ރާއްޖޭގައި ކޮވިޑް ޢާއިގުޅިގެން ކަންކަން ޢާންމު ޙާލަތަކަށް ގެންގޮސް ހުރިހާ ހިފެހެއްޓުންތަކެއް ދޫކޮށްލާފައިވާއިރުވެސް ބައެއް މިސްކިތްތަކުގައި މިހާރުވެސް ސަފުހަދަނީ އެއްވެސް ބިރެއް ނެތި ދެމީހުންގެ ދޭތެރެއަށް ބޮޑެތި ޖާގަތައް ދޫކޮށް ސަފުބުރިބުރިކުރަމުންނެވެ.
ސަފުގައި ކޮނޑާއި ކޮނޑުޖައްސައިގެން ތިބެންޖެހޭކަން ނުއެނގޭ އިމާމުން ތިބިކަންވެސް ވަނީ ފާހަގަކުރެވިފައެވެ. އެހެންކަމުން ކަން އޮތްގޮތަށް ބަލައިލުން މުހިންމުކަން ފާހަގަކުރެވެއެވެ.
މާތް ﷲ ރުއްސުންލެއްވި އަބްދުﷲ ބުނު ޢުމަރު ކިބައިން ރިވާވެގެން ވެއެވެ. އެކަލޭގެފާނު ވިދާޅުވިއެވެ. رسول الله صلّي الله عليه وسلّم ހަދީޘްފުޅު ކުރެއްވިއެވެ.
من وصل صفاّ وصله الله ومن قطع صفاّ قطعه الله عزّ وجل (رواه احمد, وابوداود…..)
މާނައީ: ސަފެއް ގުޅުވައި ފުރިހަމަކޮށްފިމީހާ ﷲ އެކަލާންގެ ރަޙުމަތުން އޭނާ ގުޅުވާލައްވާނެއެވެ. އަދި ސަފެއް ކަނޑައިލައިފި މީހާ (އެބަހީ ސަފަކުން ބައެއް އުނިވުމުން އެތަން ފުރިހަމަ ނުކޮށްފިމީހާ) ﷲ އެކަލާންގެ ރަޙުމަތުން އޭނާ މަހުރޫމް ކުރައްވާނެއެވެ.
އަދި މާތްﷲ ރުއްސުންލެއްވި ޖާބިރު ބުނު ސަމުރާގެ ކިބައިން ރިވާވެގެން ވެއެވެ. އެކަލޭގެފާނު ވިދާޅު ވިއެވެ. އެއްދުވަހަކު (އަހުރެމެން ނަމާދަށް ސަފު ހަދައިގެން ތިއްބައި) رسول الله صلّي الله عليه وسلّم ވަޑައިގެން ހަދީޘް ފުޅު ކުރެއްވިއެވެ.
ألا تصفّون كما تصفّ الملاءكة عند ربّها މާނައީ: މަލާއިކަތުން ﷲ ގެ ހަޟުރަތުގައި ސަފު ހައްދަވާ ގޮތަށް ތިޔަބައި މީހުން ސަފެއް ނުހައްދަވާނަން ހެއްޔެވެ.؟ އަހުރެމެން ދަންނަވައިފީމެވެ. އޭ ﷲ ގެ ރަސޫލާއެވެ. ﷲ ގެ ހަޟްރަތުގައި މަލާއިކަތުން ސަފުހައްދަވަނީ ކިހިނެއްތޯއެވެ.؟
އެކަލޭގެފާނު ހަދީޘްފުޅު ކުރެއްވި ބަސްފުޅުގެ މާނާގައި ވެއެވެ. ”އެބޭކަލުން ފުރަތަމަ ސަފުތައް (އެބަހީ ސަފަކާޖެހި ސަފެއް) ފުރިހަމަ ކުރައްވަތެވެ. އަދި ސަފުގައި އެއްބޭކަލަކު އަނެއް ބޭކަލެއްގެ ގައިކޮޅުގައި ޖެހިވަޑައިގެން ގުޅިލައްވަތެވެ“ (رواه احمد ومسلم وابوداود والنّسا ءي وابن ماجه)
މަޢްލޫމާތު: ޑރ. މުޙައްމަދު އިޔާޟް ޢަބްދުއްލަޠީފް
