މީސްތަކުން ކުރާ ޢަމަލުތައް ގުޅިފައިވަނީ އެމީހުންގެ ހިތާއިއެވެ. ހެޔޮ ޢަމަލުތައް ކުރެވޭނީވެސް އަދި ހެޔޮ ޢަމަލެއް ކުރެވުމުން އެކަމުގެ ހިތްހަމަޖެހުން ލިބޭނީވެސް އެމީހާގެ ހިތަކީ ދިރިހުރި ހިތެއް ނަމައެވެ.
ހަމަ އެއާއިއެކު ފާފަކުރާ މީހުންނާއިއެކުގައި އުޅުމަށް ބިރުވެތިވެވޭނީވެސް އަދި ފާފައެއްކުރަން ބިރުވެތިވެވޭނީވެސް އެމީހާގެ ހިތަކީ ދިރިހުރިހިތެއް ނަމައެވެ. ފާފައެއް ކުރެވިއްޖެނަމަ އެކަމަށް ދެރަވެ ހިތާމަކުރެވޭނީވެސް އަދި ތައުބާވާން އަވަސްވެގަނެވޭނީވެސް އެމީހާގެ ހިތަކީ ދިރިހުރި ހިތެއް ނަމައެވެ. މީހާ ދިރިހުރިނަމަވެސް ހިތް މަރުވުމުން މިފަދަ އެއްވެސް އަސަރެއް އެހިތަކަށް ނުކުރާނެއެވެ.
ތިމާއަށް ބާރުވެރިކަން ލިބިފައިވާނަމަ އަނބިދަރިންނަށާއި މީސްތަކުންނަށް އަނިޔާވެރިވަނީވެސް ހިތްމަރުވެފައިވާ މީހުންނެވެ. ތިމާއަކީ މާމޮޅު މީހެއްކަމަށާއި އެހެންއެންމެންނަކީ ތިމާ ހެދިހައި ގޮތެއް ހެދެން ތިބި ތިމާގެ އަޅުންކަމަށް ޤަބޫލުކުރެވެނީ ހިތް މަރުވެފައިވުމުންނެވެ. އަދި މައިންބަފައިންނަށް ނުކިޔަމަންތެރިވެ އަޅާނުލައި، ރަޙިމުގެ ގުޅުން ކަނޑައިގެން އުޅެނީވެސް ހިތްމަރުވުމުންނެވެ.
މިފަދަ ހުރިހާ ކަންކަންވުމަށް މެދުވެރިވާ ސަބަބަކީ ހިތް މަރުވުމުން ހިތަށް އެއްވެސް އަސަރެއް ނުކުރަނީއެވެ. ﷲ ތަޢާލާގެ ވަޙީބަސްފުޅުތައް އެއްވެސް އެއްޗަކަށް ނުވަނީއެވެ.
الشيخ علي بن عبد الرحمن الحذيفي –حفظه الله ވިދާޅުވެފައިވެއެވެ.
"ދިރިހުރި ހިތަކީ ހެޔޮ ކަންކަމުގެ އަސަރު އެހިތަށްކުރުވާ އަދި ނުބައި ކަންކަމަކީ ނުބައިކަމެއްކަމުގައި ދެނެގަންނަ ހިތެވެ. އަދި މަރުވެފައިވާ ހިތަކީ ފާފަކުރުމުން އެހިތަށް ތަދުނުވާ އަދި އެކަމުގެ އިހުސާސްވެސް ނުކުރެވޭ ހިތެވެ. އަދި ހެޔޮކަމެއް ކުރުމުން އަދި ކިޔަމަންތެރިކަން އަދާކުރުމުން އުފާވެސް ނުވާނެއެވެ. އަދި ފާފަތަކަށްވ ޢުޤޫބާތްވާކަމުގެ އަސަރުވެސް ނުކުރާނެއެވެ. އަދި ޞިއްޙަތާއި ދުނިޔަވީ ކަންތައްތައް ލިބިފައިވާނަމަ އެފަދަ މީހަކު (ހިތް މަރުވެފައިވާ މީހުން) ކެހިވެރިވާނެއެވެ. އަދި އޭނައަށް ލިބިފައިވާ ނިޢުމަތްތަކަކީ އޭނާގެ މާތްކަމުން ލިބުނު އެއްޗެއްކަމަށް ހީކުރެއެވެ."
- އިސްލާމީ ތިލަފަތުގެ ދަރުސަކުން
