ފާޠިމަތު ނައީޝާ ޖާދުﷲ
ޔޫނުސް ޢަލައިހިއްސަލާމް ފޮނުއްވުނީ ނައިނަވާގެ މީހުންގެ ގާތަށެވެ. އެއީ މިޒަމާނުގެ އިރާޤުގެ އަވަށެއްކަމަށްވެއެވެ. ކާމިޔާބެއްނުލިބި އެތަށް އަހަރެއްވަންދެން އެމީހުންނަށް ދީނަށް ގޮވާލެއްވުމުގައި އެކަލޭގެފާނު ހުންނެވިއެވެ. އެކަމާއި ހިތްހަމަނުޖެހިވަޑައިގެން ހިތްވަރުދޫކޮށްލުމަށްފަހު، މާތްﷲ ގެ އިޒުނަފުޅާއިނުލާ އެހެންރަށަކަށް ދިޔުމަށް އެކަލޭގެފާނު މިސްރާބުޖެއްސެވިއެވެ.
އެކަލޭގެފާނު ދަތުރުކުރެއްވީ އުޅަނދެއްގައެވެ. ދުވާލު، މަޑު ކަނޑުގައި އުޅަނދު ދަތުރުކޮށްފައި ދިޔައިރު، ރޭގަނޑު އައިރު ކަނޑުގަދަވެ ވަރުގަދަ ތޫފާނެއްއައެވެ. އަދި ދޯނި އަޑިއަށް ދިޔުމުގެ ބިރު ބޮޑުވެ އޭގައި ހުރި ހުރިހާ ފޮށިތަންމަތި އުކާލުމަށް ދޯނީގެ ބޮޑުމީހާ ބުންޏެވެ. ނަމަވެސް އަދިވެސް ދޯނި ވަރަށް ބޮޑަށް ދިޔަވެ އަޑިޔަށްދާން ފަށާފައިވާތީ ފަޅުވެރިންގެ ތެރެއިން އެކަކު އުޅަނދުން އެއްލާންނޫންގޮތެއްނެތެވެ. އެހެންކަމުން، ދޯނިން ބޭރުކޮށްލާނެ މީހެއް ކަނޑައެޅުމުގެގޮތުން ގުރުއަތު ނެގިއެވެ. އެންމެ ފުރަތަމަ ގުރުއަތުން ދިމާވީ ޔޫނުސްގެފާނެވެ. ނަމަވެސް އެކަލޭގެފާނަކީ ޒުވާން، ތެދުވެރި އަދި ރަނގަޅު މީހެއްކަމުން، އެކަލޭގެފާނު ދޯނިން އެއްލާނުލުމަށް އެމީހުން ނިންމިއެވެ. ނަމަވެސް އަނެއްކާވެސް ގުރުއަތުނެގުމުން ދިމާވީ ހަމަ އެކަލޭގެފާނެވެ. ތިންވަނަ ފަހަރަށްވެސް ދިމާވީ ހަމަ އެކަލޭގެފާނެވެ.
އުޅަނދުގެ ހުރިހާ ފަޅުވެރިންވެސް ތިބީ ހައިރާންވެފައެވެ. އެހެންނަމަވެސް ޔޫނުސްގެފާނަށް އެއީ، މާތްﷲ ޞުބުޙާނަހޫ ވަޠަޢާލާގެ އިޒުނަފުޅާއިނުލާ އެކަލޭގެފާނުގެ ޤައުމުގެ މީހުން ދޫކުރައްވައި ވަޑައިގަތުމުން އެކަލޭގެފާނަށް މާތްﷲ މެދުވެރިކުރެއްވިގޮތްކަން އެންގިވަޑައިގެންނެވިއެވެ. އެހެންކަމުން، ކަނު އަދިރި، ބިޔަ ރާޅުތަކުގެ ތެރެއަށް އެކަލޭގެފާނު ފުށްމަވާލެއްވެވިއެވެ. އަދި އެހިނދު ﷲ ގެ އަމުރުފުޅަށް، ބޮޑުމަހެއް އައިސް އެކަލޭގެފާނު އެއްކޮށް ދިރުވާލިއެވެ. އަދި ބޮޑުމަހުގެ ބަނޑުތެރޭގައިވާހާލު ޔޫނުސްގެފާނު، އެކަލޭގެފާނުގެ ކުށް ދެނެގަނެ، އެކަލާނގެ ޙަޟްރަތަށް ތައުބާވިއެވެ.
