ﷲ ތަޢާލާ ނިޢްމަތްތައް މިންވަރުކުރެއްވެވުމުން އެ ނިޢްމަތްތައް ލިބުނު ގޮތް ގިނަ ބައަކު ހަނދާން ނެތެއެވެ. އެއީ ތިމާގެ މޮޅުކަމާއި ތިމާގެ ކުޅަދާނަކަމުން ހޯދި ކަންކަންކަމުގައި ޤަބޫލުކުރެވެއެވެ. އަދި ދުނިޔޭގައި ދިރިއުޅުމުގެ ޙަޔާތަކީ ތިމާ ޭނުންހައި ގޮތަކަށް ބައްތަން ކުރެވިދާނެ އެއްޗެއްކަމަށް ޤަބޫލުކުރެވެއެވެ. މިހުރިހާ ކަންކަން މިހެންވަނީ ތިމާމެން އެދޭހައި ކަންކަން ﷲ ތަޢާލާ ހިންމަވައި ދެއްވަވާތީއެވެ!
މިހާރު މުޅި ދުނިޔެއަށް ކުރިމަތިވެފައިމިވާ ކޮރޯނާ ވައިރަސް އަންގައިދިން އެއްކަމަކީ އިންސާނުންނަކީ އެއްވެސް އަމިއްލަ ބާރެއް ހުރި ބައެއް ނޫންކަމެވެ. އެކަލާނގެ ދެއްވެވި ކޮންމ ނިޢްމަތެއް، ކޮންމެވަގުތަކުވެސް އަނބުރާ ގެންދެވުމަށް އެކަލާނގެ ކުޅަދުންވަންތަވެވޮޑިގެންވާ ކަމެވެ. އަދި ކޮންމެ ނިޢްމަތަކީވެސް އެކަލާނގެ ދެއްވަވާ ކަންކަން ކަމެވެ.
ކޮރޯނާ ވައިރަސް އަނގައިދިނީ މީސްތަކުންނަށް ދެއްވެވި ނިޢްމަތްތަކަށް ޝުކުރުވެރިވާންޖެހޭކަމެވެ. ޝުކުރުވެރި ނުވެވޭނަމަ އެކަމުގެ ރަހަ ލިބިގަންނަން ޖެހޭނެ ކަމެވެ. ބައެއް ޤައުމުތަކުގައި މިހާރު ދަނީ ކަންކަން ރަނގަޅު ޙާލަތަށް ބަދަލުވަމުންނެވެ. އެއީ އެކަލާނގެ ހާލަތު ބަދަލުކުރައްވަވައި ދެއްވަވާތީއެވެ. އެ ޤައުމެއްގެ މީހުންގެ ކުލަދާނަކަމަކުންނޫނެވެ. ނޫންނަމަ ދުނިޔޭގެ އެންމެ ބޮޑެތި ބާރުތަކަށް އެޤަުމުތައް ކޮރޯނާ ވައިރަސްއިން ސަލާމަތްކުރެވުނީސް ނޫން ހެއްޔެވެ؟ އެމެރިކާ، އިންޑިއާ، ޔޫރަޕްގެ ޤައުމުތައް ފަދަ ބާރާއި ތަނަވަސްކަން ލިބިގެންވާ ޤައުމުތަކަށް މިހައިދުވަސްވީއިރުވެސް ބަލިން އަރައިނުގަނެވިގެން އުޅޭކަސް ނުޖެހުނީސް ނޫންހެއްޔެވެ؟
ވީމާ ކޮންމެ މީހަކުވެސް ކޮރޯނާ ދިން މިވަރުގަދަ މެސެޖުން ދިރިއުޅުމުގެ ހުރިހާ ކަމެއްގައިވެސް ޢިބްރަތް ޙާޞިލުކުރާށެވެ! ކާމިޔާބާއި ފަލާޙް ލިބުންވަނީ އެއިރުންނެވެ!
- އިސްލާމީ ތިލަފަތުގެ ދަރުސަކުން
