ޝައިޠޯނާއަށް އަޅުކަން ނުކުރަން ބުނެފިނަމަ ގިނަ ބައަކު ބުނާނީ ތިމާ ޝައިޠޯނާއަށް އަޅުކަން ނުކުރާކަމަށެވެ. އެއީ ބަހުގެ މާނަ ނޭނގޭތީ ޝައިޠޯނާއަށް އަޅުކަންކުރުމަކީ ކޮބައިކަން ނުވެސް އެނގޭތީއެވެ.
ޝައިޠޯނާއަށް އަޅުކަންކުރުމުގެ މާނައިގައި ޝައިޠޯނާ ބުނާކަންކަން ކުރުން ހިމެނެއެވެ. ފާފަތައް ކުރުން ހިމެނެއެވެ. ވީމާ ޝައިޠޯނާ ވަސްވާސްދީގެން ކުރެވޭ ކޮންމެ ކަމަކީ ޝައިޠޯނާއަށް ކުރެވޭ އަޅުކަމެކެވެ. އެއްވެސް ފާފައެއް ނުކުރަންވީ އެ ސަބަބަށްޓަކައެވެ.
މީސްތަކުން މިއަދު ޣާފިލުވެ ޝައިޠޯނާ އާއިމެދު ހޭލުންތެރިކަން މިވަނީ ވަރަށް ބޮޑަށް ކުޑަކޮށްލައިފައެވެ. އެހެންކަމުން މިބަޔާންކުރަނީ الشيخ عبد المحسن بن محمد القاسم –حفظه الله ޝައިޠޯނާ ޢާއިމެދު ވިދާޅުވެފައިވާ ބައެއް ބަސްފުޅުތަކެވެ.
ކޮންމެ އިންސާނަކު މަގުފުރެއްދުމަކީ ޝައިޠޯނާގެ ވަޢުދެކެވެ.
ދުނިޔެއަކީ މުޞީބާތްތަކާއި އިމްތިޙާނުގެ ގޮވައްޗެވެ. އެންމެ ބޮޑު މުޞީބާތަކީ އަޅާއާއި އޭނާގެ ރައްބާ އަދި އޭނާގެ ދީނާއޮތް ގުޅުން ކެނޑުމެވެ. އެންމެ ބުއްދިވެރި ގޮތަކީ އަޅާ އޭނާގެ ޢަދުއްވަކީ ކޮބާކަމާއި އެކުވެރިންނަކީ ކޮބާކަން ވަކިކުރަން މަސައްކަތްކުރުމެވެ. ހަމަކަށަވަރުން ﷲ ވަނީ އަޅުގަނޑުމެންނަށް ބަޔާންވެގެންވާ ޢަދުއްވެއް އަންގަވާދެއްވާފައެވެ. ޚަލްޤުތަކުންނަށް އެއަށްވުރެ ބޮޑު ފިތުނައެއް ނުވެއެވެ. އެއީ އެންމެ ފުރަތަމަ އަދި އެންމެ ބޮޑު ޢަދުއްވެވެ. ހުރިހާ މުޞީބަތްތަކުގެ ފެށުމަކީ އެއީ އެވެ.
އާދަމުގެ ދަރީންނަށް އޭނާގެ ޢަދާވާތްތެރިކަން ވަރަށް ބޮޑެވެ. އަދި އެކަމަކީ ބަޔާންވެ އެނގިގެންވާ ކަމެކެވެ. އެއަށްވުރެ ފާޅުކަންބޮޑު ޢަދާވާތްތެރިއަކު ނުވާނެއެވެ.
ﷲ ތަޢާލާ ވަޙީކުރެއްވިއެވެ.
﴿إِنَّ الشَّيْطَانَ لِلْإِنْسَانِ عَدُوٌّ مُبِينٌ﴾ [يوسف: 5]
މާނައީ: "ހަމަކަށަވަރުން ޝައިޠާނާއަކީ އިންސާނާއަށްހުރި ފާޅުވެގެންވާ ޢަދާވާތްތެރިއެކެވެ."
