އަންހެނެއްގެ ބޭނުމުގައިވެސް އަދި ފިރިހެނެއްގެ ބޭނުމުގައިވެސް އަދި ދެމަފިރިއަކު ދުރުކުރުވަން ނަމަވެސް ދެމަފިރިއަކު ގުޅުވަންނަމަވެސް ސިހުރު ހެއްދުވުމަކީ މީހާ ކަނޑައެޅިގެން ކާފިރުވާނެކަމެކެވެ. އެކަންކުރަން ސިހުރު ހިމެނޭ އެއްވެސް ކަމެއް ކުރުމަކީ ސިހުރުހެދުމެވެ. މީހަކު ލައްވައި އެފަދަ ކަމެއް ކުރުވުމުގެ ޙުކުމަކީވެސް ހަމައެއީއެވެ.
އެކަން ބަޔާންކުރައްވައި الشيخ عبد المحسن بن محمد القاسم –حفظه الله ވިދާޅުވެފައިވެއެވެ.
"ޢަޤީދާ ފަސާދަކުރުމަށް ޝައިޠާނާ ކުރާކަންކަމުގެ ތެރޭގައި ސިޙުރު އުނގަންނައިދިނުން ހިމެނެއެވެ. އެކަންކުރާމީހާ ކާފިރުވާނެއެވެ. އަދި ސިޙުރު ހެދުމަށް ސިޙުރުވެރިއެއްގެ ގާތަށް ދާމީހާވެސް މެއެވެ.
ﷲ ތަޢާލާ ވަޙީކުރެއްވެވިއެވެ.
﴿وَاتَّبَعُوا مَا تَتْلُو الشَّيَاطِينُ عَلَى مُلْكِ سُلَيْمَانَ وَمَا كَفَرَ سُلَيْمَانُ وَلَكِنَّ الشَّيَاطِينَ كَفَرُوا يُعَلِّمُونَ النَّاسَ السِّحْرَ﴾ [البقرة: 102]
މާނައީ: "އަދި ސުލައިމާނުގެފާނުގެ ވެރިކަމުގެ ޒަމާނުގައި ޝައިޠާނުންތައް ކިޔަވައި އުޅުނު ތަކެއްޗަށް އެބައިމީހުން ތަބާވިއެވެ. ސުލައިމާނުގެފާނު ކާފިރުވެވަޑައެއް ނުގަނެއެވެ. އެހެނެއްކަމަކު އެޝައިޠާނުން ކާފިރުވިއެވެ. އެބައިމީހުން މީސްތަކުންނަށް ސިޙުރު އުނގަންނައި ދިނުމުންނެވެ".
ޝައިޚްގެ މިބަސްފުޅުން އެނގިގެންދަނީ އެއްވެސް ބާވަތެއްގެ ސިހުރެއް ހައްދަންދާ ސިހުރުވެރިއެއްގެ ގާތަށް ދިއުމުންނާއި އަދި ސިހުރު ހެދުމުން މީހާ ކާފިރުވާނެކަމެވެ. ވީމާ މިަކަމަކީ މީސްތަކުން ވަރަށް ބޮޑަށް ބިރުވެތިވެ ސަމާލުކަންދޭންޖެހޭނެ ކަމެކެވެ.
މީހަކު ދެކެ ލޯބިވެއްޖެނަމަ އެމީހަކު ހޯދަން ކުރެވެންހުރި މަސައްކަތެއް ﷲ ތަޢާލާ ހުއްދަކުރައްވަވާފައިވާ އިމުގެ ތެރެއިން ކުރާށެވެ. ދުޢާކުރާށެވެ! ލޯބިހުށަހަޅާށެވެ. ޤަބޫލުނުކޮށްފިނަމަ އަވަހަށް އެކަން ދޫކޮށްލައި އެހެން މަގެއް ޚިޔާރުކުރާށެވެ. ސިހުރު ހައްދުވައި ދީނުން ބޭރުވެ ކާފިރުނުވާށެވެ.
- އިސްލާމީ ތިލަފަތުގެ ދަރުސަކުން
