މިހާރަކަށް އައިސް މިފެންނަނީ ގިނަބައަކު އެންމެ ބޮޑަށް ކަންބޮޑުވާކަމަކީ ކޮރޯނާ މާސްކް ނުއެޅުންކަމުގައިވެގެން ފައެވެ. މޫނުގަ މާސްކެއް ޖީބުގަ މާސްކެއް ގެންގުޅޭ މީހުންވެސް މަދެއް ނޫނެވެ. މާސްކްނާޅައި ހުރި މީހަކު ފެނިއްޖެނަމަ އެމީހަކާއި ކައިރިވާންވެސް ބިރުގަނެއެވެ. އެމީހަކު ހިނގާ މަގަކުން ހިނގަންވެސް ބިރުގަނެއެވެ.
އެފަދަ މީހުން މިއަދު އެކަންބޮޑުވަނީ އެމީހުންގެ އަމިއްލައަތުން އަޅާ މާސްކެއް ނުއެޅިދާނެތީއެވެ. އަޅައިގެން ހުންނަ މާސްކަށް ކަމެއްވެދާނެތީއެވެ. ޑޮކްޓަރުން ބުނާ ބަސް ޤަބޫލުކުރަން ތިއަމާސްކަށް ވެސް ސަމާލުކަން ދޭށެވެ! ނަމަވެސް ކޮށްލަން މިޖެހޭ ސުވާލަކީ ބަލިތަކާއި ތިބާއާއި ޑޮކްޓަރުންވެސް އުފެއްދެވި ﷲ ތަޢާލާ ތިބާއަށް ދެއްވަވާ އިންޒާރުތަކަށްވުރެ، ކީރިތި ޤިރްއާނުގައިވާ ވަޙީބަސްފުޅުތަކަށްވުރެ ޑޮކްޓަރުން ބުނާބަހަށް ދޭސަމާލުކަން ބޮޑުވަނީ ކީއްވެގެން ހެއްޔެވެ؟
މީސްތަކުންނޭވެ! ބިރުވެތިވާންވީ ތިބާގެ އެއްވެސް ބާރެއް ނެތި، އެއްވެސް ޙަރަކާތެއް ނެތި، އަނގައިންވެސް ނުބުނެވި އޮންނަންޖެހޭނެ ދުވަހު އެހެން މީހުން ތިބާ މާސްކުއަޅުވާނެތީއެވެ! މޫނުގައި އެކަންޏެއް ނޫނެވެ! މުޅިހަށިގަނޑުގައެވެ. އެންމެ މާސްކެއްވެސް ނޫނެވެ. މަތިމައްޗަށް 3 އެވެ.
މިބުނަނީ ހަމަ ކޮންމެ ކޮންމެ ވަގުތަކު ކޮންމެ މީހަކުވެސް މަރުވެދާނެއެވެ. އެކަމުގެ އިންޒާރު ﷲ ތައާލާ ވަނީ ކީރިތި ޤުރްއާނުގައި އެތައްފަހަރަކު ދެއްވަވައިފައެވެ. އެކަމުގެ އިތުރު އިންޒާރުތައް ކެނޑިނޭޅި ކޮންމެ ދުވަހަކުހެން ގެންދަވަނީ ދެއްވަވަމުންނެވެ. ބިރު ނުގަންނަނީ ކީއްވެގެން ހެއްޔެވެ؟ ޑޮކްޓަރުން ބުނާ ބަހަކަށް ތިއަވަރަށް ބިރުގަންނައިރު ﷲ ތައާލާގެ ބަސްފުޅުތަކާއި ކޮންމެ ދުވަހަކު ދައްކަވާ ކަންކަމަށް ބިރުނުގަންނަނީ ކީއްވެގެންހެއްޔެވެ؟ މޫނުމަތީގައި އަޅާ ކުޑަކުޑަމާސްކެއްގެ ބަދަލުގައި މުޅި މޫނުގައި ފޮތިއެޅި ކަފުން ކުރެވޭނެ ވަގުތަށް ބިރުނުގަންނަނީ ކީއްވެގެން ހެއްޔެވެ؟
ޑޮކްޓަރުން ބުނާތީ ބަސްއަހަން މާސްކްއަޅާށެވެ. ނަމަވެސް ކުރިން މިބުނިފަދައިން ބޮޑަށް ބިރުވެތިވާންވީ ތިމާގެ މުޅިމޫނާއި ހަށިގަނޑުގައި ތިބާގެ އަމިއްލަ އެއްވެސް ބާރެއް ނެތި އެހެން ބައަކު މާސްކްއަޅުވާނެ ދުވަހަށެވެ. ކަފުންކުރެވޭނެ ދުވަހަށެވެ!
- އިސްލާމީ ތިލަފަތުގެ ދަރުސަކުން
