެވި ކަމެއް މެނުވީ ކުރިމަތިވުމެއްވެސް ނެތެވެ. އެއީ ވަޒިފާއެއް ލިބުން ނަމަވެސްމެއެވެ. އަދި ވަޒީފާއެއް ގެއްލުންކަމުގައިވީނަމަވެސްމެއެވެ.
ވީމާ ކޮންމެ ކަމެއްވެސް ޙާޞިލުކުރަން އޮތް މަގަކީ ހަމަ ﷲ ތަޢާލާ އާއި ގުޅުން ބަދަހިކުރުމެވެ. އެކަމަށް އެދޭ މީހާއަށް އޮތީ ﷲ ތައާލާގެ ރުހިވޮޑިގަތުން ހޯދަން މަސައްކަތްކުރުމެވެ. ﷲ ތަޢާލާ އާއި ކުއްތަންވުމަށް މަސައްކަތްކުރުމެވެ. އެކަންކަން ޙާޞިލުކުރެވޭނީ ﷲ ތަޢާލާއަށް ކިޔަމަންތެރިކަން އަދާކުރިވަރަކުންނެވެ. ތަޤްވާވެރިކަން އިތުރުކުރިވަރަކުންނެވެ.
ވަޒީފާއަކީ ތިމާގެ ރިޒުޤާއި ގުޅިފައިވާ ކަމެކެވެ. ވީމާ ވަޒީފާ ނުލިބި ލަސްވާނަމަ އެއީ ލިބޭ ވަރަށް ދެރަ ނިކަމެތިކަމެކެވެ. ވަޒީފާ ލިބުން އަވަސްވުމަށް އަދި ރަނގަޅު ވަޒީފާއެއް ލިބުމަށް އެދޭމީހާ ކުރިން ބުނިމަގުން ކަންކަންކުރާށެވެ! ދުޢާކުރުނަ ގިނަކުރާށެވެ! ﷲ ތަޢާލާ އެމީހަކަށް ކަންކަން ހިންމަވައިދެއްވަވާނެތެވެ. އިން ޝާ ﷲ
- މުފްތީ މެންކުގެ ދަރުސަކުން
