މިއަދުގެ ހުކުރު ޚުޠުބާ ނަމާދުކުރުމުގެ މުހިންމު ކަމުގެ މައްޗަށް ޚާއްޞަކޮށްފައިވާއިރު ނަމާދަށް ބަންގިގޮވުމުން ހޮޓާތަކާއި ފިހާރަތަކުގައި މީހުން ތިބޭ ވާހަކަ އެކަނި ގެނެސްފައިވާތީ ގިނަބައަކު ގެންދަނީ ކަންބޮޑުވުން ފައުޅުކުރަމުންނެވެ.
ބައެއް މީހުން ބުނެފައިވަނީ ނަމާދަށް ބަންގިގޮވުމުން ބަންދުކުރަންޖެހޭނީ ވަކި ވިޔަފާރިތަކެއް ނޫންކަމަށާއި ހުރިހާ މަސައްކަތްތަކެއްވެސް ބަންދުކުރެވެން ޖެހޭނެ ކަމަށެވެ. އެގޮތުން ސަރުކާރުގެ އޮފީސްތަކާއި އަމިއްލަ އޮފީސްތަކުގައި މަސައްކަތްކުރާ މުސްލިމް ހުރިހާ މުވައްޒިފުންނަށް ނަމާދަށް ދެވޭނެގޮތް ހަަމަޖައްސަން ޖެހޭނެ ކަމަށެވެ.
ޚާއްޞަކޮށް ރައްޔިތުންގެ މަޖިލީހަކީ ރޭގަނޑު ދަންވަރުވެސް ބައްދަލުވުންތައް ކުރިއަށް ގެންދާ މަޖިލީހެއްކަމާއި ބަންދުކުރާ ވަކިގަޑިއެއް ނުއޮންނައިރު ނަމާދުވަގުތައް މެދުކަނޑާނުލައި ބައްދަލުވުންތައް ކުރިއަށް ގެންދަނީ އިސްލާމް ދީނުގައި ނަމާދުކުރުމަށް އޮތް ގޮތާއި މުޅިން ޚިލާފަށް ކަމަށްވެސް ގިނަބައަކު ބުނެފައިވެއެވެ.
"ދީނީ ކަންކަން ރައްޔިތުން ބަލައިގަންނަމިންވަރު ބޮޑުވާނެ މަތިން ތިރިއަށް ދީނުގެ އޮތް އުޞޫލުތަކަށް ޢަމަލުކުރުމުން. މިއީ ހަމަ އެންމެންވެސް ޤަބޫލުކުރާ ކަމެއް. ރަސޫލް ﷺ އާއި ޞަހާބީން ނަމޫނާ ދެއްކެވީ އެގޮތަށް" ކަމަށްވެސް ބައެއް މީހުން ބުނެފައިވެއެވެ.
