އަނބިމީހާއަކީ އަބަދުވެސް ޒުވާބުކުރާ އަންހެނެކެވެ. ރުޅިގަދަ އަންހެނެކެވެ. ދެމަފިރިން އެކުގައި 60 އަހަރު ދުނިޔޭގައި އުޅެފައި އަނބިމީހާ ނިޔާވީއެވެ. ވަޅުލައި ނިމިގެން އިމާމް ދުޢާކުރެއްވިއެވެ. ދެމަފރިން އެކުގައި ސުވަރުގޭގައި ލެއްވެވުން އެދިއެވެ.
އެވަގުތު ފިރިމީހާ ބުންޏެވެ. "އިމާމްއެވެ! މެދުކެނޑުމެއް ނެތި ޒުވާބުކުރާތާ 60 އަހަރުވީއެވެ. ކެތްކޮށްގެން މިހުރީއެވެ. އަދި ސުވަރުގޭގައިވެސްވީ އެޒުވާބުކުރުމުގެ ތެރޭގައި އުޅެންތޯއެވެ؟"
ޖަވާބުގައި އިމާމްވިދާޅުވިއެވެ. "ކެތްތެރިވާށެވެ! ސުވަރުގޭގައި ކަންކަން މުޅިން ތަފާތުވާނެއެވެ."
ކޮންމެ މުސްލިމަކުވެސް މަސައްކަތްމިކުރަނީ ސުވަރުގެދިއުމަށެވެ. ނަމަވެސް ގޭތެރޭގައި ޢާއިލާގެ މީޙުންނަށްވެސް ބުނަނީ ނުބައިބަސްތަކެވެ. ގޭތެރެ ގުގުމާލާފައި ހުންނަނީ ޒުވާބުކުރާއަޑުންނެވެ. މިއީ ސުވަރުގެ އެދިގެން މަސައްކަތްކުރާ މީހުން ވިސްނައިލަން ޖެހޭނެ ކަމެކެވެ. އެހެނީ ސުވަރުގޭގައި މިކަންކަން މުޅިން ތަފާތެވެ.
ﷲ ތަޢާލާ ވަޙީކުރައްވަވާފައިވެއެވެ.
"ބޭކާރު ބަސްތަކެއްވެސް އަދި ކުށްވެރިކުރަނިވި ބަސްތަކެއްވެސް އެތާކު (ސުވަރުގޭގައި) އެއުރެންނަކަށް ނީވޭނެތެވެ. (25) އެކަމަކު (އެއުރެންނަށް އިވޭނީ) ސަލާމްހުއްޓޭ، ސަލާމް ހުއްޓޭ ބުނެވޭ އަޑެވެ." (26) (އަލްވާޤިޢާ: 25،26)
އެކުގައި ދިރިއުޅެމުންދާއިރު ޚިޔާލުތަފާތުވާ ކަންކަން ކުރިމަތިވާނެއެވެ. އެފަދަ ޙާލުގައި އެންމެންގެ ވިސްނުން އެއްގޮތްނުވުމާއި ވިސްނުމާއި ކެތްތެރިވެވޭ މިންވަރު ތަފާތުވުމުން އެކަކަށް ބާރަށް ބަހެއް ވެސް ބުނެވިދާނެއެވެ. އެޙާލަތުގައި ރައްދުނުދޭށެވެ. ދެމަފިރިންނަށް ސުވަރުގެއިން ބައްދަލުވެވޭއިރު ކަންކަން މުޅިން ތަފާތުވާނެއެވެ. އެއްވެސް މިންވަރަކަށް ރުޅިވެރިކަމެއް ނުހުންނާނެއެވެ. ނުބައި އެންމެ ބަހެއްވެސް ނުބުނާނެއެވެ. ވީމާ މިދުނިޔޭގައި ބައިވެރިޔާއަށް ބުނެވޭބަހަކުން އެހައި ބޮޑަށް ކަންބޮޑުނުވާށެވެ.
- އިސްލާމީ ތިލަފަތުގެ ދަރުސަކުން
