އެހެން މީހަކަށް ކުށެއް ކުރެވޭއިރަށް އެއީ ދުނިޔެވަރުގެ ބޮޑުކަމަކަށް ހަދައިގެން ތެޅިފޮޅިގަންނައިރު ތިމާ ފާފަތައް ކުރަމުން ގެންދާއިރު ﷲ ތަޢާލާ ކެތްތެރިވެވޮޑިގަންނަވާކަން ނުއެނގެނީހެވެ! ފާފަތައް ފުއްސަވައިދެއްވަވަން އެދުމުން ފުއްސަވައި ދެއްވަވާކަންވެސް ނުއެނގެނީހެއްޔެވެ؟
ފާފަކުރުން ގިނަވެ މަގުން ކައްސާލައިގެންދާ ކިތައް މީހުން ތައުބާވެ ޙައްޤުމަގުގައި ސާބިތުވެ މަރުދުވަހާއި ހަމައަށް ރަނގަޅު ގޮތުގައި ދިރިއުޅޭ ހެއްޔެވެ؟ ތިބާއަށް މާފުކުރަން ޖެހުނު މީހާއަށް މާފުކޮށް ފުރުޞަތުދީފިނަމަ އެމީހަކު އިޞްލާޙްވެ ތިބާއާއިމެދު ކަންތައްތައްކުރާނެ ހެޔޮގޮތް ވަޒަންކުރަން އުނދަގޫވަނީ ކީއްވެގެންހެއްޔެވެ؟
މާފުކުރުމުން ފަހުން ތިބާއަށް ޚިޔާނާތްތެރިވެދާނެކަމުގެ ބިރު އޮތްނަމަވެސް މާފަށް އެދުމުން މާފުކުރާށެވެ! އޭނާ ކޮށްފާނެ ނުބައިކަމަކަށް ބިރުން މާފުކުރަން ފަސްނުޖެހޭށެވެ. އެމީހާ އަމަލުކޮށްފާނެ ގޮތް ﷲ ތަޢާލާއަށް ވަކީލުކުރާށެވެ.
މާފުކުރަންވީ އެމީހާ އެދުނީތީއެއް ނޫނެވެ! މާފުކުރުމަށް ﷲ ތަޢާލާ އަންގަވާފައިވާތީއެވެ. މީސްތަކުުންނަށް މާފުކުރާ މީހުންނަށް ﷲ ތަޢާލާ ރުއްސަވައި ލޯބިވެވަޑައިގަންނަވާތީ ﷲ ތައާލާގެ ރުހިވޮޑިގަތުން ލިބިގަތުމަށެވެ.
މާފުކުރަން ފަސްޖެހޭ މީހަކަށް އުފާވެރިކަމާއިއެކު ދިރިއުޅެ ހިތްހަމަޖެހުން ހޯދުމަކީ ކުރެވޭނެ ކަމެއް ނޫނެވެ.
- މުފްތީ މެންކުގެ ދަރުސަކުން
