ގިނަ ބައެއްގެ އެންމެ ބޮޑު ޝަކުވާޢަކަށްވެފައި އޮންނަނީ ކުރާ މަސައްކަތުން އެކަށީގެންވާ އާމްދަނީއެއް ނުލިބުމެވެ. ފިހާރައިން ވިޔަފާރިވިނަމަވެސް ރަނގަޅު ފައިދާއެއް ނުލިބުމެވެ. ލިބޭ މުސާރައިން ދެކޮޅު ނުޖެހުމެވެ.
މިފަދަ ކޮންމެ ކަމަކާއި ގުޅިގެންވެސް ފުރަތަމަވެސް ވިސްނައިލަންވީ ތިމާއަށް ﷲ އަށް ކިޔަމަންތެރިކަން އަދާކުރެވޭ މިންވަރަށެވެ. ތިމާއަށް ކުރެވޭ ފާފައަކީ ކޮބައިތޯއެވެ؟ އެކަންކަމަށްވިސްނުމަށްފަހު ފާފަކުރެވޭނަމަ އަވަހަށް އެކަން ހުއްޓައިލާށެވެ. އެކަމުގެ ބަދަލު ދެދުނިޔޭގައިވެސް އެމީހަކަށް ދެއްވަވާނެކަން އެއީ އަހަރެމެންގެ ލޯތަކަށް އެތައް ފަހަރަކު ދައްކަވައިދެއްވަޥާފައިވާ ކަންކަމެވެ.
ﷲ ތަޢާލާގެ މަގުގައި ހެޔޮ އަމަލުކުރުން މަތީގައި ދެމިހުރި މީހަކަށް އަދި ﷲ ތައާލާއަށްޓަކައި ޙަރާމް ކަމަކުން ދުރުވެގެންފި މީހަކަށް ހީވެސް ނުކުރެވޭނެ ހައި މަތިވެރި ނިޢްމަތްތައް ﷲ ތަޢާލާ ދެއްވަވާކަން އެއީ މިދުނިޔޭގައިވެސް ފެނި އަދި ފެންނަމުން އަންނަ ކަންކަމެވެ.
ސުލައިމާނުގެފާނު ﷲ ތަޢާލާއަށްޓަކައި އެކަލޭގެ ފާނުގެ އަސްކޮޅުތައް ދޫކޮށްލެއްވެވިއެވެ. ބަދަލުގައި ﷲ ތަޢާލާ ސުލައިމާނުގެފާނަށް ވައި ކިޔަމަންކޮށް ދެއްވެވިއެވެ. ޔޫސުފްގެފާނު ﷲ ތަޢާލާއަށްޓަކައި ހިލޭ އަންހެނެކާއިއެކު ގުޅުން ހިންގެވުން ދޫކޮށް ލެއްވެވިއެވެ. ބަދަލުގައި އެ ބޮޑު މިޞުރުގެ އެވަރުގަދަ ވެރިކަން ދެއްވެވިއެވެ.
ޞަޙާބީން ﷲ ތަޢާލާގެ މަގުގައި އެބޭކަލުންގެ ހުރިހާ މުދަލާއި ނަފްސް ޤްރްބާން ކުރެއްވެވިއެވެ. ބަދަލުގައި ﷲ ތަޢާލާ އެބޭކަލުންނަށް ސުވަރުގޭގެ މަތިވެރި ނިޢްމަތް މިންވަރު ކުރައްވަވާނެއެވެ.
ޞަހާބީންނަށް މިދުނިޔޭގައި ނުދެއްވެވީ ކީއްވެގެން ހެއްޔެވެ؟ އެބޭކަލުން މިދުނިޔޭގައި އެއްވެސް ނިޢްމަތެއް ބޭނުންފުޅެއް ނުވާތީއެވެ. އެބޭކަލުން ބޭނުންފުޅުވީ ހަމައެކަނި ﷲ ތަޢާލާގެ ރުއްސެވުމާއި ސުވަރުގެއެވެ.
ސުލައިމާނުގެފާނަށާއި ޔޫސުފްގެފާނަށް މިދުނިޔޭގައި އެ ނިޢްމަތްތައް ދެއްވެވީ އެބޭކަލުން ސުވަރުގެ އެދިވަޑައި ނުގަންނަވާތީއެއް ނޫނެވެ. ﷲ ތައާލާއަށްޓަކައި ކުރާ ކަންކަމުގެ ބަދަލު މިދުނިޔޭގައި ވެސް އަދި އާޚިރަތުގައި ވެސް ދެއްވަވާނެކަން މީސްތަކުންގެ ލޯތަކަށް ދެއްކެވުމަށެވެ. އެކަންކަމުން ޢިބްރަތް ޙާޞިލުކުރުމަށެވެ.
ވީމާ އަހަރެމެންނަށް އޮތީ މިފަދަ ކަންކަމަށް ވިސްނައި ފިކުރުކުރުމެވެ. ޢިބްރަތްޙާޞިލުކޮށް ދެ ދުނިޔެ ހޯދަން ގަދައަޅައި މަސައްކަތް ކުރުމެވެ. ﷲ ތަޢާލާގެ މަގުގައި ސާބިތުވުމުން އިތުރަށް ވިސްނަން ޖެހޭނެ އެއްވެސް ކަމެއް ނުއޮންނާނެއެވެ.
- އުސްތާޛް ވައްހާޖް ޠަރިންގެ ދަރުސަކުން
