ފާފަކުރަން އެކި ގޮތްގޮތުން ހިތްވަރުދޭ މީހުންނާއި އިސްލާމީ ޢަޤީދާ ބަލިކަށިކުރަން މަސައްކަތްކުރާ މީހުން ގިނަވެއްޖެއެވެ. އެފަދަ ކަންކަންކުރުމަކީ އެމީހެއްގެ ބޮލުގައި އިބިލީސް ތާޖުބަހައްޓައިދޭކަމެކެވެ. ވީމާ އެފަދަ ކަންކަންކުރާ މީހުން އެތިބެނީ އިބިލީހުގެއަތުން އެމީހާގެ ބޮލުގައި އިބިލީހުގެ ތާޖުއަޅައިގެންނެވެ.
ނަބިއްޔާ عليه الصلاة والسلام ޙަދީޘްކުރެއްވިއެވެ.
«إِذَا أَصْبَحَ إِبْلِيسُ بَثَّ جُنُودَهُ، فَيَقُولُ: مَنْ أَضَلَّ الْيَوْمَ مُسْلِمًا أَلْبَسْتُهُ التَّاجَ» [رواه ابن حبَّان وصححه الألباني]
މާނައީ: "ކޮންމެ ހެނދުނެއްގައިވެސް އިބިލީސް އޭނާގެ ލަޝްކަރުތައް ފޮނުވައެވެ. އަދި ބުނެއެވެ. މިއަދު މުސްލިމަކު މަގުފުރައްދައިފިމީހާ ދަންނައެވެ. އޭނާގެ ބޮލުގައި ތާޖު އަޅުވާނަމެވެ."
ޝައިޠޯނުންނަށްވުރެ އިބިލީސް ތާޖްބަހައްތައިދީފައިވާ އިންސާނުންގެ ނުބައިކަން މާބޮޑެވެ. ޝައިޠޯނުންނަށް ކުރެވޭނެކަމަކީ ވަސްވާސްދިނުމެވެ. އިންސާނުން ހަމައެކަނި ވަސްވާސްދެނީއެއް ނޫނެވެ. ފާފަކުރަން ހިތްވަރުދިނުމުގެ އިތުރުން ފާފަތައްކުރަން މަގުފަހިވެސްކޮށްދެނީއެވެ. ވީމާ ކިތަންމެ ކުޑަނަމަވެސް ފާފައެއްކުރަން ހިތްވަރުދޭ މީހަކާއިއެއްވެސް ގުޅުމެއް ނުބާއްވާށެވެ.
މިސާލަކަށް ބުނާނަމަ ފުރަތަމަ ފަށާނީ ބަރަހަނާ ފޮޓޯއަކުން ނުވަތަ މަންޒަރެއް ދައްކައިލުމުންނެވެ. ނިމޭނީ އެންމެ ބޮޑެތި ފާފަތަކުގެތެރޭގައި ހިމެނޭ ޒިނޭވެސް ކުރެވިގެންނެވެ. ފުރަތަމަ ހައްދުވާނީ ދޮގެކެވެ. ނިމޭނީ މަކަރާއި ހީލަތްހަދައި އަދި ވައްކަންވެސް ކޮށްގެންނެވެ.
މިހާރަކަށް އައިސް އެންމެ ބޮޑަށް ޢާންމުވަމުން މިދާ އެއްކަމަކީ އިސްލާމް ދީނާއިމެދު ދޮގު މައުލޫމާތު ފެތުރުމެވެ. ފުރަތަމަ ފަށާނީ އިސްލާމް ދީނާއިމެދު ވަރަށް އާދައިގެވާހަކައަކުންނެވެ. ނަމަވެސް ނިމޭއިރު ފެނިގެންމިދަނީ ﷲ ތަޢާލާ އެއްކައުވަންތަކުރުމުން މީހާ ދުރުހެލިކުރުވޭތަނެވެ. އީމާންކަން ނެތިގެންދާތަނެވެ. ﷲ ތަޢާލާ ވޮޑިގެންވާކަމާއި އެންމެހައި ބާރުތައް ލިބިވޮޑިގެންވަނީ ﷲ ތަޢާލާއަށްކަން ޤަބޫލުނުކުރެވޭތަނެވެ.
މިފަދަ ކަންކަން ކުރާ ކޮންމެ މީހަކީ ޝައިޠޯނާގެ ބައިވެރިއެކެވެ. މުސްލިމަކު މަގުފުރެއްދޭ ކޮންމެ ކޮންމެ ދުވަހަކު އެމީހާގެ ބޮލުގައި އިބިލީސް ތާޖު ބަހައްޓައިދިނުމުން މަތިމައްޗަށް އިބިލީހުގެ ތާޖު އަޅައިގެންތިބި މީހުންނެވެ. ޤިޔާމަތް ދުވަހު ސަލާމަތްކަން ލިބުންވަނީ މިފަދަ އެއްވެސް ސިފައެއްހުރި އެއްވެސް މީހަކާއި އެއްވެސް ގުޅުމެއް ނުބާއްވައި ދުނިޔޭގައި އުޅެވިގެންނެވެ.
- އިސްލާމީ ތިލަފަތުގެ ދަރުސަކުން
