ރޭގަނޑު ލަހުން ނިދުމަކީ އެމީހަކު އަމިއްލައަށް ޤަޞްދުގައިކުރާކަމެކެވެ. ނުނިދައި ވަގުތުތައް ބޭކާރުކުރަނީ އަމިއްލައަށެވެ. ފަތިސްނަމާދަށް ހޭލަންޖެހޭނެކަމާއި ހޭލެވޭނީ އަވަހަށް ނިދުމުންކަން އެނގޭއިއރުވެސް ޓީވީ ބެލުމަށާއި ކުޅިވަރުކުޅެން، ފޯނާއިކުޅެން ވަގުތު ހޭދަކުރަނީ އަމިއްލައަށެވެ.
މިފަދަ މީހުންނަށް ފަތިސްނަމާދަށް ނުހޭލެވުނު ސަބަބު ބަޔާންކޮށް ޤިޔާމަތްދުވަހު ﷲ ތަޢާލާއަށް ދެއްކޭނީ ކޮން ޢުޒުރެއްހެއްޔެވެ؟ އެއްވެސް އުޒުރެއް ނުދެއްކޭނެއެވެ. ޤަޞްދުގައި ފަތިސްނަމާދު އެޅިކަމުގެ ފާފަ އުފުލަންޖެހުން ނޫން އެއްވެސް ގޮތެއް ނުއޮންނާނެއެވެ.
ހެއްވާކަމަކީ މިފަދަ މީހުން އެބަބުނެއެވެ. "އިސްލާމް ދީނުގެ ޢަދާވާތްތެރިން ބަލިކުރާނަމެވެ. އިސްލާމް ދީނަށްޓަކައި ފިދާވާނަމެވެ."
ބަލަ ކުރަން ތިއަބުނާ ހުރިހާ ކަންކަމަށްވުރެ ފަތިސްނަމާދަށް ތެދުވެ ފަތިސްނަމާދުކުރުން މާމުހިންމެވެ. ފުރަތަމަކަމަށް ކުރަންވީ ފަތިސްނަމާދުނޫންހެއްޔެވެ؟
އިސްލާމް ދީނުގެ ކަންކަން އުނގެނެން ޝައުޤުވެރިވާ ޒުވާނުން ވަރަށް ގިނައެވެ. ދަނީވެސް ގިނަވަމުންނެވެ. ނަމަވެސް ފަތިސްނަމާދުކުރާ ޒުވާނުން މިދަނީ މަދުވަމުންނެވެ. ނަމާދުނުކުރާނަމަ ދީނުގެ ކަންކަން ދަސްކުރުމުން ކުރާނީ ކޮންފައިދާއެއް ހެއްޔެވެ؟ އެންމެ ފުރަތަމަ ކަމަކީ ނަމާދުކުރުން ނޫންހެއްޔެވެ؟ ފަތިސްނަމާދުން ދުވަސްފެށުން ނޫންހެއްޔެވެ؟
ލޮބުވެތި އަޚުންނާއި އުޚުތުންނޭވެ! ދީން އުނގެނުމަކީ ކިތަންމެ މަތިވެރި އަޅުކަމެއް ނަމަވެސް ދީން އުނގެނުމަކުން އެކަނި ސުވަރުގެއެއް ނުދެވެއެވެ. ސުވަރުގެ ވައްދަވަނީ ދީނަށް ޢަމަލުކުރުމުންނެވެ! 4 އިމާމުންގެ ދުވަސްވަރުގައި އެބޭކަލުންގެ ދަރިވަރުން ދަމުނަމާދުނުކުރާނަމަ އެއީ ސުވާލުކުރައްވަވާ ކަމެވެ. ކަންބޮޑުވެވަޑައިގަންނަވާ ކަމެކެވެ. މިއަދު މިދައްކަނީ ފަރުޟު 5 ނަމާދުނުކުރާކަމުގެ ވާހަކައެވެ. އެކަމާއި ކަންބޮޑުވާބައަކު ނެތުމަކީ ފަރުޟޫކަމުން ބައެއް އުނިވާނެ ސަބަބެއް ނޫނެވެ! މިއަދުވެސް ފަރުޟުތައް އޮންނާނީ ހަމައެންމެކުރިންވެސް އޮތްފަދައިން ފަރުޟުގެ ގޮތުގައެވެ. މާދަމާވެސްމެއެވެ!
ވީމާ ފުރަތަމަކަމަކަށް ފަރުޟު ނަމާދަށް ރައްކައުތެރިވާށެވެ!
- އިސްލާމީ ތިލަފަތުގެ ދަރުސަކުން
