އިސްލާމީ މުޖުތަމަޢުތަކުގެތެރެއިން ބައެއް މުޖުތަމައުތަކުގައި ފާހިޝް އަމަލުތައް ކުރުމުން އަދަބުދެއެވެ. އަނެއްބައި މުޖުތަމައުތަކުގައިވަނީ އަދަބުދޭން ނުކުޅެދިފައެވެ. އަދަބުދޭ މުޖުތަމަޢުތަކުގައި ފާހިޝް ޢަމަލުކުރުން މަދެވެ. އަދަބުނުދޭ މުޖުތަމައުތަކުގައި އެފަދަ ޢަމަލުތައް ކުރުން ދަނީ އިންތިހާއަށް އިތުރުވަމުންނެވެ.
ﷲ ތަޢާލާ އަމުރުފުޅު ކުރައްވަވާފައިވަނީ މިފަދައިންނެވެ!
"އަދި، ތިއަބައިމީހުންގެތެރެއިން ފާހިޝް ޢަމަލުތައް ގެނެސްގަންނަ ދެމީހުންނަށް ތިއަބައިމީހުން އަދަބުދޭށެވެ! ފަހެ، އެދެމީހުން ތައުބާވެ، އަދި، އެއުރެންގެ ޢަމަލު އިޞްލާޙްކޮށްފިނަމަ، އެދެމީހުންގެކިބައިން ދުރުވެގަންނާށެވެ! (އެބަހީ: އަދަބުދިނުން ހުއްޓައިލާށެވެ!) ހަމަކަށަވަރުން ﷲ އީ ގިނަގިނައިން ތައުބާ ޤަބޫލުކުރައްވަވާ ރަޙީމްވަންތަ ރަސްކަލާނގެއވެ!" (އައްނިސާ: 16)
ފާހިޝް ޢަމަލު ކުރުމުން އެމީހަކު ކުރި ފާފައަށް ބަލައި އަދަބުދޭންޖެހޭ ގޮތާއި އަދަބުދޭންޖެހޭ މިންވަރު އިސްލާމީ ޝަރީޢަތުގައި ވަރަށް ސާފުކޮށް އެނގެން އެބަ އޮތެވެ! ވީމާ ީރިތި ޤުރްއާނުގައި މިއާޔަތްއޮތްކަން ނޭނގޭ، މިއާޔަތަށް ޢަމަލުނުކުރާ މުޖުތަމައުއެއްގައި ފާހިޝް ޢަމަލުތަކާއި މުންކަރާތްތައް ނުކުރަން ހުކުރު ޚުޠުބާގައި ކިޔުމުން ކުރާނީ ކޮންފައިދާއެއް ހެއްޔެވެ؟ އެބާވަތުގެ ޢަމަލުކުރާ މީހުން ޢާންމުގޮތެއްގައި ޚުޠުބާގެ އަޑު ނުވެސް އަހާނެއެވެ. ހުކުރަށް ދިއަނަމަވެސް ދާނީ ޚުޠުބާކިޔައި ނިމޭފަހުންނެވެ.
ވަކިކަމެއް ވަކިގޮތަކަށް ކުރަން ﷲ ތައާލާ ކީރިތި ޤުރްއާނުގައި އަމުރުފުޅުކުރެއްވެވުމުން އެކަން ތަންފީޒުނުކުރާނަމަ އެއީ ފައުޅުގައި ކީރިތިނ ޤުރްއާނަށް ގޮންޖެހުމެވެ. އެބުނަނީ ﷲ ތަޢާލާ ބާވައިލެއްވެވި ޙުކުމްފުޅުތައް ކަމުނުދާ ވާހަކައެވެ. މާމޮޅު ގޮތް ތިމާމެންނަށް އެނގޭކަމަށެވެ.
ސުވާލަކީ މިހެން މިބުނަނީ ކާކުހެއްޔެވެ؟ ޖަވާބަކީ ﷲ ތަޢާލާގެ އަޅެކެވެ. އެމީހާގެ މައްޗަށް ހުރިހާ ބާރުތަކެއް ލިބިވޮޑިގެންވަނީ ﷲ ތަޢާލާއަށް ކަމަށް ޤަބޫލުކުރާކަމަށް ދުލުން ބުނަމުން ޢަމަލުން އެކަން ތަންފީޒުނުކުރުމުން މިކުރެވެނީ ކީއްހެއްޔެވެ؟
ފާހިޝް އަމަލުތައްވެސް އަދި އެހެން ފާފަތައް ކުރުން ހުއްޓުވޭނީ އަދި މަދުކުރެވޭނީވެސް ފާފަކުރާ މީހުންނަށް ކީރިތި ޤުރްއާނުގައި ބަޔާންވެގެންވާ ގޮތަށް ޢަމަލުކޮށްގެންނެވެ. ހަމައެކަނި ގޮވައިލެވޭ ގޮވާލުމަކުން އެއްވެސް ކަމެއް ޙައްލެއް ނުކުރެވޭނެއެވެ! އެއިގެ ބަދަލުގައި އެތަމްރީނުކުރެވެނީ ދައްޖާލަށް މަރުޙަބާކިޔާނެ މީހުންނެވެ!
- އިސްލާމީ ތިލަފަތުގެ ދަރުސަކުން
