ﷲ ތަޢާލާއަށް ކިޔަމަންތެރިކަން އަދާކޮށް ﷲ ތަޢާލާ އަންގަވާފައިވާ ގޮތަށް ޢަމަލުތައް ބަހައްޓަމުން ﷲ ތަޢާލާގެ ޙަޟްރަތުން ތަނަވަސްކަމަށް އެދި ދަންނަވާ މީހުންގެ ތެރެއިންވެސް ތަނަވަސްކަން މިންވަރުކުރައްވަވަނީ ވަރަށް މަދު މީހަކަށެވެ. އެހާލަތުގައި ގިނަ ބައަކު ކަންބޮޑުވެ ޝަކުވާތައްކުރަން ފަށައެވެ.
ޝަކުވާ އެކުރެވެނީ އެމީހުންނަށް ﷲ ތަޢާލާ ދެއްވަވާ މެސެޖް ނުވަތަ އަންގަވާ އެންގެވުން ފަހުމް ނުވާތީއެވެ. އެ އެންގެވުމަކީ މިއީކަމަށް ޤަބޫލުކުރާށެވެ. އެއިރުން ހުރިހާ ކަންބޮޑުވުމެއް ފިލައި ހިތަށް އުފާވެރިކަން ލިބޭނެއެވެ. ޝުކުރުވެރިވެސްވެވޭނެއެވެ. އިން ޝާ ﷲ
"ތިބާ އެދޭ މިންވަރަށް ތިބާއަށް ތަނަވަސްކަން ނުދެއްވަވަނީ ތިބާ ދެކެ ލޯބިވެވޮޑިގަންނަވާތީ އެވެ. އެވަރަށް ތަނަވަސްކަން ދެއްވަވައިފިނަމަ އެކަމުގެ ސަބަބުން ތިބާ ތިމަން ﷲ އާއި ދުރަށް ޖެހޭނެތީއެވެ. ތިބާ އެދޭކަންކަމަށްވުރެ މާފުރިހަމަ ނިޢުމަތްތައް ދާދި އަވަހަށް ތިބާއަށް ދެއްވަވާހުށީމެވެ. ކުޑަ ދުވަސްކޮޅަކަށް ކެތްތެރިވެލާށެވެ!"
މާނައަކީ ކޮންމެ މީހަކަށްވެސް ވަކި މިންވަރަކަށް ފުދުންތެރިކަން ދެއްވަވައެވެ. އެދޭހައި މިންވަރަށް ތަނަވަސްކަން ނުދެއްވަވަނީ ދެއްވަވައިފިނަމަ ދުނިޔޭގެ އެދުމާއިގެން މަސްއޫލްވާލެއް ބޮޑުކަމުން ﷲ ތައާލާއަށް ތަޤްވާވެރިވެ އަޅުކަންކުރުމާއި ދުރުވާނެތީއެވެ. ތިމަން ﷲ އާއި ދުރަށް ޖެހޭނެތީއެވެ. ދުނިޔޭގައި ހުންނަ މަދު ދުވަސްކޮޅު ކެތްތެރިވެލާށެވެ. މަރުވެ ތިމަން ﷲ ގެ ޙަޟްރަތަށް އައުމުން ތިއަ އެދޭ މިންވަރަށްވުރެ މާފުރިހަމަ، މާގިނަ ނިޢްމަތްތައް ދެއްވަވާނެތެވެ.
ނިޢްމަތްތައް ދެއްވެވުމުން ވެސް ތަޤްވާވެރިކަމުގައި ސާބިތުވާނެކަމަށް ހިތުގައި އޮވެދާނެއެވެ. ނަމަވެސް އެހެން އެކަން ނުކުރެވޭނެކަން ނުވަތަ ކުރެވޭނެކަން ﷲ ތަޢާލާ މާމޮޅަށް ދެނެވޮޑިގެންވެއެވެ. ވީމާ ބައެއް މީހުން އެދޭވަރަށް ތަނަވަސްކަން ނުދެއްވަވަނީ އެސަބަބަށްޓަކައި ކަމަށް ޤަބޫލުކޮށް ނުދެއްވަވާކަންމައްޗަށް ޝުކުރުވެރިވާށެވެ! އަދި މާފުރިހަމައަށް ކަންކަން މިންވަރުކުރައްވަވާނެ ދުވަހަށް އުންމީދުކުރާށެވެ! އެއިރުން ހުރިހާ ކަންބޮޑުވުންތަކެއް ފިލައިގެން ހިނގައިދާނެއެވެ. އިން ޝާ ﷲ
- މުފްތީ މެންކުގެ ދަރުސަކުން
