މިއަދުގެ ޚުޠުބާގައިވަނީ ޢުމަރު ބުނު ޢަބްދުލަޢަޒީޒްގެ ޚަލީފާވެރިކަމުގައި ހުންނަވަނިކޮށް އެކަލޭގެފާނަށް ދެވުނު ހަދިޔާއެއް ޤަބޫލުފުޅު ނުކުރައްވަވައި އަނބުރާ ރައްދުކުރެއްވެވިކަމަށެވެ. އަދި މިފަދައިން ވިދާޅުވި ކަމަށެވެ.
"އެކަލޭގެފާނަށް (ރަސޫލް ﷺ އަށް) ދެވެނީ ހަދިޔާ ކަމަށެވެ. އަދި އަހަރެމެންނަށް ދެވެނީ ރިޝްވަތެވެ."
މިބަސްފުޅުން އެނގިގެންދަނީ ވެރިކަމުގައި ހުންނައިރު އެމީހަކަށް ދެވޭ ހަދިޔާއަކީ ރިޝްވަތުކަމެވެ.
މީގެ އިތުރުން ރަސޫލް ﷺ ޒަކާތްނަގަން ޙަވާލުކުރެއްވެވި މީހާގެ ވާހަކަވެސް ވަނީ ގެނެސްފައެވެ. އޭނާއެނބުރިއައިސް މިއީ ޒަކާތަށް ލިބުނު ތަކެތި ކަމަށާއި މިހިރީ ތިމަންނާއަށް ލިބުނު ހަދިޔާކަމަށް ވިދާޅުވުމުން ވަގުތުން މިންބަރަށް އަރާވަޑައިގެން ރަސޫލް ﷺ ކުރެއްވެވި ޙަދީޘްފުޅެވެ.
"ތިމަންކަލޭގެފާނު އެކިކަންތައްތައް ޙަވާލުކުރައްވަވައި ފޮނުއްވަވާ މީހުން މިއީ ތިއަބައިމީހުންގެ ތަކެއްޗެވެ. ދެން މިހުރީ ތިމަންނާއަށް ހަދިޔާއަށް ލިބުނު ތަކެއްޗެވެ ބުނަނީ ކީއްވެގެން ހެއްޔެވެ؟ އެމީހަކު އެމީހެއްގެ ބައްޕަގެ ނުވަތަ މަންމަގެ ގޭގައި އިންދައި، އެހަދިޔާ އާދޭތޯ ނިކަން އިނދެބަލާށެވެ. ތިމަންކަލޭގެފާނުގެ ނަފްސް އެކަލާނގެ ބާރުގެދަށުގައިވާ ކަލާނގެ ގަންދެއްވައި ވިދާޅުވަމެވެ. އެގޮތަށް ތިއަބަބައިމީހުންނަށް ލިބޭތަކެތި ކޮނޑަށްލައިގެން ތިބޭޙާލު ތިއަބައިމީހުން ޤިޔާމަތްދުވަހު ޙާޒިރުކުރެއްވޭހުއްޓެވެ!"
- މިއަދުގެ ޚުޠުބާއިން
