މިސްކިތުގައި ކުރަންނުވާ ކަންކަން ކުޑަކުދިންނަށް ކުރެވެނީ މިސްކިތުގައި ކުރަންވީ ކަންކަމާއި އުޅެންވާގޮތް އެކުދިންނަށް އަންގައިދީ ތަރުބިއްޔަތު ނުކުރެވޭތީއެވެ. އެކަމުގެ ޒިންމާ އުފުލަންޖެހޭނީ މައިންބަފައިންނާއި ބެލެނިވެރިންނެވެ.
މިސްކިތުގައި ތިބޭ ބޮޑެތި މީހުންނަށް އޮތީ އެކުދިންނަށް ވިސްނައިދީ ހޭލުންތެރިކުރުވަން މަސައްކަތްކުރުމެވެ. އެކަންކުރަންވާނީ ވަރަށް އޯގާތެރިކަމާއިއެކުގައެވެ. ނޫންނަމަ ކުދިން މިސްކިތަށް ދިއުންމަތިން ފޫހިވެ ނަމާދުކުރުން ހުއްޓާލައިފާނެއެވެ. އެއީ ކުއްޖަކަށް ދެވޭނެ އެންމެ ބޮޑު ދެރައެވެ.
ޝައިޠޯނާ އަބަދުވެސް ހުންނާނީ އެފަދަ ފުރުޞަތަކަށް ބަލަބަލައެވެ. އެފަދަ ގޮތެއް މެދުވެރިވާއިރަށް ކުއްޖާ މަގުފުރައްދައިލާނެއެވެ. މިސްކިތްމަތިން ފޫހިކުރުވާނެއެވެ. ނަމާދުކުރުމާއި ދުރުހެލި ކުރުވާނެއެވެ.
ވިސްނައިލާށެވެ. މިސްކިތަށް ކުޑަކަމުދާން އިން މީހާ އާއިމެދު ރަސޫލް ކަންތައް ކުރެއްވެވި ގޮތަށެވެ. އެކަންކޮށް ނިންމަން އޭނާއަށް ފުރުޞަތު ދެއްވެވިއެވެ. އެތަނަށް ފެންއަޅަން ޙަދީޘް ކުރެއްވެވީވެސް އޭނާއަކަށް ނޫނެވެ. ޞަޙާބީންނަށެވެ. މިއީ މިފަދަ ކަންކަމުގައި ކެތްތެރިވާންޖެހޭ މިންވަރެވެ. ވީއރު ކުއްޖަކަށް މިސްކިތުގައި ކުރެވޭ ކުށަކާއި ގުޅިގެން ރުޅި އައިސް އެއްޗެތިގޮވަން ހުއްދަވާނީ ކޮންގޮތަކުން ހެއްޔެވެ؟
ކުއްޖަކަސް ނަބޭޙަތްދީ މިސްކިތަށް އައުމަށް ހިތްވަރުދިނުމަކީ އިސްލާމް ދީން މަތިވެރިކުރަން ކުރެވޭނެ އެންމެ މުހިންމު އެއް މަސައްކަތެވެ! އެކަމަށް ﷲ ތަޢާލާ ގިނަގުނަ ޘަވާބު ދެއްވަވާނެތެވެ! މަސައްކަތްކުރަންވީ އެޘަވާބާއި ދަރުމަ ލިބިގަތުމަށެވެ!
- އިސްލާމީ ތިލަފަތުގެ ދަރުސަކުން
