އެއްވެސް މީހެއްގެ ގާތު ކޮންމެހެން ބުނަންޖެހޭ ވަރަށްވުރެ އިތުރަށް ތިމާގެ އަމިއްލަކަންކަމުގެ ވާހަކަތައް ކިޔައި ނުދޭށެވެ. އެއީ ޢާއިލީ ގޮތުން ކިތަންމެ ގާތް މީހެއްކަމުގައިވީނަމަވެސް އަދި ކިތަންމެ ބޮޑު އެކުވެރިއެއް ކަމުގައިވީނަމަވެސްމެއެވެ.
ކޮންމެ މީހަކީވެސް ޚިޔާލުބަދަލުވެދާނެ މީހެކެވެ. ކޮންމެ ވަގުތަކުވެސް ޢަދާވާތްތެރިއަކަށް ބަދަލުވެދާނެ މީހެކެވެ. އެފަދަ ޙާލަތުގައި ތިމާ އާއިބެހޭ ގޮތުން އެނގިފައި ހުންނަ ކަންކަމުގެ ބޭނުން ހިފާނީ ކޮން ގޮތަކަށް، ކޮންކަމަކަށްކަމެއް ނުއެނގޭނެއެވެ.
ވަރަށް އެކުވެރިކަމުގައި އުޅެމުން ބުނެވިފައި ހުންނަ ވާހަކަތަކުގެ ސަބަބުން އެންމެ ލޯބިވާ މީހާ އާއި ކައިވެނިކުރަން ލިބޭ ފުރުޞަތުވެސް ގެއްލިގެންއެބަދެއެވެ. މީސްތަކުންގެ ކުރިމަތީގައި ލަދުވެތިވާންވެސް އެބަޖެހެއެވެ.
ވީމާ އެންމެ ބުއްދިެރި ގޮތަކީ އަމިއްލަ ޒާތީ ކަންކަމުގެ ވާހަކަތައް ހަމައެކަކަށްވެސް ކިޔައި ނުދިނުމެވެ. ބޭޒާރުކޮށް ގެއްލުންދެވެނީ ކިޔައިދެވޭތީއެވެ.
މީސްތަކުން ކުރާ ކަންކަން ﷲ ތަޢާލާ ސިއްރުކުރައްވަވައި ދެއްވަވަނީ އެކަމުގައި މަތިވެރި ސަބަބުތަކެއް އޮތުމުންނެވެ. ވީމާ ކޮންމެ މީހަކުވެސް އެމީހާގެ ސިއްރުތައް ހިފަހައްޓަން އަމިއްލައަށް ގަދައަޅައި މަސައްކަތްކުރަންވާނެއެވެ.