އެ ޢަދާވާތްތެރިޔާއަކީ މެދުކެނޑުމެއް ނެތި މަސައްކަތްކުރާ ފަރާތެކެވެ. އަދި އޭނާ ރުއްސަން އުޅެގެން ނުވަތަ އޭނާއާއެކު މަޑުމައިތިރިކޮށް މުޢާމަލާތްކޮށްގެންވާނޭ ފައިދާއެއް ނެތެވެ. އަދި އެސޮރު އެންމެހާ އާދަމުގެ ދަރީންގެ މައްޗަށް ޢަދާވާތްތެރިވާނެކަމަށާއި އެންމެހާ ވަސީލަތްތަކަކުން އެބައިމީހުން ތެދުމަގުން އެއްކިބާކުރާނެކަމަށްވަނީ ހުވާ ކޮށްފައެވެ.
އާދަމުގެފާނާއި އެކަލޭގެފާނުގެ ދަރިފަސްކޮޅަށް އެސޮރު ޢަދާވާތްތެރިވުމުގެ ސަބަބަކީ ﷲ އާދަމުގެފާނު ޝަރަފުވެރިކުރައްވާ މާތްކުރެއްވުމެވެ. އަދި އެއިލާހުގެ ދެއަތްޕުޅުން އެކަލޭގެފާނު ޚަލްޤުކުރައްވާ އެއިލާހުގެ ސުވަރުގޭގައި އެކަލޭގެފާނު ވަޒަންވެރިކުރެއްވުމެވެ. އަދި އެއިލާހު އެކަލޭގެފާނަށް ނަންތައް ދަސްކޮށްދެއްވުމެވެ. އަދި އެއިލާހުގެ މަލާއިކަތުން އެކަލޭގެފާނަށް ސަޖިދަކުރުމެވެ. އަދި އެކަލޭގެފާނަށް ފަހު، އެކަލޭގެފާނުގެ ދަރިފަސްކޮޅު މާތްކުރެއްވުމެވެ. ފަހެ، މިނިޢުމަތްތަކަށް އިބިލީސް ހަސަދަވެރިވިއެވެ. އަދި އޭނާ ކިބުރުވެރިވިއެވެ. ފަހެ، އެއީ ހުރިހާ ބައްޔަކާއި ނުބައެއްގެ އަސާސެވެ. ދެންފަހެ، އެކަލޭގެ އާދަމުގެފާނަށް ސަޖިދަކުރުމުން މަނާވެގަތެވެ.
އަދި ބުންޏެވެ.
﴿أَنَا خَيْرٌ مِنْهُ خَلَقْتَنِي مِنْ نَارٍ وَخَلَقْتَهُ مِنْ طِينٍ﴾ [الأعراف: 12]
މާނައީ: "އެކަލޭގެ ދެންނެވިއެވެ. އެކަލޭގެފާނަށްވުރެ (އެބަހީ: އާދަމުގެފާނަށްވުރެ) ތިމަން މާމޮޅެވެ. އިބައިލާހު ތިމަން ހެއްދެވީ އަލިފާނުންނެވެ. އަދި އިބައިލާހު އެކަލޭގެފާނު ހެއްދެވީ މަށީންނެވެ".
އަދި އެކަލޭގެ ސުވަރުގޭން ބޭރުކުރެއްވުމުން ޢަދާވާތްތެރިކަން އިޢުލާންކޮށް ފާޅުކުރިއެވެ.
﴿قَالَ فَبِعِزَّتِكَ لَأُغْوِيَنَّهُمْ أَجْمَعِينَ﴾ [ص: 82]
މާނައީ: "ފަހެ، އިބައިލާހުގެ ޢިއްޒަތްތެރިވަންތަކަން ގަންދީ ބުނަމެވެ. ހަމަކަށަވަރުން، އެބައިމީހުން އެންމެން މަގުފުރައްދާހުށީމެވެ."
