މިދުވަސްވަރަށް ބަލައިފިނަމަ މިއީ ފަހުގެ ތާރީޚުގައި އެންމެ ގިނަބައަކަށް މާލީ ދަތިތައް ކުރިމަތިވެފައިވާ ދުވަސްވަރެވެ. މީގެ އަހަރެއްހައި ދުވަސްކުރިން ކޮރޯނާ ވައިރަސް ފެތުރެން ފެށިއިރު މި ކުރިމަތިވި ކިހައި ބޮޑުވަބާއަކަށްވެދާނެކަން މީސްތަކުންގެ ޚިޔާލަށްވެސް ގެނެވިފައެއް ނުވެއެވެ. ނަމަވެސް މިއަދު މިވަނީ މުޅި ދުނިޔެއަށް ބޮޑުވަބާއަކަށްވެނިމިފައެވެ.
ދުނިޔޭގެ އެންމެ މުއްސަނދި ޤައުމުތަކުގެ އިޤްޠިޞާދު އިނދަޖައްސުވާލައިފިއެވެ. އެންމެ ބޮޑެތި އެތައް ސަތޭކަ ކުންފުނިތަކެއް ބަނގުރޫޓުވެއްޖެއެވެ. ބަނގުރޫޓުވި ކުދި ވިޔަފާރިތަކުގެ އަދަދު އެތައް މިލިއަނަކަށް މިހާރުވެސް އަރައިފިއެވެ. އަދި މިހާރުވެސް ދަނީ އިތުރު ވިޔަފާރިތައް ބަނގުރޫޓުވަމުންނެވެ.
ނަތީޖާއަކީ އެތައް މިލިއަން ރައްޔިތުންނަށް މާލީ ދަތިތައް ކުރިމަތިވުމެވެ. ދިރިއުޅުމަށް ތަފާތު ހުރަސްތައް ކުރިމަތިވުމެވެ. ފަޤީރު ޙާލުގައި ދިރިއުޅެންޖެހުމެވެ. ވީމާ މިއީ ލިބޭ އާމްދަނީ އާއިމެދު އެންމެ ބޮޑަސް ވިސްނާލަން ޖެހިފައިވާ ވަގުތެވެ. ލިބޭ މަދު އާމްދަނީއަށް ބަރޯސާވެ ފުދުންތެރި ދިރއުޅުމެއް އުޅެން މަސައްކަތްކުރަންޖެހިފައިވާ ވަގުތެވެ.
މީސްތަކުންނޭވެ! ލިބޭ ފައިސާކޮޅު މަދުވި ނަމަވެސް އެއިގައި ﷲ ތަޢާލާ ބަރަކާތް ލައްވަވައިފިނަމަ ލިބޭ އާމްދަނީ މަދުވުމަކީ އެއްވެސް މައްސަލައަކަށްނުވެ ފުދިގެން އުޅެވޭނެއެވެ. ވީމާ އޮތީ ބަރަކާތްލެއްވެވުން އެދި ކުރާ މަސައްކަތް އިތުރުކުރުމެވެ.
އެއްވެސް ސަބަބެއް މެދުވެރިވެގެން ލިބޭ އާމްދަނީ މަދުވެއްޖެ ނަމަ ފުރަތަމަވެސް ވިސްނައިލަންވީ ތިމާއަށް ކުރެވޭ ފާފަތަކާއިމެދުގައެވެ. ފާފަކުރުން މުޅިން ހުއްޓައިލާށެވެ! ތައުބާވާށެވެ! ގިނަގިނައިން އިސްތިޣްފާރުކުރާށެވެ! އެއިރުން ﷲ ތައާލާގެ ރަޙްމަތް އެމީހަކަށް ނުވަތަ އެބައަކަށް އުޑުން އޮއްސަވައި ދެއްވަވާނެކަން ކީރިތި ޤުރްއާނުން އެނގެން އެބައޮތެވެ. ވީމާ އެއީ އެއްވެސް މީހަކު އެއްވެސް މިންވަރަކަށް ޝައްކުކުރަންޖެހޭނެ ކަމެއް ނޫނެވެ.
މިއީ ރަސޫލްބޭކަލުން ފައުޅުވާނެ ޒަމާނެއް ނޫނެވެ. ވީމާ 7 އުޑުމަތިން ވަޙީއެއް ނުފޮނުއްވަވާނެތެވެ. އަހަރެމެންނަށް އޮތީ ކުރިމަތިކުރައްވަވާ ކަންކަމުން ޢިބްރަތް ޙާޞިލުކުރުމެވެ. އެއރުން ސަލާމަތްވެވޭނެ މަގުތައް ދައްކަވާނެތެވެ! އިން ޝާ ﷲ
- އިސްލާމީ ތިލަފަތުގެ ދަރުސަކުން
