ބައެއް މީހުންނަށް ފާފަތައް ކުރެވުނު ނަމަވެސް އެކަމުން ތިމާއަށް ގެއްލުމެއް ލިބޭތަން ނުފެންނާތީ އެއީ އެއްވެސް ކަމަކަށް ނުހަދައި އެބަ މަޑުކުރެވެއެވެ.
ނަތީޖާއަކަށްވަނީ ފާފަކުރެވޭވަރަކަށް އެތެރެއަށް ވަދެވެމުން ގޮސް އެންމެ އެތެރެއަށް ވަދެވުމެވެ. އެހިސާބުން ތިމާއަށް ބޮޑު މުޞީބާތެއް ޖެހިގެން ނުވަތަ ހިތްދަތިކަމެއް ލިބިގެން ތައުބާވާން ވިސްނާއިރު ފާފަކުރުން ހުއްޓާލެވުން އޮންނަނީ ވަރަށް އުނދަގޫކަމަކަށްވެފައެވެ.
މިސާލަކަށްބުނާނަމަ ތައުބާވުމުގެ އެންމެ މުހިންމު ޝަރުޠަކީ ކުރެވެމުން އަންނަ ފާފަކުރުން ހުއްޓާލުމެވެ. ފާފަކުރަން ދެވިހިފުމުން އެކަން ހުއްޓައިލުން އޮންނަނީ ވަރަށް ދަތި އުނދަގޫކަމަކަށްވެފައެވެ. ވީމާ ތައުބާވުމަށް އޮންނަނީ ހުރަސްއެޅިފައެވެ. އެއީ ތިބާ އާއި ތައުބާވުމާއި ދެމެދަށް ޝައިޠޯނާ ހުރަސްއަޅާތީއެވެ.
އިންސާނުންކަމަށްވީތީ ފާފައެއް ކުރެވިދާނެއެވެ. ފާފައެއް ކުރެވިއްޖެނަމަ ތައުބާވުމަށް އަވަސްވެގަންނަން ޖެހޭ ސަބަބަކީ މިބަޔާންކުރީއެވެ. އަދި ދުވަސްކޮޅަކު ފާފަކޮށްލާފައި ތައުބާވާން ނުވަތަ ފަހުން ތައުބާވާން ހުއްޓައި ފުރުޞަތު ގެއްލި މީހާ ގެއްލެނިވެގެންދަނީ އެ ސަބަބަށްޓަކައެވެ. ޝައިޠޯނާ އެކަމަށް ހުރަސްއަޅާތީއެވެ.
މިސާލަކަށް ދޮގުހެދުން ބަލާށެވެ! ދޮގު ނުހަދާހައި ހިނދަކު ﷲ ތަޢާލާގެ ޙަޟްރަތުގައި އެމީހަކީ ޞިއްދީޤެކެވެ. ދޮގުހަދަން ފެށުމުން އެމީހާ ޚައްޛާބަކަށް (ދޮގުވެރިއަކަށް) ބަދަލުވެގެންދެއެވެ. އެހިސާބަށްދާއިއރު އޭނާ ހުންނަނީ ދޮގުހަދަން ދެވިހިފައިފައެވެ. ހުއްޓައިލުމަކީ ކުރެވޭނެ ކަމަކަށް ނުވެފައެވެ. މިޙާލަތުން ސަލާމަތްވުމަށް ކުރަން އޮތް ކަމަކީ ދޮގުނުބުނުވެ.
- އިސްލާމީ ތިލަފަތުގެ ދަރުސަކުން
