އެއްވެސް މީހަކު ތިބާއަށް އަނިޔާއެއް ނުވަތަ ހިތްދަތިކަމެއް ކުރިމަތިކޮށްފިނަމަ އެއީ ކީއްވެގެން އޭނާކުރިކަމެއް ކަމާއިމެދު ސުވާލުކުރުމުގެ އެއްވެސް ބޭނުމެއް ނެތެވެ. އަނިޔާވެރިވުމާއި ހިތްދަތިކުރުވުމަކީ މުސްލިމުންނަށް ކުރުން ހުއްދަވެގެންވާ ކަންކަމެއް ނޫނެވެ. އަދި އެކަންކަމަކީ ކަނޑައެލިގެން ނަހީކުރައްވަވާފައިވާ ކަންކަމެވެ. ބޮޑެތި ފާފަތަކުގެ ތެރޭގައި ހިމެނޭ ފާފަތަކެވެ. ވީމާ އެފަދަ ކަމެއް ކުރާ މީހަކު އެކަން އެކުރަނީ އެމީހަކު ﷲ ތަޢާލާއަށް ބިރުވެތިނުވާތީއެވެ.
ބައެއް މީހުން މީހުންނަށް އަނިޔާވެރިވެ ހިތްދަތިކަންދެނީ ވަރަށް ބޮޑަށް ފޮރުވިގެންތިބެއެވެ. އެކަމުގެ ވާހަކަތައް ދެކެވެން ނުއޮންނަ ފަދަ ގޮތަކަށެވެ. މިސާލަކަށް އަމިއްލަ ޢާއިލާގެ ތެރެއިން އަނިޔާލިބެމުންދާނަމަ އެކަމުގެ ވާހަކަ ދެއްކުން އެއްވެސް މީހަކަށް ފަސޭހައެއްނުވާނެއެވެ.
އެހެންވެ ﷲ ތަޢާލާގެ ވަޙީބަސްފުޅުގައިވަނީ " ތިމަން ﷲ، އަނިޔާވެރިވާ މީހުން ދެނެވޮޑިގެންވާ" ކަމަށެވެ. މާނައަކީ އެމީހުންނަށް ޙައްޤު ޢަޛާބު ނުދެއްވަވައި ދޫނުކުރައްވަވާނެކަމެވެ. ދުނިޔޭގައިވެސް އާޚިރަތުގައިވެސް އެމީހަކަށް ޢަޛާބާއި ކުރިމަތިލާންޖެހޭނެ ކަމެވެ.
އަނިޔާ ލިބެމުންދާނަމަ އެކަމުގެ ވާހަކަ މީސްތަކުންނާއިހަމައަށް ފޯރުކޮށްދެވެން ނެތިގެން ކަންބޮޑުނުވާށެވެ! އެކަން ﷲ ތަޢާލާ ބައްލަވައިވޮޑިގެންވެއެވެ. އެކަލާނގެ ރަޙްމަތަށް އެދި ދުޢާކުރަމުން ގެންދާށެވެ! އަނިޔާއިން ﷲ ތަޢާލާ އެމީހަކު ސަލާމަތްކުރައްވަވައި ދެއްވަވާނެތެވެ. އިން ޝާ ﷲ
- އިސްލާމީ ތިލަފަތުގެ ދަރުސަކުން
