ކަންބޮޑުވާންޖެހޭ މައްސަލަތައް ކުރިމަތިވަނީ ހަމައެކަނި ތިބާއަށް ކުރެވޭ ނުބައި ޢަމަލެއްގެ ސަބަބަކުން ނޫނެވެ. އެއީ އިންސާނަކަށްވީތީ ކޮންމެ އިންސާނަކަށް ވެސް ކުރިމަތިވާނެ ކަމެކެވެ. އެކަން ކީރިތި ޤުރްއާނުން އެނގެން އޮތްއިރު ކަންބޮޑުވާ ކަންކަން ކުރިމަތިވަނީ ހަމައެކަނި ތިމާއަށް ކުރެވޭ ނުބައި ޢަމަލެއްގެ ސަބަބުން ކަމަށް ދެކެގެންނުވާނެއެވެ.
އަދި އެފަދަ ޙާލަތެއް މެދުވެރިވި ނަމަވެސް ކަންބޮޑުވެގެންވެސްނުވާނެއެވެ. އެކަމާއި ވިސްނަމުން ގޮސް އަމިއްލަ ނަފްސަށް އެކަމުން ގެއްލުން ލިބޭ މިންވަރަށް ވިސްނުމެއްވެސް ނެތެވެ.
ތަޤްވާވެރިކަމުގައި ކުރިއަރައި ދިއުމަކީ ކަންބޮޑުވާންޖެހޭ އެއްވެސް ކަމަކާއި ކުރިމަތިލާން ނުޖެހޭނެ ސަބަބެއްނަމަ އަހަރެމެންގެ ލޮބުވެތި ނަބިއްޔާ މުޙައްމަދު ﷺ އަށް އެފަދަ ކަންކަން ކުރިމަތިވެޑައެއް ނުގަތީހެވެ. އަދި ޞަޙާބީންނަށްވެސްމެއެވެ.
އެހެންކަމާއިއެކުވެސް ކަންބޮޑުވާންޖެހޭ ކަމެއް ކުރިމަތިވެއްޖެނަމަ ތައުބާވުން ގިނަކުރަންވާނެއެވެ! ޛިކުރުކުރުން ގިނަކުރަންވާނެއެވެ. ﷲ ތަޢާލާ ޢާއި ކުއްތަންވުމަށް ކުރާ މަސައްކަތް އިތުރުކުރަންވާނެއެވެ! އެއީ އެޙާލަތުން ސަލާމަތްވުމަށް އޮތް މަގުކަމުގައިވާތީއެވެ! ރަސޫލް ﷺ ވެސް އެމަގުން ކަންކަން ކުރެއްވެވީތީއެވެ.
ވީމާ ކަންބޮޑުވާންޖެހޭ ޙާލަތެއްގައި މީހަކުވާނަމަ އެމީހަކީ ފާފަކުރާ މީހެއްކަމަށް ބުނެގެން ނުވާނެއެވެ! އެކަން މެދުވެރިކުރެއްވެވި ސަބަބު ދެނެވޮޑިގެންވަނީ ހަމައެކަނި ﷲ ތަޢާލާއެވެ. އަހަރެމެންނަށް އޮތީ އެމީހާ ކުށްވެރިކުރުމެއް ނޫނެވެ! އެމީހާއަށްޓަކައި ހެޔޮ ދުޢާކުރުމެވެ. އެފަދަ ކަމެއް މެދުވެރިކުރެއްވެވުމަކީ ލެއްވެވި ރަހްމަތަކަށްވެސް ވެދާނެއެވެ!
- ޑރ. ޔާސިރު ޤާދީގެ ދަރުސަކުން
