އަހަރެމެންގެ ތެރެއިން ވަރަށް ގިނަ ބައަކު ކޮންމެ ދުވަހަކުހެން، އެހައިވެސް ގިނައިން ޤިޔާމަތްވުމުގެ ޢަލާމާތްތައް ފައުޅުވަމުން އަންނަކަމުގެ ވާހަކަ ދައްކައެވެ. ކަންބޮޑުވާކަމަށްވެސް ބުނެއެވެ.
އަަހަރެން ޤަބޫލުކުރާ ގޮތުގައި އެކަންކަމަށް ކޮންމެ މީހަކުވެސް ވިސްނަންވެސް ޖެހޭނެއެވެ. އަދި ކަންބޮޑުވާންވެސް ޖެހޭނެއެވެ. ނަމަވެސް ފެންނަމުންދާ ޢަލާމާތްތައް ގުނަން ތިބޭނެ ވަގުތެއް ނެތެވެ. އަދި ހަމައެކަނި އެކަން ކުރުމަކުން، އެކަމުން ކުރާނެ ފައިދާއެއްވެސް ނެތެވެ.
އެހެނީ ޤިޔާމަތްވާނެ ވަގުތާއިބެހޭގޮތުން ސުވާލުދެންނެވި ޞަޙާބީއަށް ރަސޫލް ﷺ ޙަދީޘްފުޅުކުރެއްވެވީ ސުވާލެކެވެ. "އެކަމަށް ތައްޔާރުވާން ތިބާކުޅައީ ކޮންކަމެއް ހެއްޔެވެ؟" މިފަދައިންނެވެ.
ދުނިޔެއާއިމެދު ޣާފިލުވެގެން ދުނިޔޭގައި އުޅޭ މީހުންގެ ފުރާނަ ހިއްޕަވާހިނދު އޭނާގެ އަޖަލުހަމަވެއްޖެކަމާއި ދާންޖެހޭނީ ނަރަކައަށްކަން އޭނާއަށް އެނގޭނެއެވެ. ހެޔޮ ޢަމަލުކުރަން އިތުރުވަގުތަސް އެދޭނެއެވެ. ނަމަވެސް އެންމެ ހިނދުކޮޅެއްވެސް ﷲ ތަޢާލާ ނުދެއްވަވާނެތެވެ. މިކަންކަމަކީ ކީރިތި ޤުރްއާނުން އެނގެންހުރި ކަންކަމެވެ. ވަރަށް ސާފު ޢިބާރާތުން ބަޔާންކުރައްވަވާފައިވާ ކަންކަމެވެ.
ފްލައިޓްތަކުގައި ދަުރުކުރާ މީހުންނަށް ރަނގަޅަށް މިކަން އެނގޭނެއެވެ. މައްޗަށް އަރާވަރަކަށް ދުނިޔެ ފެންނާނީ ކުޑަކޮށެވެ. ދުނިޔެ ފެންނަ މިންވަރު ދާނީ ކުޑަވަމުންނެވެ. އީމާންކަމަކީވެސް ހަމަ އެފަދަ ކަމެކެވެ. އީމާންކަމުގައި ސާބިތުވާވަރަކަށް ދުނިޔޭގެ އެދުންތައް ދާނީ ކުޑަވަމުންނެވެ. ކުޑަވަމުންގޮސް ނެތިގެންވެސްދާނެއެވެ.
އެފެންވަރަށް އީމާންކަން ކުރިއެރުމުން ދުނިޔެއިން ބޭނުންވާނީ ހަމައެކަނި ދިރިއުޅެލެވޭނެ މިންވަރެކެވެ. ހުރިހާ ސަމާލުކަމެއް ދެވޭނީ އާޚިރަތަށެވެ. ކަންބޮޑުވާނީ އާޚިރަތާއިމެދުގައެވެ. ގަދައަޅައި މަސައްކަތްކުރަންވީ އާޚިރަތަށެވެ.
އަބަދުވެސް ބުނާފަދައިން މަރުވުމުން އެމީހަކަށް ޤިޔާމަތްވީއެވެ. ދައްޖާލު ފައުޅުނުވުމަކުން، ޢީސާގެފާނު އަދި ފައިބައިވަޑައިނުގެން އޮތުމަކުން އެމީހަކަށް ކުރާނެ އެއްވެސް މަންފާއެއް ނެތެވެ.
- ބިލާލް އައްސަދުގެ ދަރުސަކުން
