މީހަކު ކިތަންމެ ބޮޑު ފުރެއްދުމެއްގައި ހުރިނަމަވެސް އެމީހަކަށް ޘަނާކިޔައި އެމީހާ މަތިވެރިކޮށް އެމީހާކުރާ ނުބައިކަންކަން ދިފާޢުކޮށްދޭނެ މީހުން ތިބެއެވެ. ޚާއްޞަކޮށް ތަނަވަސްކަމުގެ އަހުލުވެރިންނާއި ސިޔާސީ މީހުންގެ ފަހަތުގައި މިފަދަ މީހުން ގިނަވެގެންދެއެވެ. އެއީ އެމީހުންގެ ކިބައިން ތިމާއަށް ލިބޭނެ މަންފާގެ ދަހިވެތިކަމުގައެވެ.
ފިރުއަޢުނު އޭނާއަކީ ކަލަކުކަމަށާއި އޭނާ ނޫން ފަރާތަކަށް އަޅުކަން ނުކުރުމަށް ގޮވާލައި އޭނާގެ ކަލާނގެވަންތަކަން ޤަބޫލުނުކުރި މީހުން ކަތިލައި، ޞަލީބަށް އަރުވައި މަރަމުން ގެންދިއައިރުވެސް އޭނާކުރަނީ ރަނގަޅުކަންކަން ކަމަށްބުނެ އޭނާ ދިފާޢުކޮށްދީ އޭނާއަށް ސަޖިދަކޮށް ޘަނާކިޔައި އުޅުނު މީހުން ތިއްބެވެ. އެކަންކަން އެމީހުން ކުރީ ފިރުއަޢުނުގެ ޖައްބާރުކަން ނުއެނގޭތީއެއް ނޫނެވެ. އޭނާގެ ކިބައިން ލިބިދާނެ މަންފާއެއްގެ ދަހިވެތިކަމުގައެވެ.
މިއަދުވެސް ދުނިޔޭގތެ ކަންކޮޅުތަކުން އަންނަނީ ހަމަ މިފަދަ ކަންކަން ފެންނަމުންނެވެ. އެކަން ފެންނަން ނެތް މުޖުތަމައުއެއް ދުނިޔެއަކު ނެތެވެ. އިސްތިސްނާ ކުރެވޭނެ އެއްވެސް މުޖުތަމައުއެއް ނެތެވެ.
މިއީ މިއަދު ކުރިމަތިވެފައިވާ އެންމެ ބޮޑު އެއް މައްސަލައެވެ. މީސްތަކުން މަގުފުރެދުން އިތުރުވަމުން އަންނަ އެއް މައްސަލައެވެ. އެމީހަކު ރުހޭ މީހާ ކޮންމެ ކަމެއް ކުރިނަމަވެސް އިސްލާމް ދީނާއިމެދު ނުބައި ބަސްބުނަމުންގޮސް ކުފުރުގެ ބަސްތައް ބުނެ ޝަރީކުކުރުމުންވެސް އެމީހާއަށް ތާއީދުކޮށް އެބަ ދިފާޢުކުރެއެވެ. ކޮންމެވެސް ތަނަކުން ޙުއްޖަތެއް ދަމައިނެރެ ދައްކައިގެން މީސްތަކުންނަށް ޙަޤީޤަތް އޮޅުވާލަން އެބަ މަސައްކަތްކުރެއެވެ.
މިއީ ކުރެވޭ ވަރަށް ބޮޑު ކުށެކެވެ. ﷲ ތަޢާލާގެ ޙަޟްރަތުގައި ޒިންމާ އުފުލައި ޖަވާބުދާރީވާންޖެހޭނެ ބޮޑުފާފައެކެވެ. މީގެ އިތުރުން އެފަދަ ކަންކަން ކުރުމަކީ އެކަންކަން ކުރާ މީހާއަށް އިތުރަށް އެފަދަ ކަންކަން ކުރަން ލިބޭ ބޮޑުހިތްވަރެކެވެ. ވީމާ މިބަޔާންކުރި ފަދައިން ކުށްތައްކުރާ މީހުންނަސް ތަޢްރީފްކޮށް ޘަނާކިޔާ މީހުންނަށް އެކުރެވޭ ކަމަކީ މީހަކު ފާފަކުރަން ހިތްވަރުދިނުމެވެ. އެކަމުގެ ޒިންމާވެސް ޤިޔާމަތް ދުވަހު ޖެހޭނީ އުފުލާށެވެ!
މީސްތަކުންނޭވެ! ކިތަންމެ ލޯބިވާ، ކިތަންމެ ތާއީދުކުރާ މީހަކު ނަމަވެސް ނުައިކަމެއް ކޮށްފިނަމަ ، ނުބައި ބަހެއް ބުނެފިނަމަ އެމީހާ ދިފާޢުކުރުމުގެ ބަދަލުގައި އެމީހަށް އެކުރެވުނީ ނުބައިކަމެއްކަން ވިސްނައިދޭށެވެ. އެމީހަކު ދެކެ ލޯބިވުމަކީވެސް، ހެޔޮއެދުމަކީވެސް އެމީހާގެ ކުރިމަތީގައި ޙައްޤުބަސް ބުނެ އެބާވަތުގެ ކަންކަމުން އެމީހަކު ސަލާމަތްކުރަން މަސައްކަތްކުރުމެވެ.
- އިސްލާމީ ތިލަފަތުގެ ދަރުސަކުން
