ރާއްޖޭގައި އިސްލާމް ދީން ޙިމާޔަތްކުރަން މަސައްކަތްކުރުމުގައި އެންމެ އިސް ސަފުގައި ތިބެންޖެހޭނީ އެމްއެންޔޫގެ ލެކްޗަރަރ އިން ކަމަށާއި އިސްލާމް ދީން އުނގަންނައިދޭ ލެކްޗަރަރއިންނަށް އިތުރަށް ވާޖިބުވެގެންދާކަމަށް ޑރ. މުޙައްމަދު އިޔާޟް ޢަބްދުއްލަޠީފް ވިދާޅުވެއްޖެއެވެ.
މިއަދުނޫހަށް މައުލޫމާތުދެއްވަމުން ޑރ. އިޔާޟް މިރޭ ވިދާޅުވީ އެމްއެންޔޫއަކީ ރާއްޖޭގައި ހުރި އެންމެ ބޮޑު އަދި އެންމެ ދަރިވަރުންގިނަ ޔުނިވަރސިޓީކަމަށްވެފައި އެއީ ޤައުމީ ޔުނިވަރސިޓީކަމަށްވުމުން އެޔުނިވަރސިޓީގެ ލެކްޗަރައިންގެ ޒިންމާ މިކަމުގައި އިތުރުވެގެންދާ ކަމަށެވެ.
"އިސްލާމް ދީނުގެ ކަންކަން އޮޅުންފިލުވައި ދިނުމާއި ދިވެހިންގެ ތެރެއަށް އެހެން ދީންތަކުގެ ޘަޤާފަތްތައް ގެނެސް ވެއްދުން ފަދަކަންމާއި ދެކޮޅަށް މިވަނީ ވަރުގަދައަށް މަސައްކަތްކުރަންޖެހިފަ. އިސްލާމް ދީން ހީނަރުކުރަން އެގެންދަނީ ކެނޑިނޭޅި، ބޮޑެތި ވަރުގަދަ ޙަމަލާތައް ދެމުން. ޒުވާން ޖީލަށް އިސްލާމް ދީނުގެ އަސްލުތައްވެސް އެގެންދަނީ ވަރަށް ބޮޑަށް އޮޅުވައިލަމުން. ރާއްޖޭގެ މީޑިއާތައް ބޭނުންކޮށްގެން އިސްލާމް ދީން ބަލިކަށިކުރަން އެގެންދަނީ މަސައްކަތްކުރަމުން. ދެން މިކަންކަމާއި ދެކޮޅަށް އެމްއެންޔޫގެ ލެކްޗަރަރ އިން ނުނުކުމެ ކޮންބައެއްތޯ ނުކުންނަންވީ؟" ޑޜ. އިޔާޟް ސުވާލުކުރެއްވިއެވެ.
"އެއީ ތެދުވާހަކައެއް! އަޅުގަނޑަށް އިންޒާރެއްވެސް ދީފި. ނަޞޭޙަތެކޭވެސް ބުނެފާނެ! އެކަންކުރީ ކްރިސްމަސް ފާހަގަކުރުމާ ދެކޮޅަށް އަޅުގަނޑު ކުރި މަސައްކަތް ޙަޖަމްނުކުރެވިގެން. އެހެން ނޫންތޯވާނީ؟ ބަނގުރާބުއިމުގެ މައްސަލަ ހުރި މީހުން ބޯޑުގައި އެބަތިބި. ދެން ކިހިނެއްތޯ އަޅުގަނޑުމެން މިކުރާ މަސައްކަތް ހަޖަމްކުރާނީ؟ ވައިސް ޗާންސެލަރަކީ ސަރުކާރު ހިންގާ ޕާޓީގެ އެކްޓިވިސްޓެއް!"
ޑރ. އިޔާޟް ވިދާޅުވީ ކިތަންމެ ވަރުގަދަ އިންޒާރުތަކެއް ކިތަންމެ ގިނައިން ދިންކަމުގައިވީނަމަވެސް ރާއްޖޭގައި އިސްލާމް ދީން ޙިމާޔަތްކުރައްވަން ކުރައްވާ މަސައްކަތުގައި އެންމެ މިލިމީޓަރެއްވެސް ފަހަތަށް ޖެހިވަޑައިނުގަންނަވާނެ ކަމަށެވެ.