"އަދި ޛުއްނޫނޫ ( އެބަހީ؛ ޔޫނުސްގެފާނު ) ހަނދުމަކުރާށެވެ. އެކަލޭގެފާނުގެ ޤައުމުގެ މީހުންދެކެ ކޯފާވެގެން ވަޑައިގެތްހިނދެވެ. ފަހެ، އެކަލޭގެފާނަށް ތިމަންރަސްކަލާނގެ ޢުޤޫބާތެއް ނުދެއްވާނެކަމަށް ހީކުރެއްވިއެވެ. ފަހެ، އެކަލޭގެފާނު އަނދިރިތަކުގެ ތެރޭގައި ( އެބަހީ؛ މަހުގެ ބަނޑުގައި ދުޢާކުރެއްވިއެވެ. އިބަރަސްކަލާނގެ މެނުވީ އިލާހަކުނެތެވެ. އިބަރަސްކަލާނގެ ހުސްޠާހިރުވަންތަކަމާއެވެ! ހަމަކަށަވަރުން އަނިޔާވެރިންގެ ތެރެއިން މިއަޅާވީމެވެ. " سورة الأنبياء : 87
ޔޫނުސް ޢަލައިހިއްސަލާމްގެ މި ވާހަކައިން އަހަރެމެންނަށް ވަރަށް މުހިންމު ފިލާވަޅުތަކެއްލިބިގެން އެބަދެއެވެ. ތިބާއަށް ކުރެވޭ ފާފަތަށް ދެނެގަނެ ޠަޢުބާވުމެވެ. އެކަލާނގެ ޙަޟްރަތަށް ދުޢާ ދަންނަވާއިރު ކެތްތެރިވުމެއެވެ. ﷲ ގެ ރަޙުމަތްލިބޭނެކަމާއިމެދު ހިތްވަރުއެލުވާނުލުމެވެ. އަދި އެކަލާނގެ ޙަޟްރަތަށްކުރެވޭ ދުޢާތަކާއި ޒިކުރުތަކުގެ ވަރުގަދަކަމެވެ. ޔޫނުސްގެފާނު އެމަހުގެ ބަނޑުތެރޭގައި ދުވަސްތައް ހޭދަކުރެއްވިއިރު، އެންމެ ސިކުންތަކަށްވެސް ﷲ ޠަޢާލާގެ ރަޙުމަތް ލިބިވަޑައިނުގެންފާނެކަމަށް މާޔޫސްވެވަޑައެއްނުގަންނަވައެވެ. އެހާލުފުޅުގައިވެސް ފާފަފުއްސެވުން އެދި ދުޢާކޮށް ޒިކުރުކުރުންމަތީ އިންނެވީ އެސަބަބަށްޓަކައެވެ. ﷲ އަށް އުރެދުމުގައި ތިބާ ކިތައްމެވަރަކަށް ކުރިއަރައިގެންދިޔަސް އިޚްލާޞްތެރިކަމާއިއެކު އެކަލާނގެއަށް ތަޢުބާވެއްޖެކަމުގައިވާނަމަ އެކަލާނގެ ރަޙްމަތުން ތިބާ އެއްކިބާނުވާނެކަން ކަށަވަރެވެ. އެކަލާނގެއީ އެންމެ ޢަޒީޒުވަންތަރަސްކަލާނގެއެވެ.
މަސްދަރު: އިސްލާމީ ހިދާޔަތު
