މައިންބަފައިންނާއި އެމީހެއްގެ ގާތް މީހުންނަށް އަދި ޢާންމުކޮށް އުންމަތުގެ އެންމެންގެ މައްޗަށް އަބަދުވެސް ހެޔޮދުޢާކުރަންވާނެއެވެ. ޚާއްޞަކޮށް އެމީހެއްގެ މައިންބަފައިން ނުވަތަ ގާތް މީޙުން މަރުވުމުން އެމީހުންނަށްޓައކައި ހެޔޮދުޢާކުރަން ހަނދާންނައްތައިނުލާށެވެ. އެކަމުގައި ފަރުވާކުޑަނުކުރާށެވެ.
މަރުވެގެން ވަޅުލާވަގުތު ނޫނީ މަހާނަކައިރީގައި ތިބެގެން ދުޢާކުރުމެއް ނެތެވެ. އެވަގުތު މައްޔިތާއަށް ސާބިތުކަން ދެއްވެވުން އެދި ދުޢާކުރަން ރަސޫލް ﷺ ވަނީ ޙަދީޘްފުޅުކުރައްވަވައިފައެވެ. އެވަގުތަށްފަހު ކޮންމެ ތަނެއްގައި ހުރެގެންވެސް ދުޢާކުރެވޭނެއެވެ.
މަހާނަކައިރިއަށް ގޮސް އުޅުމަކީ މަރުހަނދާންވާނެ ކަމަކަށްވުމުން އެއީ ކުރުން ރަނގަޅު ކަމެކެވެ. އަދި އެގޮތަށް މީހެއްގެ މަހާނަކައިރިއަށްދާވަގުތު އެތަނުގައި ހުރެގެން މައްޔިތާއަށް ރަޙްމަތް ލެއްވެވުން އެދި ދުޢާކޮށްލުމަކީ އެންމެ ރަނގަޅުކަމެކެވެ. ނަމަވެސް ދުޢާކުރުމުގެ ބޭނުމުގައި މައްޔިތާގެ މަހާނަކައިރިއަށް ދިއުމެއް ނެތެވެ.
މައްޔިތާ ވަޅުލާފައި މީހުން އެތަނުންދާ ފިޔަވަޅުގެ އަޑު މައްޔިތާއަށް އިވޭނެތެވެ. ނަމަވެސް އެއިގެ ފަހުން މަހާންކައިރީގައި ކުރާ ކަންކަމުގެ އަޑު މައްޔިތާއަށް އިވޭނެކަން އެނގޭކަށް ނެތެވެ.
މަރުވުމުން ވަކިވަގުތެއްވަންދެން މަހާނަކައިިރީގައި ކިޔެވުމާއި މައްޔިތާއަށް ހެޔޮއެދިގެން ދުޢާކުރަން މަހާނަކައިރިއަށް ދިއުން ފަދަ ކަންކަމަކީ ބިދުޢަވެރި ޢަމަލުތަކެވެ. އަހަރެމެންނަށް އޮތީ އެފަދަ ޢަމަލުތައް ނުކޮށް ސުންނަތުން ސާބިތުވާން ހުރިކަންކަން ސާބިތުވާންހުރި ގޮތަށް ކުރުމެވެ.
- މަޢްލޫމާތު: ޑރ. މުޙައްމަދު އިޔާޟް ޢަބްދުއްލަޠީފް
