މިއަދުގެ ގިނަ ޒުވާނުންނަށް ޝައިޠޯނާގެ ކިބައިން ސަލާމަތްނުވެވެނީ އެވަރަށް ހުޝިޔާރު ނުވެވޭތީއެވެ. އެވަރަށް ހުޝިޔާރުވުމުގެ އެންމެ ބޮޑުބާރަކީ ދީނުގެ ޞައްޙަ މައުލޫމާތު ލިބުމެވެ. ދީނުގެ ޞައްޙަ މައުލޫމާތު ލިބިގެން ހުރުމަކީ ޝައިޠޯނާގެ ކިބައިން ސަލާމަތްވުމަށް އޮތް އެންމެ ފަސޭހަމަގެވެ.
މިސާލަކަށް އެންމެ ގިނަ ޒުވާނުން މަގުފުރައްދައިލަން ޝައިޠޯނާ ބުނާނީ އޭނާއަކީ ވަރަށް ޒުވާން މީހެއްކަމަށާއި ތައުބާވުމުގެ ފުރުޞަތު ވަރަށް ބޮޑު މީހެއް ކަމަށެވެ. ތައުބާވުމުން ހުރިހާ ފާފަތަކެއް ފުއްސަވައިދެއްވަވާނެއިރު ކުޑަކުޑަ ފާފައެއް ކޮށްލުމަކީ އެއްވެސް މައްސަލައެއް ނޫން ކަމަށެވެ. ދުނިޔޭގައި އުފާކުރަންވެސް ޖެހޭނެ ކަމަށާއި ނޫންނަމަ ޒުވާން އުމުރު އެދަނީ އެއްވެސް އުފަލެއް ނުލިބި މުޅިންބޭކާރުވެގެންކަމަށެވެ.
މިފަދަ ވަސްވާސްތަކަށް ވިސްނައިލާށެވެ!
1 އެއްވެސް މީހަކު މަރުވާކަށް ވަކި އުމުރެއް ނުއޮވެއެވެ. ތިމާއަށްވުރެ އުމުރުން ހަގު އެތައް މިލިއަން މީހުން ކޮންމެ ދުވަހަކު އެދަނީ މަރުވަމުންނެވެ. ވީމާ ތިމާގެ އުމުރުގައި ބާކީ އޮތް ދުވަހުގެ ޢަދަދު އެނގޭނީ ކާކަށް ހެއްޔެވެ؟
2 ތައުބާވުމުން ކުރެވިފައިވާ ހުރިހާ ފާތައް ފުއްސަވައި ދެއްވަވާނެ ކަމަށް އޮތް ބަސްފުޅުގެ މާނައަކީ މާދަން ތައުބާވާން ނުވަތަ އުމުރުން ދުވަސްވުމުން ތައުބާވުމުގެ ފުރުޞަތު އެބައޮޔްކަމަށް ބަލައިގެން ފާފަކުރަން ހުއްދަވުމެއްވެސް ނޫނެވެ.
3 ކުޑަކުޑަ ފާފައެއް ކޮށްލުމަކީ މައްސަލައެއް ނޫންކަމަށް ޝައިޠޯނާ ވިސްނައިދޭއިރު ކުޑަކުޑަ ފާތައް ކުރަން މީހަކު ފަށައިފިނަމަ ދާދިއަވަހަށް އޮންނަނީ ބޮޑެތި ފާފަތަކަށް އަރައިގަންނަން ބިރުވެތިނުވެވިފައެވެ. ބޮޑެތި ފާފަތައް ކުރަން ބިރުކެނޑި އަދި އާދަވެސް ވެފައެވެ.
ޙައްލަކީ ކޮބާ؟
ޙައްލަކީ ޝައިޠޯނާއަކީ މީސްތަކުންގެ މައްޗަށްހުރި ޢަދާވާތްތެރިޔާކަން އެނގޭއިރު ޝައިޠޯނާއަށް ކައިރިވެސް ނުވެވޭނެ ގޮތަށް ރައްކައުތެރިކަމުގެ ފިޔަވަޅު އަޅައިގެން ހުރުމެވެ. ގެއިން ވަދެ ނުކުންނަމުން ކިޔާ ޛިކުރުތަކުގެ އިތުރުން ގިނަގިނައިން އަޢޫޛް ކިޔުމެވެ! ގިނަގިނައިން ﷲ ތަޢާލާ ހަނދުމަކުރުމެވެ. ކިތަންމެ ކުޑަކުޑަ ފާފައެއް ނަމަވެސް އެއްވެސް ފާފައެއް ނުކުރަން އަބަދުވެސް ޢަޒުމްކަނޑައަޅައިގެން ހުރުމާއި އެގޮތުގައި ސާބިތުކުރައްވަވައި ދެއްވެވުން އެދި ގިނަގިނައިން ދުޢާކުރަމުން ގެންދިއުމެވެ. އެއިރުން އެމީހަކަށް އެކަމަށް މަގުފަހިކުރައްވަވައި ދެއްވަވާނެތެވެ! އިން ޝާ ﷲ
- އިސްލާމީ ތިލަފަތުގެ ދަރުސަކުން
