އަހަރެމެންގެ ތެރެއިން ބައެއް މީހުންނަކީ ހިތާއި އަމަލުތައް ވަރަށް ބޮޑަށް ތަފާތުކުރާ ބައެކެވެ. ހިތުގައި އިސްލާމް ދީނަށް ލޯބި ނެތި، ﷲ ތަޢާލާއަށް ޝައްކުކުރަމުން ތިމާއަކީ ފުރިހަމައަށް އިސްލާމްވެގެންހުރި މުސްލިމަކުކަމުގައި އެބަ ބުނެއެވެ.
އަނެއް ބައަކު ތިމަންމެންނަނަކީ މުސްލިމުންކަމަށް ބުނަމުން އިސްލާމް ދީނުގެ ޢަދާވާތްތެރިނެގެ ކަންކަމަށް އެބަ ތާއީދުކުރެއެވެ. އެފަދަ މީހުންގެ ގާތަށްގޮސް އެމީހުންގެ ރުހުން ހޯދަން އެބަ މަސައްކަތްކުރެއެވެ. އެފަދަ މީހުން ދައްކާ ވާހަކަތަކަށް އެބަ ތާއީދުކުރެއެވެ.
މިފަދަ ކޮންމެ ކަމަކީ މުނާފިޤުންގެ ސިފައެކެވެ. އެފަދަ މީހުންނަށް 3 މަރުޙަލާގައިވެސް ގަދަފަދަ ޢަޛާބު ދެއްވަވާނެތެވެ.
"..ތިމަންރަސްކަލާނގެ އެއުރެން ދެނެވޮޑިގެންވަމެވެ. ތިމަންރަސްކަލާނގެ އެއުރެންނަށް ދެފަހަރު ޢަޖާބު ދެއްވަވާހުށީމެވެ. ދެން ބޮޑުވެގެންވާ ޢަޛާބެއްގެ ތެރެއަށް އެއުރެން ރައްދުކުރައްވަވާ ހުއްޓެވެ." (އައްތައުބާ: 101)
ޢިލްމުވެރިން ބަޔާންކުރައްވަވާ ގޮތުގައި މި އާޔަތުގެ މާނައަކީ އެފަދަ މީހުންނަށް 3 މަރުޙަލާއެއްގައި ގަދަފަދަ ޢަޛާބު ދެއްވަވާނެ ކަމެވެ. އެއީ 1 ދުނިޔޭގައި އެމީހަކު ނިކަމެތި ކުރައްވަވާނެކަމާއި 2 ކައްވަޅުގައި ޢަޖާބު ދެއްވަވާނެކަމާއި 3 ޤިޔާމަތް ދުވަހު ނަރައަށް ވައްދަވާނެކަމެވެ.
ވީމާ މުސްލިމުން ތިބެންޖެހޭނީ ފިސާރި ސާބިތުކަންމަތީގައެވެ. މުނާފިޤަކަށްވެދާނެ އެންމެހައި ކަންކަމުން ދުރުހެލިވެގެންނެވެ. މިއާޔަތުގައި މިވާ 3 މަރުޙަލާގެ ޢަޛާބުން ސަލާމަތްވެވޭނީ އެއިރުންނެވެ.
- ބިލާލް އަސްއަދުގެ ދަރުސަކުން
