ކީރިތި ޤުރްއާނުގެ އެތައް ތަނެއްގައި ﷲ ތަޢާލާ ވަޙީކުރައްވަވާފައިވަނީ މިދުނިޔޭގައިވެސް އަދި އާޚިރަތުގައިވެސް އެމީހަކަށް ކަންކަން ޙާޞިލުވުންއޮތީ އެމީހަކުކުރި މަސައްކަތަކުން ކަމަށެވެ. ކަންކަން ޙާޞިލުކުރަން އެމީހަކަށް ކުރެވެން އޮތްވަރަކުން ގަދައަޅައި މަސައްކަތްކުރާ މީހަކަށް ﷲ ތަޢާލާ މިންވަރު ކުރައްވަވާނެ ނިޢްމަތްތައް ހަމައެކަކަށްވެސް ނުއެނގޭނެއެވެ.
ބަލިތަކުން ސަލާމަތްވާން ކުރެވެން އޮތް ކޮންމެ މަސައްކަތެއްވެސް ކުރަންޖެހެއެވެ. ބަލިވުމުން ސަލާމަތްވެހުންނަން މަސައްކަތްކުރަންޖެހެއެވެ. ބަލިވުމުން ބޭސްފަރުވާކުރަންޖެހެއެވެ. ބަލިތކުން ޝިފާ ދެއްވަވާނީ ﷲ ތަޢާލާކަމަށް ބުނެ އަތްއުރާލައިގެން ގޭގައި ތިބުމެއްވެސް ނެތެވެ. އެކަންވާނީ ކުރެވޭ މޮޔަކަމަކަށެވެ!
ﷲ ތަޢާލާއަށް ވަކީލްކުރުމަކީ އެއީއެވެ. ރަސޫލް ﷺ އަހަރެމެނެންނަށް އުނގަންނަވައި ދެއްވަވާފައިވަނީ (ޙަދީޘްފުޅުކުރެއްވެވީ) ޖަމަލު އައްސާފައި ﷲ ތަޢާލާއަށް ވަކީލްކުރުމަށެވެ. ﷲ ތަޢާލާއަށް ވަކީލްކުރަން އޮތީ ގޭގެ ދޮރުތައް ލައްޕައި ތަޅުލުމަށްފަހުގައެވެ.
އޮތީ ވަޒީފާ ހޯދަން މަސައްކަތްކުރުމެވެ. ރިޒުޤް ހޯދަން މަސައްކަތްކުރުމެވެ. ތިމާއަށް ކަނޑައަޅުއްވަވާފައިވާ ރިޒްޤް ﷲ ތަޢާލާ ދެއްވަވާނެކަމަށް ބަލައި އެކަމަށް މަސައްކަތްނުކޮށް ހުރުމެއްވެސް ނެތެވެ.
- މުފްތީ މެންކުގެ ދަރުސަކުން
