އެކަނިވުމުން ފާފަތައް ކުރެވެއެވެ. އެކަނިވުމަކީ ފާފަކުރަން މަގުފަހިކޮށްދޭ ކަމެކެވެ. އެކަނިވާވަގުތު ޝައިޠޯނާ ފުރުޞަތުގެ ބޭނުންހިފައި ފާފަތައްކުރަން ވަސްވާސްދިނުން އިތުރުކުރެއެވެ. ތަޤްވެރިވެ، ރޭއަޅުކަންކޮށް އުޅޭ ބައެއް މީހުންނަށްވެސް އެކަނިވުމުން ފާފަތައް ކުރެވޭކަމަށް ޙަދީޘްފުޅުން ފެންނަން އެބައޮތެވެ.
ވީމާ ފުރަތަމަކަމަކަށް ކުރަންވީ ކަމަކީ އެކަނި ވަގުތު ހޭދަކުރުން ވީހައި ބޮޑަށް މަދުކުރުމެވެ. މިސާލަކަށް އެކަނި ކޮޓަރީގައި ވަގުތު ހޭދަކުރެވޭތަނެއްގައި ހޭދަކުރާނަމަ މިހާރުކުރެވޭ އެންމެ ޢާންމު، އެންމެ ގިނަ އެއްކަމަކީ ބަރަހަނާ މަންޒަރުތައް ބެލުމެވެ. ވީމާ އެފަދަ ވިސްނުމެއް އަތުވެއްޖެނަމަ އަވަހަށް ކޮޓަރިން ނުކުންނާށެވެ. އެތަނަކުން ދުރަށް ގޮސް އެހެން މީހުންގެތެރޭގައި ހުންނާށެވެ. ގޭގައި ނަމަ އެހެން މީހުންނާއިއެކު ސިޓިންގރޫމްގައި މަޑުކޮށްލާށެވެ.
ދެވަނައަށް މެދުވެރިވާ ގޮތަކީ އެހެން ޤަުމަކަށް ނުވަތަ ތިމާ ނުދަންނަ މީހުން ގިނަ ސަރަހައްދަކަށް ދެވިއްޖެނަމަ ބިރެއްނެތި ފާފަތައް ކުރެވުމެވެ. މިފަދަ ކޮަންމެ ޙާލަތެއްގައިވެސް ވިސްނައިލަންޖެހޭނެ ކަމަކީ އެތަނުގައި ތިބީ ނުދަންނަ މީހުން ނަމަވެސް ތިބާގެ ކަންކަން ވަރަށް ރަނގަޅަށް ދެނެވަޑައިގެން ތިބެވި 2 މަލާއިކަތުން ތިބާ އާއިއެކުގައިވާކަމެވެ. އަދި ތިބާކުރާ ކޮންމެ ޢަމަލެއް ﷲ ތަޢާލާ ވަގުތުން ބައްލަވައިވޮޑިގަންނަވާކަމެވެ.
ތިބާއަށް ޢާއިލާގެ މީހުންނަށާއި އަނބި/ފިރި މީހާއަށްވެސް ފިލިދާނެއެވެ. ނަމަވެސް ތިބާއާއިއެކުގައިވާ މަލާއިކަތުންނަކަށް ނުފިލޭނެއެވެ. އަދި ﷲ ތަޢާލާއަށް ތިބާ ފެނިވޮޑިނުގަންނަވާނެ ތަނަކަށްވެސް ނުދެވޭނެއެވެ.
އެކަން އެގޮތަށް ޤަބޫލުކުރެވި ފާފަކުރަން ބިރުވެތިނުވެވޭނަމަ އެމީހާގެ އީމާންކަން ފުރިހަމައެއް ނުވާނެއެވެ. އެމީހާގެ ކިބައި އިޙްޞާންތެރިކަމެއް ނެތީއެވެ. އިޙްޞާންތެރިވުމަކީ ހަމައެކަނި ނަމާދާއި އެހެނިހެން އަޅުކަންކުރާއިރު ﷲ ތަޢާލާއަށް ބައްލަވައިވޮޑިގެންވާކަން ޤަބޫލުކުރުމެއް ނޫނެވެ. ފާފައެއް ކުރާއިރުވެސް ﷲ ތަޢާލާ ތިބާއަށް ބައްލަވައިވޮޑިގެންވާކަން ޤަބޫލުކުރުމެވެ.
އިހްޞާންތެރިކަމަކީ އީމާންކަމުގެ ރުކުނެކެވެ. ވީމާ އިޙްޞާންތެރިކަން ފުރިހަމަނުވެ އީމާންކަން ފުރިހަމައެއް ނުވާނެއެވެ.
- އިސްލާމީ ތިލަފަތުގެ ދަރުސަކުން
