ދިރިއުޅުމުގައި އަބަދު ކުރިމަތިވާނީ އުފާވެރި ކަންކަމެއް ނޫނެވެ. ގިނަ މީހުންނަށް އެންމެ ގިނައިން ކުރިމަތިވާނީ ހިތްދަތިކަމެވެ. ދަތި އުނދަގޫ މައްސަލަތަކެވެ. ކަންބޮޑުވާންޖެހޭ ކަންކަމެވެ. މިއީ މިކަން ހިނގަމުން އަންނަ ގޮތެވެ. އަބަދު އުފަލުގައި ހުރެވޭނެ މީހަކު ހަމަ ވަރަށް، ވަރަށް މަދުވާނެއެވެ.
ހިތްދަތިވުމާއި މައްސަލަ ތައް ކުރިމަތިވުމުން ޙައްލުހޯދަން މަސައްކަތްކުރަންވާނެއެވެ. ނަމަވެސް ކުރާ އެންމެ ފުރަތަމަ ކަމަކީ ދެރަކްޢަތް ނަމާދެއްކުރުން ކަމުގައި ހަދާށެވެ. އެނަމާދުގައި ސަޖިދަ ކުޑަކޮށް ދިގުކޮށްލާށެވެ! ތިބާއަށް ކުރިމަތިވެފައިވާ ކަންބޮޑުވުމުގެ ވާހަތައް ﷲ ތަޢާލާއަށް ދަންނަވާށެވެ. އަދި މީހަކު ތިބާއަށް ދެރައެއް ނުވަތަ ގެއްލުމެއް ދޭން މަސައްކަތްކުރާކަމުގެ ބިރު އުފެދުނު ނަމަވެސް ޢަމަލުކުރަން އޮތީ ހަމަ މިމަގުންނެވެ.
އެންމެ ފުރިހަމަ ދުޢާތައް ހުރީ ޤުރްޢާނާއި ސުންނަތުގައި ޙަދީޘްފުޅުތަކުގައެވެ. އެހުރިހާ ދުޢާތަކެއް އަހަރެމެންނާއި ހަމައަށް އައިސްފައި އެވަނީ ﷲ ތަޢާލާ އެންމެ މަތިވެރިކުރެއްވެވި އިންސާނާ، ލޮބުވެތި ރަސޫލާ، މުޙައްމަދު ﷺ ގެ ދޫފުޅުންނެވެ. ދެތުންފަތްޕުޅު ދެމެދުންނެވެ. ވީމާ އެއަށްވުރެ ފުރިހަމަ ދުޢާތަކެއް ނުފެންނާނެއެވެ.
އެހެނަސް އެމީހަކަށް އެންމެ ފަސޭހަބަހަކުން އެމީހަކު ބޭނުންވާ ކަންކަމުގެ ވާހަކަތައް އެމީހަކަށް އެންމެ ރިވެތިކޮށް ދެންނެވޭ ޢިބާރާތަކުން ދަންނަވާށެވެ! ﷲ ތަޢާލާ ހުރިހާ ބަސްތަކެއް އެންމެ ފުރިހަމައަށް ދެނެވޮޑިގެންވެއެވެ.
މިއީ އަހަރެން ތިއަބައިމީހުންގެ ގާތުގައި ބުނާ ބަސްތަކެއް ނޫނެވެ. ﷲ ތަޢާލާ، އެކަލާނގެ ލޮބުވެތި ނަބިއްޔާ މުޙައްމަދު އަށް ވަހީކުރައްވަވާފައިވާ ބަސްފުޅެވެ. ކީރިތި ޤުރްއާނުގައި ބަޔާންކުރައްވަވާފައިވާ އެންގެވުމެކެވެ.
"ފަހެ، ކަލޭގެފާނުގެ ވެރި ރަސްކަލާނގެއަށް ޙަމްދާއެކު ތަސްބީޙްވިދާޅުވާށެވެ! އަދި ސަޖިދކުރާ މީހުންގެތެރެއިން ކަލޭގެފާނުވެވަޑައިގަންނަވާށެވެ!" (އަލްޙިޖްރް: 98)
އެއަސްފަހު ކުރަން އޮތީ އެންމެ މުހިންމު ކަންތަކެވެ.
"އަދި ކަލޭގެފާނުގެ އަރިހަށް ޔަޤީންވެގެންވާ ކަންތައް (އެބަހީ މަރު) އަތުވެއްޖައުމަށްދާންދެން، ކަލޭގެފާނުގެ ވެރިރަސްކަލާނގެއަށް، އަޅުކަންކުރައްވާށެވެ!" (އަލްޙިޖްރް: 99)
ވީމާ އަހަރެމެން ﷲ ތަޢާލާއަށް ޙަމްދުކޮށް ސުންނަތް ނަމާދުތައްކޮށް އަދި ތަސްބީޙް ކިޔަންވީ ހަމައެކަނި ކަމެއް ކުރިމަތިވުމަކުންނޫނެވެ. މަރު އައިސް ބައްދަލުކުރަންދެން ހުންނަންވީ އެކަންކަން ކުރުންމަތީގައެވެ.
- މުފްތީ މެންކުގެ ދަރުސަކުން