ފަހެ، އެކަލޭގެ އާދަމުގެފާނާއި ޙައްވާގެފާނަށް މަކަރުހަދާ، އެދެބޭކަލުން ސުވަރުގޭން ނެރެލައްވަންދެން އެދެބޭކަލުންނަށް އެކުރެވުނު ފާފަ ޒީނަތްތެރިކޮށްދިނެވެ. އަދިވެސް އެގޮތުގެ މަތީގައި މީސްތަކުންނަށް އެކި ގޮތްގޮތުން އުނދަގޫކުރުމުގެ މަތީގައި އޭނާވެއެވެ. އަދި މީސްތަކުންގެ ސާފު ޢަޤީދާ ކިލަނބުކުރެއެވެ. އަދި އެބައިމީހުންގެ އަޅުކަންތަކާއި، ހަށިތަކާއި، ރޫޙުތަކާއި، މުދާތަކާއި، ދަރިންނާއި، ކާބޯތަކެއްޗާއި، ނިދުމާއި، ނަމާދާއި، ޞިއްޙަތާއި، ބަލިމަޑުކަމާ އަދި އެބައިމީހުންގެ ހުރިހާ ޙާލަތެއްގައި އެބައިމީހުންގެ މައްޗަށް ބާރުފޯރުވައެވެ.
ނަބިއްޔާ – عليه الصلاة والسلام – ޙަދީޘްކުރެއްވިއެވެ.
«إِنَّ الشَّيْطَانَ يَحْضُرُ أَحَدَكُمْ عِنْدَ كُلِّ شَيْءٍ مِنْ شَأْنِهِ» [رواه مسلم]
މާނައީ: "ހަމަކަށަވަރުން ތިޔަބައިމީހުންކުރެ މީހަކު ކޮންމެ ކަމެއް ކުރާއިރުގައިވެސް ޝައިޠާނާ އެތަނަށް ޙާޟިރުވެއެވެ".
ފަހެ، ސާފު ޢަޤީދާގެ ނިމުމަކީ ޢަޤީދާ ފަސާދަވުމެވެ. ﷲ ވަޙީކުރެއްވިއެވެ.
﴿أَلَمْ أَعْهَدْ إِلَيْكُمْ يَابَنِي آدَمَ أَنْ لَا تَعْبُدُوا الشَّيْطَانَ إِنَّهُ لَكُمْ عَدُوٌّ مُبِينٌ﴾ [يس: 60]
މާނައީ: "އޭ އާދަމުގެ ދަރިންނޭވެ! ތިޔަބައިމީހުން ޝައިޠާނާއަށް އަޅުކަން ނުކުރުމަށް ތިމަންއިލާހު ތިޔަބައިމީހުންނަށް އަމުރުނުކުރައްވަން ހެއްޔެވެ؟ ހަމަކަށަވަރުން، އޭނާޔަކީ ތިޔަބައިމީހުންނަށްހުރި، ފާޅުވެގެންވާ ޢަދާވާތްތެރިޔެކެވެ."
ﷲ ނޫން ފަރާތަކަށް އަޅުކަންކުރާ ކޮންމެ މީހަކު ދަންނައެވެ. ފަހެ، ހަމަކަށަވަރުން އެބައިމީހުންނަށް ޝައިޠާނާ ގޮވައެވެ. އަދި އެކަލޭގެއަށް އަޅުކަންކުރެއެވެ.
އެއިލާހު ވަޙީކުރެއްވިއެވެ.
﴿إِنْ يَدْعُونَ مِنْ دُونِهِ إِلَّا إِنَاثًا وَإِنْ يَدْعُونَ إِلَّا شَيْطَانًا مَرِيدًا﴾ [النساء: 117]
މާނައީ: "އެއިލާހު ފިޔަވައި އަންހެން (ނަންތަކެއް ކިއިގެންވާ) ބުދުތަކަކަށް މެނުވީ، އެބައިމީހުން އަޅުކަމެއް ނުކުރެއެވެ. އަދި ނުބައިކަމާއި ނުކިޔަމަންތެރިކަން ބޮޑުވެގެންވާ ޝައިޠާނާއަށް މެނުވީ، އެބައިމީހުން އަޅުކަމެއް ނުކުރެއެވެ."
- الشيخ عبد المحسن بن محمد القاسم حفظه الله
