އަހަރެން ޖެހީ ސިނޯފާމް ކޮވިޑް ވެކްސިންއެވެ. އަހަރެން ވެކްސިން ޖެހި ޚަބަރު ސޯޝަލް މީޑިއާގައި ބައަކު ހާމަކުރުމުން އެކަމާމެދު ގިނަ ބައަކު ފާޑުކިޔާފައި ހުއްޓެވެ.
އެމީހުންނަށް އަހަރެން ބުނަން އޮތީ:
ސުވަރުގެ ވަދެވޭނީ ﷲ ތަޢާލާ ވެއްދެވުމުންނެވެ. ނަމަވެސް އެހެނޭކިޔާފައި ސުވަރުގެ ވަންނަން މަސައްކަތްނުކޮށް އަތްއުރާލައިގެން ގޭގައި ތިބުމެއް ނެތެވެ. އޮތީ ސުވަރުގެ ވަންނަން ގަދައަޅައި މަސައްކަތްކުރުމެވެ.
ވެކްސިންގައި އޫރާއި ބަނގުރަލާއި އަދި އެނޫންވެސް މުސްލިމުންނަށް ހުއްދަ ނޫން ބާވަތްތައް ހުންނަކަމަށާއި ވެކްސިން ޙަރާމްކަމަށް ދެކެވޭ ވާހަކަތަކަކީ އަހަރެން ޤަބޫލުކުރާ ވާހަކަތަކެއް ނޫނެވެ. އެއީ ހަމަ ބައަކުކުރާ ތުހުމަތުތަކެވެ. އެހެންވެ ކޮންމެހެން ޖަހަންޖެހޭ ވެކްސިންތައް އަބަދުވެސް މިއަންނަނީ ޖަހަމުންނެވެ.
މިފަދަ ވާހަކަ ދައްކާ މީހުންނަށް ބުނަން އޮތީ ބަލިވުމުން ޑޮކްޓަރީ ބޭސްވެސް ޙަކީމީ ބޭސްވެސް ބޭނުންކުރަނީ ކީއްކުރަން ހެއްޔެވެ؟ ރޯގާ ޖެހުމުން ލުނބޯ ބޭނުންކުރަނީ ކީއްކުރަންހެއްޔެވެ؟ ލުނބޮޔަކަސް ކޮށްދެވޭނީ ކޮންކަމެއް ހެއްޔެވެ؟ މަރުވުމުގެ ވަގުތު ޖެހުމުން މަރުވާނެކަމަށް ބަލައިގެން އެއްވެސް ފަރުވާއެއް ނުހޯދައި ނުހުރެ ފަރުވާ ހޯދަނީ ކީއްކުރަންހެއްޔެވެ؟
ބަލިތަކުން ޝިފާ ހޯދަން ކަޅުދިރި ބޭނުންކުރަން ރަސޫލް ﷺ ޙަދީޘްފުޅު ކުރެއްވެވީ ކީއްވެގެން ހެއްޔެވެ؟ ކަޅުދިރި އާއި ނުލައި ﷲ ތަޢާލާއަށް ޝިފާ ނުދެއްވެވޭނީ ހެއްޔެވެ؟
ކޮންމެއަކަސް ޗައިނާގެ ސިނޯފާމް ވެކްސިން އަހަރެން އިޚްތިޔާރުކުރީ އެހެން ކުންފުނިތަކުގެ ވެކްސިނަށްވުރެ އަހަރެން އެ ވެކްސިނަށް އިތުބާރުކުރާތީއެވެ. އެވެކްސިން އުފެއްދި މުއައްސަސާއަށް އަހަރެން އިތުބާރުކުރާތީއެވެ.
ދެން ބުނެލަން އޮތީ ވެކްސިން ޖެހުމުން އެއްވެސް އުނދަގުލެއް އަހަރެންނަށް ނުވާކަމެވެ. އަހަރެންގެ ޞިއްހަތަށް އެއްވެސް ބަދަލެއް ނުއަންނަކަމަށެވެ. މިވާހަކަތައް މިދެއްކީ އަހަރެން ވެކްސިން ޖެހުމުން އެކަމަށް ފާޑުކީ މީހުން ގިނަކަމުން ބައަކަށް އޮޅުނަތްކެއް އަރައިފާނެތީ ކަންކަން ސާފުކޮށްލައި ދިނުމަށެވެ.
- މުފްތީ މެންކްގ ދަރުސަކުން
