މީސްތަކުން ބެހިގެން މިވަނީ ތަފާތު ދަރަޖަތަކަކަށެވެ. އެއިގެ ތެރޭގައި ހިމެނެނީ ދުނިޔޭގައި މަޝްހޫރުވެ ވީއައިޕީންނަށް (ވަރަށް މުހިންމު މީހުންނަށް) ވާ މީހުންނާއި ސުވަރުގޭގައި މަޝްހޫރުވެ ވީއައިޕީންނަށް (ވަރަށް މުހިންމު މީހުންނަށް) ވާ މީހުންނެވެ.
ދުނިޔޭގައި މަޝްހޫރު މީހަކަށްވުމުން އެމީހާ މަޝްހޫރުއެވަނީ މީސްތަކުންގެ މެދުގައެވެ. އޭނާގެ މަޝްހޫރުކަން އުޑަށް އުފިލިގެނެއް ނުދެއެވެ. ދުނިޔޭގައި އެއްވެސް މަޝްހޫރުކަމެއް ނެތް އެތައްބައެއްގެ މަޝްހޫރުކަން އުޑަށް އުފުލިގެންދެއެވެ. ތަންކޮޅެއް ފަސޭހަގޮތަކަށް ބުނާނަމަ މިއުޅެނީ ތަޤްވާވެރިންނާއި ތަޤްވާވެރިން ނޫން މީޙުންގެ ތަފާތެވެ.
ސުވަރުގޭގައި މަޝްހޫރުވެ ވީއައިޕީއެއްގެ ދަރަޖަ ހޯދަން ބޭނުންވާމީހާއަށް ކުރަންޖެހޭކަމަކީ ކޮންމެ ދުވަހަކުވެސް ހެޔޮ ޢަމަލުތައްކުރުމެވެ. ތަޤްވާވެރިވުމެވެ. އެއިރުން އޭނާކުރާ ހެޔޮ ޢަމަލުތައް ކޮންމެ ދުވަހަކު އުޑަށް، ﷲ ތަޢާލާގެ ޙަޟްރަތަށް އުފުލިގެންދެއެވެ.
ސުވަރުގޭގައި ވީއައިޕީންގެ ދަރަޖަ ލިބޭނެ 7 ބާވަތެއްގެ މީހުންގެވާހަކަ ރަސޫލް ﷺ ވަނީ ޙަދީޘްފުޅުކުރައްވަވައިފައެވެ. އެއިގެތެރެއިން އެއްބައަކީ ޒުވާން އުމުރުގެ ބޭނުން ހެޔޮގޮތުގައި ހިފި ޒުވާނުންނެވެ. ދުނިޔޭގައި މަޝްހޫރުވުމަށް ކަންކަންކުރަން ވަޤުތުތައް ބޭކާރުކޮށްނުލައި ސުވަރުގޭގައި މަޝްހޫރުވާން މަސައްކަތްކުރި ޒުވާނުންނެވެ.
އެކުވެރި ޒުވާނުންނޭވެ! ތިއަ ޒުވާނުންނަށް ﷲ ތަޢާލާ ދެއްވަވާފައިވާ މިރަނުގެ ފުރުޞަތު ނަގާނުލާށެވެ! ޒުވާން އުމުރުގައި އެފުރުޞަތުގެ ބޭނުން ނުހިފައިފިނަމަ އެ ފުރުޞަތު އަލުން އަނބުރައި ނުލިބޭނެތީއެވެ. ޒުވާން އުމުރަކީ ދާދި ކުރު ދުވަސްކޮޅަކަށްވާނެތީއެވެ. އެ މަދުދުވަސްކޮޅު ނިމުމުން އެފުރުޞަތު ގެއްލިގެންދާނެތީއެވެ.
- މުފްތީ މެންކުގެ ދަރުސަކުން
