މީސްތަކުން މިއަދު ފާފަކުރުމާއިމެދު ދެކެނީ މުޅިން ތަފާތު ގޮތަކަށެވެ. ފާފަކުރުމަކީ އެއްވެސް ކަމެއް ނޫން ކަމަށެވެ. މިހެންމިކަންވެގެން މިދިއައީ ﷲ ތައާލާއަށް ބިރުވެތިވުން ނެތިގެން ދިއުމުންނާއި އަޅުކަންކުރަން ސަމާލުކަން ކުޑަވުމުންނެވެ. މިފަދަ ކަންކަމުގެ ނަތީޖާޢަކަށްވެގެންމިދަނީ އިންސާނުންގެ ފުރާނައާއިމެދު ދެކެވޭ ގޮތް ބަދަލުވުމެވެ. ތަޅައި އަނިޔާކުރުމާއި މީހުން މެރުން ފަދަ ކަންކަން ކުރަންޖެހިލުންވާ މީހުން ނެތިގެންދަނީއެވެ.
ދެމަފިރިން ކުރާ އަނިޔާ، ޢާއިލާއިންކުރާ އަނިޔާ ދަރިންނަށްކުރާ އަނިޔާ ފަދަ ރީތި އަދި ތަފާތު ނަންނަމުގައި އަނިޔާގެ ވާހަކަތައް ދެއްކިދާނެއެވެ. ކޮންމެ ނަމެއް ކިޔައިގެން ވާހަކަދެއްކި ނަމަވެސް މިދެއްކެނީ ހަމަ އެއްކަމެއް ކުރުމުގެ ވާހަކައެކެވެ. އަނެކާއަށް އަނިޔާކުރުމުގެ ވާހަކައެވެ. ތިމާގެ ބެލުމުގެދަށުގައި ތިބޭ މީހުންނަށާއި އަދި އެހެން މީހުންނަށްވެސް އަނިޔާވެރިވުމުގެ ވާހަކައެވެ.
އެކަކު އަނެކަކަށް އަނިޔާވެރިވުމާއި މީހުން މެރުން ފަދަކަންކަން ކުރަން ޖެހިލުންވުން ކުޑަވަމުން އަންނާނެކަން އޮތީ ޙަދީޘްފުޅުން އެނގޭށެވެ! އެއީ ހުރިހާ ކަންކަން ވާނެގޮތް އެންމެ މޮޅަށް ދެކެދެނެވޮޑިގެންވާ ﷲ ތައާލާ އެކަންކަން ރަސޫލް ﷺ އަށް އަންގަވައިދެއްވެވުމުންނެވެ.
މިކަންކަން މިހެން މެދުވެރިވާނެކަން ހަދީޘްފުޅުކުރައްވަވާފައިވަނީ ފަހުޒަމާނުގެ ޢަލާމާތްތައް ބަޔާންކުރައްވަވައި ފަހުޒަމާނުގައި ހިނގާނެ ކަންކަން ޙަދީޘްފުޅުކުރައްވަވަމުންނެވެ.
މިކަމުގައިވެސް ބުނަން އޮތީ މިއީ ފަހުޒަމާންކަމަށްވުމަކީ އަނބިދަރިންނަށްވެސް، އަދި ފިރިންނަށްވެސް ނުވަތަ ޢާއިލާގެ އެއްވެސް މީހަކަށް އަނިޔާކުރަން ލިބޭ ފުރުޞަތެއް ނޫނެވެ. އަދި މިއީ ފަހުޒަމާންކަމަށްވުމަކީ އެއްވެސް ފާފަކުރަން ހުއްދަވާ ސަބަބެއްވެސް ނޫނެވެ.
އެއިގެ ބަދަލުގައި ފަހު ޒަމާނުގައި ނުބައި ޢަމަލުތައް ނުކޮށް ހެޔޮ ގޮތުގައި ޢަމަލުކޮށްފިމީހަކަށް ޤިޔާމަތްދުވަހު 50 ޞަޙާބީންގެ ދަރަޖަ ދެއްވަވާނެކަން ރަސޫލް ﷺ ވަނީ ޙަދީޘްފުޅުކުރައްވަވައިފައެވެ. ވީމާ އަހުރެންގެ ނަޞޭޙަތަކީ މިފަދަ ޒަމާނެއްގައި ދިރިއުޅެން ލެއްވެވުމުން އެކަމުގެ ފައިދާވެސް ޙާޞިލުކުރުމެވެ.
މިސާލަކަށް މިއަދު ނަމާދު ހަދާފައުި މިވަނީ ލާރިލިބެން ހުންނަ މަސައްކަތްތައްކޮށް ނިމުމުން ކުރަން އޮތްކަމަކަށެވެ! އަދި ނަމާދުކުރުމަކީ އަވަސްއަރުވާލައިގެން ގުނަވަންތައް ތަޅުވައިލުން ކަމަށެވެ. ހަމައެއާއިއެކު ފަހުޒަމާނުގައި އެގޮތަށް ނަމާދުކުރާނެ ބައަކު އުޅޭނެކަމަށް ރަސޫލް ﷺ ވަނީ މާކުރިން ޙަދީޘްފުޅުކުރައްވަވައިފައެވެ.
މިއަދަކީ ހިތްވަރުކޮށްލައިގެން 50 ސަޙާބީންގެ ހެޔޮކަން ހާޞިލުކުރަން މަސައްކަތްކުރަންވީ ދުވަހެވެ. ފުރިހަމަ ގޮތުގައި ނަމާދުކުރުމާއި މުންކަރާތްތަކަށް އަރައިނުގަތުމާއި އެއްވެސް މީހަކަށް އަނިޔާވެރިނުވެ ހުރުން ފަދަ ކަންކަމުގައި ސާބިތުވެވިއްޖެ މީހަކަށް ﷲ ތައާލާ ޤިޔުާމަތްދުވަހު ދެއްވަވާނެ މަތިވެރި ދަރަޖަ ލިބިގަންނަން މަސައްކަތްކުރަންވީ ދުވަހެވެ.
- ބިލާލް އައްސަދުގެ ދަރުސަކުން
