ބައެއް މީހުން މީހުންނަށް ހަސަދަލައި އެކަން ސިއްރުކުރެއެވެ. ކުރިމަތީގައި އުޅެނީ ވަރަށް ހެޔޮއެދޭ މީހެއްގެ ގޮތް ދައްކައިގެންނެވެ. ހަސަދަވެރިކަން ލައިގެންހުރެމެ ހެޔޮއެދޭކަން ދައްކަން މާލީ އެހީތެރިކަންފޯރުކޮށްދިނުމާއި ހަދިޔާދިނުން ފަދަ ކަންކަންވެސް ކުރެއެވެ. މިފަދައިން ކަންކަންކުރާމީހުން ޢާއިލާގައިވެސް ތިބެއެވެ. އެކުވެރިންގެ ތެރޭގައިވެސް ތިބެއެވެ.
މިފަދަ މީހުން އެކުރަނީ ބޮޑުވެގެންވާ 2 ފާފައެވެ. ފުރަތަމަ ކަމަކީ ހަސަދަވެރުމެވެ. ދެވަނަފާފައަކީ ހިތުގައި ހަސަދަވެރިކަން ބާއްވައި ބޭރުފުށުން އެކަން ސިއްރުކުރުމެވެ. އެއީ މުނާފިޤުންގެ ސިފައެކެވެ.
މީހަކާއިމެދު ހިތްހަމަނުޖެހޭނަމަ އޮތީ އެކަން ފައުޅުކުރުމެވެ. ތެދުބަހުން ބުނުމެވެ. ހިތްހަމަނުޖެހެނީ ދީނުގެ ކަމަކާއިގުޅިގެންނަމަ، ނުވަތަ ދިރިއުޅުމުގައި އިޞްލާޙްކުރަންޖެހޭ ކަމަކާއި ގުޅިގެންނަމަ އެކަން ހާމަކުރާށެވެ. އެކަން އިޞްލާޙްކުރާށެވެ. ޙަޤީޤީ އެކުވެރިންނަކީ އަނެކާގެކިބައިގައި ހުންނަ އުނިސިފަތައް ބަޔާންކޮށްދީ އިޞްލާޙްކުރަން މަސައްކަތްކުރާ މީހުންނެވެ.
މީހަކަށް ތަނަވަސްކަން ދެއްވުމުން، ނުވަތަ ތިމާގެ ބައިވެރިޔާއަށްވުރެ ފުރިހަަމ، ރީތި ބައިވެރިއަކު ދެއްވެވުމުން އެކަންކަމަށް ހަސަދަވެރިވުމަކީ ކުރެވޭ އެންމެ ބޮޑެތި ފާފަތަކުގެތެރޭގައި ހިމެނޭ ފާފަތަކެވެ. އެއިރުން ޢަދާވާތްތެރި އެވެވެނީ އަނެކާއަށް ﷲ ތަޢާލާ ދެއްވެވި ނިޢްމަތްތަކަށެވެ. އެކަލާނގެ ނިޢްމަތްތައް މިންވަރުކުރައްވަވަނީ އެކިއަޅުންނަށް އެކި މިންވަރަށެވެ. އެކިކަންކަމުންނެވެ. ވީމާ މީހަކަށް ދެއްވަވާފައިވާ ނިޢްމަތަކަށް ހަސަދަވެރިވުމަކީ ﷲ ތަޢާލާގެ މިންވަރުފުޅު ޤަބޫލުނުކުރެވޭތީ ކުރެވޭ ކަމެކެވެ. ޝަކުވާ ޙަޤީޤަތުގައި އެކުރެވެނީ ނިޢްމަތްތައް ދެއްވެވި ﷲ ތަޢާލާއަށެވެ.
ޝައިޚް އިބްން ޢުޘައިމީން ރަޙިމަހުﷲ ވިދާޅުވެފައިވެއެވެ. "މީހަކަށް ދެއްވެވި ނިޢްމަތަކަށް ދަހިވެތިވުމާއި އެނިޢުމްތެއް އެމީހަކަށް ގެއްލިދިއުމަށް އެދުމަކީ ހަސަދަވެރިވުމެވެ." ވީމާ އެފަދަ ކަމެއް ހިތަށް އަރުވަން ހެޔޮވެސްނުވާނެއެވެ. އެފަދަ ވިސްނުންތަކުގެ ސަބަބުން ހިތުގެ ޠޯހިރުކަން ގެއްލި ހިތް ނަޖިސްވާނެއެވެ.
- އިސްލާމީ ތިލަފަތުގެ ދަރުސަކުން
